သီးရွက်စုံတန်ပူရာကြော်၊ မိုးကျလက်ဖက်သုပ်၊ အာပူလျှာပူဟင်းရည်…








ဒီတစ်ပတ်ကတော့မိုးအေးအေးလေးမှာ တန်ပူရာကြော်လေးရယ် မိုးတွင်းဘက်မှ စားရတဲ့ရာသီပေါ် ဒန်ကျွဲရွက်နဲ့သုပ်ထားတဲ့ မိုးကျလက်ဖက်သုပ်လေးရယ် ငါးရွှေကြပ်တိုက်လေးနဲ့ ချက်ထားတဲ့ အာပူလျှာပူဟင်းရည်လေးရယ်ပဲ ချက်စားဖို့စိတ်ကူးထားတယ်ဗျာ၊ ကျွန်တော်ကတော့ သီးရွက်စုံတန် ပူရာကြော်နဲ့အာပူလျှာပူဟင်းရည် တာဝန်ယူချက်မယ်၊ မယ်တော်မားသားကတော့ မိုးကျလက်ဖက်လေး သုပ်မယ်ပေါ့။

သီးရွက်စုံတန်ပူရာကြော်
အာလူး၊ ရွှေဖရုံသီး၊ မြင်းခွာရွက်၊ Baby corn ခရမ်းသီးငါးမျိုးလောက်ရွေးထားတယ်။ ဒါမှလည်း အရသာစုံစုံလေးနဲ့စားလို့အဆင်ပြေမှာပေါ့နော်။ တန်ပူရာမှုန့်ထဲကို ရွှေကြည်ဆန်မှုန့် လေးရောပြီး မပျစ်မကျဲလေးဖျော်ထားလိုက်မယ်၊ ရွှေကြည်ဆန်မှုန့်လေးရောလိုက်တော့ ပိုပြီးကြွပ်ကြွပ်ရွရွလေးဖြစ်တယ်၊ စားလို့လည်းပိုကောင်းတယ်ပေါ့။ အသီးအနှံလေးတွေကို အနေတော်လေးလှီးထား၊ မြင်းခွာရွက်လေးတွေကိုလည်း အနေတော်လေးစည်းထား၊ ကြော်ခါနီးမှ ခုဏက ဖျော်ထားတဲ့မုန့်နှစ်လေးထဲထည့်နှစ်ပြီး ဆီပူပူမှာ ပြန်ကြော်ရုံပါပဲ။

 ဆီများများလေးနဲ့ကြော်ဖို့တော့ လိုတာပေါ့နော်။ ဒါဆိုရင်တော့ စားလို့ကောင်းမှာသေချာတဲ့ တန်ပူရာကြော် ကြွပ်ကြွပ်လေးရပြီပေါ့နော်။ သူနဲ့တွဲစားဖို့ အချဉ်လေးလည်း ဖျော်ဖို့လိုတာပေါ့။ ကြက်သွန်ဖြူသုံးတက်၊ ဂျင်းက ကြက်သွန်ဖြူတစ်တက်စာလောက် ငရုတ်သီး စိမ်းအနီက ဆယ်တောင့်၊ နံနံပင်အရိုးလေးနည်းနည်း၊ သကြား၊ ပုဇွန်ငံပြာရည်၊ သံပုရာရည်သင့်ရုံထည့်ပြီး ဖျော်ရည်ဖျော်စက်ထဲမှာ ရေလေးနဲနဲထည့်ပြီး အားလုံးကြေအောင်ကြိတ်လိုက်မယ်ဆိုရင် တန်ပူရာကြော်ပူပူလေးနဲ့တွဲစားဖို့ အရမ်းလိုက်ဖက်တဲ့ ချဉ်ငံစပ်မွှေး အချဉ်ပန်းရောင်လေးရပြီပေါ့။

မိုးကျလက်ဖက်သုပ်
ဒန်ကျွဲရွက်ကို ရင့်တာလေးတွေဖယ်ပြီးမှ မန်ကျဉ်းမှည့်ရည်လေးနဲ့ရေထည့်ပြီးပြုတ်၊ ခဏအအေးခံ၊ ရေတွေကုန်အောင်ညှစ်ပြီး ခပ်ပါးပါးလှီးထား၊ မန်ကျည်းမှည့်ကို ရေနွေးနဲ့စိမ်ပြီး မန်ကျည်းမှည့် ရည်လေး ရအောင်လုပ်ထား၊ ငရုတ်သီးစိမ်းနဲ့ကြက်သွန်နီအထူမပါးလှီးထား၊ ငရုပ်လှော်မှုန့်လေးလည်း အဆင်သင့်ပြင် ထား၊ ကြက်သွန်နီကို ဆီချက်ချက်ထား၊ ပုဇွန်ခြောက်လေးကို မညက်တညက်လေးထောင်းထား၊ နှစ်ပြန်ကြော်လေးလည်းဝယ်ထားပေါ့။ 

အားလုံးစုံပြီဆိုမှ လှီးထားတဲ့ဒန်ကျွဲရွက်ထဲကိုဆီချက်၊ ပုဇွန်ငံပြာရည်၊ ငရုတ်သီးစိမ်း ငရုပ်သီးလှော်မှုန့်၊ မန်ကျည်းမှည့်ရည်၊ ကြက်သွန်နီ၊ ပုဇွန်ခြောက် မှုန့်ထည့်ပြီး ခပ်ဖွဖွလေးနယ်၊ အရသာလေး မြည်းကြည့်လို့ချဉ်ငံစပ်လေးရပြီဆိုမှ နှစ်ပြန်ကြော် လေးထည့်နယ်လိုက်ရင် ရာသီပေါ်မိုးကျ လက်ဖက်သုပ်ချဉ်ငံစပ်လေးရပါပြီ။ ငရုတ်သီး လှော်မှုန့်ရော ငရုတ်သီးစိမ်းပါထည့်ထားတော့ ပိုလည်းမွှေးမွှေးလေးဖြစ်တာပေါ့။

အာပူလျှာပူဟင်းရည်
ငါးရွှေကြပ်တိုက်လေးကို ရေနွေးနဲ့ခဏစိမ်နည်းနည်းနူးလာမှ အရိုးထွင်အနေတော်လေးတွေဖဲ့ထား၊ ကြက်သွန်ဖြူနဲ့ ငရုပ်ကောင်းကိုရောထောင်းထား၊ စိမ်းစားငါးပိလေးနည်းနည်းကို ရေဖျော်ပြီးခဲသလဲစစ်ထား၊ အာပူလျှာပူရွက် ခြောက်လေးကို ရေပြန်ဆေးထား ရေအရင်ဆူအောင်တည်၊ ရေဆူလာမှငါးရွှေကြပ်တိုက်နဲ့ ကြက်သွန် ဖြူနဲ့ငရုတ်ကောင်းရောထောင်းထားတာထည့်၊ စိမ်းစားငါးပိဖျော်ထားတာထည့် ခဏနေလို့ ငါးရွှေကြပ်တိုက်က အချိုရည်ထွက်လာပြီဆိုရင် အာပူလျှာပူလေးထည့်ပြီး အရသာမြည်းကြည့်လို့ အရသာလည်း စိတ်ကြိုက်ရ အာပူရွက်နံ့လေးလည်း မွှေးနေပြီဆိုရင်တော့ တန်ပူရာကြော်လေးရယ် မိုးကျလက်ဖက်သုပ်လေးရယ်နဲ့ တွဲစားဖို့အရမ်းလိုက်တဲ့ အာပူလျှာပူဟင်းရည်တစ်ခွက်ရပြီပေါ့နော်။
မိုးကျလက်ဖက်သုပ်ဖို့ ဆီချက်လေးလည်း အသင့်ရှိနေတော့ မုန့်ဖတ်လေးနဲ့ပဲကြော်လေးဝယ် ထည့်ပြီး အာပူလျှာပူလေးလည်းသောက်ချင်သောက်လို့ရတော့ ပိုအဆင်ပြေတာပေါ့ဆွေမျိုးတို့ရာ။
ဒီတစ်ပတ်ကတော့ဒီလောက်ပဲ ချက်ကြတာပေါ့ဆွေမျိုးတို့ရာ။ နောက်တစ်ပတ်မနောက်တစ်မျိုးချက်ဖို့ ပြန်ဆုံကြတာပေါ့နော်။ အားလုံးအဆင်ပြေ ပျော်ရွှင်ကြပါစေ။


Royal
--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment Journal မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

#အပတ်စဉ်စနေနေ့တိုင်းထွက်ပြီ #စိတ်ရွှင်လန်းဖို့စာဖတ်စို့
#Weekly #Saturday #ရှိတ်ပ်
 


Share on Google Plus

0 comments:

Post a Comment