ကြက်သားဘူးသီးကာလသားချက်၊ ချဉ်စော်ကားသီးထောင်း၊ အုန်းနို့ဆန်ပြုတ်





ဒီတစ်ပတ်မှာတော့ ရှမ်းပြည်ကသူငယ်ချင်းထည့်ပေးတဲ့ ချဉ်စော်ကားသီးလေးကိုထောင်းမယ်၊ ကြက်သားနဲ့ ဘူးသီးကို အရည်များများနဲ့ သောက်ဆမ်းပုံစံလေးချက်မယ်စိတ်ကူးတယ်။ ပြီးတော့ မယ်တော် မားသားသောက်ချင်နေတဲ့ အုန်းနို့ဆန်ပြုတ်လေးပြုတ်မယ်။မယ်တော်မားသားဈေးသွားတော့ ကြက်သားဘူးသီးကာလသားချက်ဖို့အတွက် ကြက်သား၊ ဘူးသီးနဲ့နံနံပင်မှာဖြစ်တယ်။ 

ချဉ်စော်ကားသီးထောင်းဖို့အတွက်ကတော့ ပုဇွန်လေးမှာလိုက်တယ်။ နောက်ပြီး ရှမ်းနံနံနဲ့ပင်စိမ်း။ အုန်းနို့ဆန်ပြုတ်အတွက်ကတော့ အမေက ဈေးကနေအုန်းသီးခြစ်ညှစ်မှာ အုန်းနို့ခြစ်ညှစ်လုပ်လာမယ်။ အုန်းသီးကိုတော့ အဆီမများဘဲ နို့များများရတဲ့အုန်းသီးလက်ပေါ့လေးကိုရွေးရမှာပေါ့။ ဒါမှမဆီမများပဲ နို့များများလေးနဲ့မွှေးမှာလေ။ ပြီးတော့ အုန်းနို့ဆန်ပြုတ်လေးထဲထည့်သောက်ဖို့ အီကြာကွေးလေး လည်းမှာလိုက်တယ်။

ကြက်သားဘူးသီးကာလသားချက်
မယ်တော်မားသားဈေးသွားနေတုန်း ကြက်ကာလသားချက်ဖို့အတွက်ဇီယာလေးအရင်ထောင်းပြီးမှ ငရုတ်သီးခွဲခြမ်းမှုန့်နဲ့ ကြက်သွန်ဖြူနီလေးပါရောထောင်းထားလိုက်တယ်။ ချဉ်စော်ကားသီးထောင်းဖို့ အတွက်ကတော့ ချဉ်စော်ကားသီးကိုအခွံနွှာ အလယ်ကအူတိုင်လေးဖယ်။ အတုံးလေးတွေတုံး၊ ရေစင် စင်ဆေးပြီး ရေစစ်ထားလိုက်တယ်။ အိမ်မှာအသင့်ရှိနေတဲ့ ကြက်သွန်နီဥသေးလေးရယ်၊ ကြက်သွန်ဖြူရယ် ငရုတ်သီးစိမ်းရယ်ကိုတော့မီးအုံးထားလိုက်တယ် အမေ၀ယ်လာတဲ့ ဗမာကြက်ကို အနေတော်လေးတွေတုံး။ ဆား ကြက်သားမှုန့်၊ ပုဇွန်ငံပြာရည်လေးနဲ့နယ်ပြီး ခဏနှပ်ထား။ ပြီးရင် ခုနထောင်းထားတဲ့ ဇီယာငရုတ်သီးခွဲခြမ်းမှုန့်နဲ့ ကြက်သွန်ဖြူနီထောင်းထားတာကို နနွင်းမှုန့်လေးထည့်ပြီး ဆီသတ်။ ကျက်လို့မွှေးလာရင် ခုနကနှပ်ထားတဲ့ကြက်သားကိုထည့်ပြီးလုံး။ ရေခမ်းအောင်ခပ်နာနာလေးလုံးပေး။ လုံးရေခမ်းရင် လှီးထားတဲ့ဘူးသီးလေးပုံတစ်ပုံလောက်ပါတစ်ခါတည်းထည့်လုံး။ ရေထည့်ပြီး နူးအောင်တည်ထား။ ဒါမှကြက်သားနူးရင်ထည့်လုံးထားတဲ့ ဘူးသီးလည်းအရည်ပျော်သင့်သလောက်ပျော်ပြီး ဟင်းရည်ကပိုချိုမှာလေ။ ကြက်သားနူးခါနီးကျမှ ကျန်တဲ့ဘူးသီးထည့်။ ကြက်သားလည်းနူး ဘူးသီးလည်းနူးပေါ့။ အရသာမြည်းကြည့်လို့ အဆင်ပြေတယ်ဆိုရင် နံနံပင်နဲ့မဆလာလေးအုပ်လိုက်။ ဒါဆိုရင် ကြက်သားဘူးသီးကာလသားချက်ဟင်းတစ်ခွက်ရပြီပေါ့။ 

အုန်းနို့ဆန်ပြုတ်
ဆန်သုံးချိုး၊ ကောက်ညှင်းတစ်ချိုးကိုရောပြီးရေစင်စင်ဆေး။ ရေစစ်ပြီးတော့ ဆီလေးနည်းနည်းနဲ့ အရင် ဆီပူထိုး။ ပြီးမှရေထည့်။ မီးပြင်းပြင်းလေးနဲ့နူးအောင်တည်။ မယ်တော်မားသားပြန်လာလို့ အုန်းနို့ညှစ်တာ ပါလာမှ ရေအစားအုန်းနို့ထည့်ပြီး မီးအေးအေးနဲ့နူးအောင်ဆက်တည်။ နူးခါနီးကျမှ သာကူရေဆေး ထားတာ ထည့်။ ဆားလေးနည်းနည်းထည့်လိုက်ရုံပါပဲ။ ပြီးတော့ မယ်တော်မားသားဝယ်လာတဲ့ အီကြာကွေးလေးညှပ် ထည့်ပြီး သောက်မယ်ပေါ့နော်။ နေ့လယ်စာထမင်းစားပြီးတော့လည်း အချိုပြန်တည်းလို့ရတာပေါ့။ မနက်စာအုန်းနို့ဆန်ပြုတ်လေးသောက်ပြီးတော့ ချက်ရေးပြုတ်ရေးလေးစကြစို့။

ချဉ်စော်ကားသီးထောင်း
ချဉ်စော်ကားသီးထဲထည့်မယ့် ပုဇွန်လေးတွေကိုတော့ အခွံခွာပြီးခြောက်အောင်လှော်ထားလိုက်တယ်။ စိမ်းစားငါးပိလေးသင့်ရုံလောက်ကိုလည်း မီးလေးပြပြီး မွှေးအောင်လုပ်ထားလိုက်တယ်။ အရင်ဆုံး ရေဆေးပြီးရေစစ်။ ခပ်ပါးပါးလှီးထားတဲ့ရှမ်းနံနံနဲ့ ပင်စိမ်းကိုထည့်ထောင်းမယ်။ ပြီးမှ မီးအုံးထားတဲ့ ငရုတ်သီးစိမ်း၊ ကြက်သွန်ဖြူ၊ နီ မီးပြထားတဲ့စိမ်းစားငါးပိကို အစဉ်လိုက်ထည့်ထောင်းမယ်။ နောက်ဆုံးမှ ချဉ်စော်ကားသီးကို ထည့်ထောင်းမယ်။ ဘာဖြစ်လို့လည်းဆိုတော့ ချဉ်စော်ကားသီးက အရည်ထွက်တော့ သူ့ကိုအရင် ထည့်ထောင်းရင် အရည်တွေစင်ပြီးထောင်းလို့မကောင်းလို့ပါ။ 

ဒါဆိုရင်တော့ ချဉ်စော်ကားသီးအရသာချဉ်ချဉ်လေးရယ် ပုဇွန်လှော်အရသာချိုချိုလေးရယ်၊ ငရုတ်သီးစိမ်းအရသာစပ်စပ်လေးရယ်၊ စိမ်းစားငါးပိကချိုငံအရသာရယ်၊ ပင်စိမ်းနဲ့ရှမ်းနံနံရဲ့ မွှေးတဲ့အနံ့လေးရယ်ပေါင်းထားတဲ့ ချဉ်စော်ကားသီးထောင်းလေးရပြီပေါ့။ ကြက်သားဘူးသီးကာလသားချက်လေးကို သောက်လည်းသောက် ဆမ်းလည်းဆမ်းစား။ ချဉ်စော်ကားသီးထောင်းလေးကိုမြုံ့စားလို့ကောင်းမှကောင်းပဲဆွေမျိုးတို့ရေ။ နောက်တစ်ပတ်မှ နောက်တစ်မျိုးထပ်ချက်ကြတာပေါ့။
Royal
--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment Journal မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

#အပတ်စဉ်စနေနေ့တိုင်းထွက်ပြီ #စိတ်ရွှင်လန်းဖို့စာဖတ်စို့
#Weekly #Saturday #ရှိတ်ပ်

Share on Google Plus

0 comments:

Post a Comment