မှားတဲ့သူနဲ့မှန်တဲ့သူဖြစ်တဲ့ပြဿနာက ဖြေရှင်းရတာလွယ်ပေမယ့် မှန်တဲ့သူနှစ်ဖက်ကြားက ဖြစ်တဲ့ပြဿနာကိုရှင်းရတာဟာအရမ်းကိုခက်ပါတယ်ဆိုတဲ့ပြေတီဦး


ပြေတီဦး
ဒါရိုက်တာဝိုင်း ရိုက်ကူးပုံဖော်တဲ့ နေ၀င်အိပ်တန်းတက် ရုပ်ရှင်ဇာတ်ကားမှာ အဓိကသရုပ်ဆောင်ထားတဲ့ အကယ်ဒမီပြေတီဦးနဲ့တွေ့ဆုံခိုက် သူရဲ့အနုပညာနဲ့ ဒီဇာတ်ကားအပေါ်မှာ ပြင်ဆင်မှုအပိုင်းတွေနဲ့ အခြားအနုပညာအကြောင်းတွေကတော့…

နေ၀င်အိပ်တန်းတက်ဇာတ်ကားအတွက်ကြိုတင်ပြင်ဆင်မှုအပိုင်းတွေသိပါရစေ

ဒီဇာတ်ကားကိုပြန်ကြည့်တဲ့အခါမှာ ကျွန်တော်သရုပ်ဆောင်မှုနဲ့ပတ်သက်ပြီး အားရကျေနပ်မှုတော့ရှိပါတယ်။ ကြိုတင်ပြင်ဆင်မှုအပိုင်းကတော့အ၀တ်အစားလောက်ပါပဲ။ ကျန်တဲ့အိုက်တင်ပိုင်းကတော့ ဒီဇာတ်ကားမရိုက်ခင်ကတည်းက ၀တ္ထုနဲ့ဇာတ်ညွှန်းကို အကြိမ်ကြိမ်ဖတ်ပြီးတော့စကားကိုဘယ်လိုပြောမယ် ဘယ်နေရာမှာတော့ ဘယ်လိုအိုက်တင်လုပ်ရင်ပိုကောင်းနိုင်တယ်ဆိုတာမျိုးကိုတော့ ကြိုတင်ပြင်ဆင်ခဲ့ပါတယ်။

ဒီဇာတ်ကားက ဆရာဝန်နဲ့လူနာကြားကပြဿနာကိုဖြေရှင်းဖို့ ရိုက်ပြတာမျိုးလား…

ဒီဇာတ်ကားကတော့ဆရာဝန်တွေဘက်ကခံစားချက်ကိုရိုက်ပြထားတာဖြစ်သလို ဒီလူနာရှင်တွေဘက်က ခံစားချက်ကိုလည်း တစ်ခါတည်းပြောပြထားပြီးသားပါ။  ဥပမာ-ဆရာဝန်တစ်ယောက်က ဒီတစ်လမှာလူနာ ၉၉ ယောက်ကို အသက်ဘေးက ကယ်နိုင်ခဲ့တယ်။ ဒါပေမဲ့ တစ်ယောက်ပဲ သူမကယ်နိုင်ခဲ့တာပေါ့။ အဲဒီတစ်ယောက်ကလည်း လူနာရှင်ဘက်ကကြည့်မယ်ဆိုရင် အစားထိုးမရတဲ့ တစ်ယောက်တည်းရှိတဲ့ အဖေဖြစ်နေရင် ဒါဟာလူနာအတွက်၁၀၀ရာခိုင်နှုန်းဆုံးရှုံးသွားတာပဲ။ ဒီတော့ ဆရာဝန်ဘက်ကကြည့်ရင် လူနာ ၉၉ရာခိုင်နှုန်းအောင်မြင်ခဲ့တယ်။ လူနာဘက်ကကြည့်တော့ တစ်ရာတစ်ယောက်ဆိုတာအစားထိုးမရတဲ့ မိဘမောင်နှမဖြစ်နေရင် ဒါဟာ ၁၀၀ရာခိုင်နှုန်းဆုံးရှုံးမှုဖြစ်နေတော့ ဒီကိစ္စနဲ့ပတ်သက်ပြီး အဲဒီဇာတ်ကားထဲမှာလည်းပြောထားတယ်။ မှားတဲ့သူနဲ့ မှန်တဲ့သူဖြစ်တဲ့ပြဿနာကဖြေရှင်းရတာလွယ်ပေမယ့် မှန်တဲ့သူနှစ်ဖက်ကြားကဖြစ်တဲ့ပြဿနာကိုရှင်းရတာဟာအရမ်းကိုခက်ပါတယ်လို့ပြောထားပါတယ်။ ဒီဇာတ်ကားက ဆရာဝန်ဘက်က ရိုက်တာမဟုတ်သလိုလူနာဘက်ကလည်း ရိုက်တာမဟုတ်လို့ မျှတမှုရှိတယ်ပေါ့နော်။

နေ၀င်အိပ်တန်းတက်ဇာတ်ကားအပေါ်မှာအစ်ကို့အနေနဲ့ ပရိသတ်တစ်ယောက်အမြင်နဲ့ပြောပြပေးနိုင်မလား…
ဒီဇာတ်ကားထဲမှာ အဲဒီလိုမျိုးအသိပညာပေးပါသလို အခြားသောဘ၀မှာကြုံဆုံရမယ့်အခက်အခဲ ပြဿနာတွေနဲ့ ပတ်သက်ပြီးပေးထားတဲ့ အသိပညာတွေလည်းပါနေတယ်လို့ ကျွန်တော်ကတော့ပရိသတ်တစ်ယောက်အနေနဲ့မြင်ပါတယ်။ ဒီတော့ဒီဇာတ်ကားက ရည်ရွယ်ချက်နဲ့ပရိသတ်ကိုပေးတဲ့မက်ဆေ့က အရမ်းကောင်းတဲ့အသိပညာပေးဇာတ်ကားတစ်ကားပါ။

ဒီဇာတ်ကားအပေါ် အစ်ကို့အနေနဲ့ အားရကျေနပ်မှုရှိလား…

ကျွန်တော့်အနေနဲ့ကတော့ ကျွန်တော့်ရဲ့သရုပ်ဆောင်မှုဇာတ်လမ်းဝတ္ထုကလည်းနာမည်ကြီးပြီးသား ဆရာအလင်္ကာရည်ကျော်ရဲ့ လက်ရွေးစင်ဝတ္ထုတစ်ပုဒ်ဖြစ်တာကြောင့် အစစအရာရာအားရကျေနပ်မှုရှိပါတယ်။ ရုပ်ရှင်အနေနဲ့အောင်မြင်တာမအောင်မြင်တာတော့ ကြိုတင်မပြောနိုင်ပေမယ့် ကျွန်တော့်ဘ၀မှာ ကြည့်တဲ့ပရိသတ်တွေအတွက်ကို ဒီလိုမျိုးတန်ဖိုးရှိတဲ့ဇာတ်ကားတစ်ကား ရိုက်ကူးဖြစ်ခဲ့တဲ့အတွက်တော့ ကျွန်တော့်ဘ၀မှာ ၀မ်းသာဂုဏ်ယူမိနေမှာပါ။

အစ်ကို့အနေနဲ့အွန်လိုင်းပေါ်မှာစာတိုလေးတွေရေးလေ့ရှိတော့ စာရေးဖို့အစီစဉ်ရှိလား…

အခြားအနုပညာတစ်ခုအနေနဲ့ကတော့ စာရေးတာဝါသနာပါတော့ စိတ်ကူးပေါ်ရင်ပေါ်သလိုရေးဖြစ်ပါတယ်။ များသောအားဖြင့် ဖေ့ဘွတ်ပေါ်မှာရေးတင်လေ့ရှိတယ်။ စာရေးတာကိုတော့ ကျွန်တော့်အနေနဲ့ ပရော်ဖက်ရှင်နယ်အထိလုပ်ဖို့တော့မရှိပါဘူး။ ဒီအတိုင်းဝါသနာအရစာရေးတာပဲရှိပါတယ်။

နေ၀င်အိပ်တန်းတက်ရုပ်ရှင်ဇာတ်ကားနဲ့ပတ်သက်ပြီး ဘာများပြောချင်လဲ…

ကျွန်တော်တို့ အနုပညာသမားတွေဆိုတာ ဖျော်ဖြေရေးသပ်သပ်ဇာတ်ကားတွေရိုက်တာရှိသလို အခုလိုပရိသတ်တွေအတွက် အကျိုးရှိစေမယ့် အသိပညာပေးဇာတ်ကားတွေရိုက်ပြတဲ့အခါ လာကြည့်တဲ့ပရိသတ်တွေဘ၀အတွက် တစ်စုံတစ်ရာအသိပညာရသွားတယ်ဆိုရင်ပဲ ကျွန်တော်တို့အနုပညာကြိုးစားဖန်တီးရကျိုးနပ်ပါတယ်ဗျာ။

Share on Google Plus

0 comments:

Post a Comment