အပြောင်မြောက်ဆုံးလက်ရာတစ်ခု

DUNKIRK

အပြောင်မြောက်ဆုံးလက်ရာတစ်ခု

အဆင့်သတ်မှတ်ချက် - ၄/၅

သရုပ်ဆောင်များ - ၀ှိုက်ဟတ်၊ တွမ်ဂလင်းကာနေး၊ ဂျက်လော်ဒန်၊ ဟယ်ရီစတိုင်၊ ဘားနက်၊ ဂျိမ်းစ်ဒီအာစီ၊ ဘယ်ရီကနော့ဟန်၊ ဘရန်နာ၊ စီလီယံမာဖီ၊ မာ့ခ်ရိုင်လန့်စ်၊ တွမ်ဟာဒီ

ဒါရိုက်တာ - ခရစ္စတိုဖာနိုလန်

ဘာကောင်းလဲ - ဇာတ်ညွှန်း၊ တင်ပြပုံ၊ စွမ်းဆောင်ရည်၊ ရုပ်ရှင်ရိုက်ကူးရေးပညာပိုင်းနဲ့ နောက်ခံသမိုင်းကြောင်းကောင်းမွန်ခြင်း

ဘာဆိုးလဲ - ဒီဇာတ်ကားရဲ့အပြစ်အနာအဆာကို ရှာမတွေ့လောက်တဲ့အထိ ဖြစ်နေပါတယ်။

ကြည့်သင့်သလား - ပထမဆုံးခေါင်းစဉ်က အဆင့်သတ်မှတ်ချက်ကိုကြည့်ပြီးကတည်းက တခုတ်တရစောင့်ကြည့်သင့်သလားဆိုတာ အဖြေပေါ်နေလောက်ပါပြီ။

ဇာတ်လမ်းအကျဉ်း

ဒုတိယကမ္ဘာစစ်အတွင်း ပြင်သစ်နိုင်ငံတောင်ပိုင်းရှိ ဒန်ကတ်ကမ်းခြေမှာ စစ်သားလေးသိန်းဟာ သောင်တင်နေပြီး အချိန်မရွေးအသက်ဆုံးရှုံးရနိုင်တဲ့အဲဒီနေရာကနေစွန့်ခွာနိုင်ဖို့ ကယ်တင်မယ့်အဖွဲ့ကို မျှော်လင့်တကြီးစောင့်ဆိုင်းနေကြပါတယ်။ သူတို့ဟာ ရန်သူတွေရဲ့လေယာဉ်နဲ့ ဗုံးကြဲ တိုက်ခိုက်ခြင်း ဆက်လက်ခံနေရပြီး အသက်ရှင်ဖို့အတွက် ခဲယဉ်းစွာကြိုးစားနေရပါတယ်။ 

အားလုံးက သင်္ဘောထဲမှာ နေရာတစ်နေရာရဖို့ အပန်းတကြီးရှာဖွေနေရပေမယ့် ဒီလောက်များပြားလှတဲ့လူတွေအတွက် လုံလောက်တဲ့သင်္ဘောအရေအတွက်လည်း မရှိပါဘူး။ သေခြင်းတရားက မလွဲဧကန်ရောက်လာတော့မယ့်အချိန် စစ်သားတွေဟာ အသက်ရှင်ဖို့ အာမခံချက်မရှိတော့ပေမယ့် စိတ်ပျက်အားလျှော့ခြင်းမရှိဘဲ အသက်ရှင်ဖို့အတွက် တိုက်ပွဲဝင်ခဲ့ကြပါတယ်။

ဇာတ်ကားသုံးသပ်ချက်- ဇာတ်ညွှန်းကိုလေ့လာခြင်း

ဒီဇာတ်ကားကိုကြည့်နေတဲ့အချိန်မှာ အဲဒီနေရာကိုခရီးထွက်နေတယ်လို့တောင် ခံစားရတဲ့အထိ ဇာတ်ညွှန်းကလုံးဝပြစ်ချက်ရှာမတွေ့ပါဘူး။ ဒီဇာတ်ကားမှာ စကားပြောခန်းတွေ အများကြီးမပါပေမယ့် တိတ်ဆိတ်နေတာကလည်း တစ်ခါတလေ စကားပြောနေသလိုဖြစ်တတ်ပါတယ်။ ပြီးပြည့်စုံတဲ့ဇာတ်ညွှန်းနဲ့ လုံးဝကောင်းမွန်တဲ့သရုပ်ဆောင်ချက်တွေ ပေါင်းစပ်လိုက်တဲ့အခါ ဒီဇာတ်ကားက ဒိုင်ယာလော့ခ်တွေ အများကြီးမလိုတော့ပါဘူး။ ရေထဲနစ်မြုပ်နေတဲ့သင်္ဘောထဲမှာ ယောက်ျားတွေအများကြီးပိတ်မိနေပြီး အဲဒီသင်္ဘောက လူအများစုစွန့်ခွာလိုက်တာနဲ့ရေပေါ်ဆက်လက်မောင်းနှင်နိုင်ဦးမှာဖြစ်ပါတယ်။ ဒီတော့ ဘယ်သူများ ကိုယ့်ကိုယ်ကိုယ်အနစ်နာခံမှာလဲ။ 

ဘယ်သူကများ သေနတ်နဲ့အတေ့ခံပြီး သင်္ဘောပေါ်ကနေခုန်ဆင်းဖို့ အတင်းအကျပ်ဖိအားပေးခံရမှာလဲ။ တွေ့တဲ့ဗြိတိသျှသင်္ဘောကလည်း ပြင်သစ်စစ်သားတွေကိုမတင်တော့ သူတို့ဘယ်လိုရုန်းထွက်ကြမလဲ…စတဲ့လှည့်ကွက်အများအပြားနဲ့ ဇာတ်ညွှန်းက ဟာကွက်မရှိကောင်းလွန်းပါတယ်။ ဒုတိယကမ္ဘာစစ်မီး ဟုန်းဟုန်းတောက်နေချိန် အကူအညီမဲ့နေတဲ့စစ်သားတွေကတော့ အသက်ဆက်လက်ရှင်သန်နိုင်ဖို့ အားစိုက်ရုန်းကန်နေရပါတယ်။ သူတို့ထဲက ဘယ်လောက်များ ဆက်လက်အသက်ရှင်သန်နိုင်မှာလဲ။ ဒုတိယကမ္ဘာစစ်ကြီးပြီးဆုံးသွားချိန်မှာ ဘယ်လောက်များအသက်ဘေးကနေလွတ်မြောက်နိုင်မှာလဲဆိုတာကတော့ ဒီဇာတ်ကားရဲ့လှည့်ကွက်တွေပါပဲ။

ဇာတ်ကားသုံးသပ်ချက် - ကြယ်ပွင့်တွေရဲ့စွမ်းဆောင်ရည်

ဒီဇာတ်ကားမှာပါဝင်သရုပ်ဆောင်သူအားလုံးက သူ့နေရာနဲ့သူ အကောင်းဆုံးသရုပ်ဆောင်နိုင်ခဲ့ပါတယ်။ ဒီဇာတ်ကားမှာ  ဗြိတိန်လူငယ်အဆိုတော်အဖွဲ့ One Direction အဖွဲ့ဝင် ဟယ်ရီစတိုင်ကလည်း သူ့ရဲ့ပထမဆုံးဟောလိဝုဒ်ဇာတ်ကားအဖြစ် ပါဝင်သရုပ်ဆောင်ထားပါတယ်။

ဇာတ်ကားသုံးသပ်ချက် - ဒါရိုက်တာပိုင်းနဲ့ ဂီတပိုင်းကိုလေ့လာခြင်း

ဒါရိုက်တာပိုင်းနဲ့ပတ်သက်လို့ သိပ်ကောင်းတယ်လို့ပဲပြောပါရစေ။ စစ်ကားဆိုမပြတ်တမ်းကြည့်ရှုသူတွေအတွက်တော့ အခုပဲပြေးကြည့်သင့်တဲ့ဇာတ်ကားကောင်းဖြစ်ပြီး နောက်ဆုံး ကိုယ်ကစစ်ကားတွေကို လူတွေတစ်ဖြုတ်ဖြုတ်သေနေတဲ့ဇာတ်ကားအဖြစ်သတ်မှတ်ရင်တောင်မှ ဒီဇာတ်ကားကိုကြည့်ပြီး စစ်ကားကြိုက်သူများစာရင်းဝင်သွားနိုင်ပါတယ်။ အပြောင်မြောက်ဆုံးလက်ရာလို့တောင် ဆိုနိုင်ပါတယ်။ ဂီတပိုင်းနဲ့ပတ်သက်လို့ပြောရရင်လည်း နားကွဲလုမတတ်ကြားရတဲ့သေနတ်ပစ်သံတွေ၊ ဗုံးကြဲတာတွေကို ဒီဇာတ်ကားမှာကြားရမှာမဟုတ်ဘဲ ကင်မရာရိုက်ချက်တွေကလည်း အနီးကပ်ရိုက်ချက်၊ အပေါ်ပိုင်းရိုက်ချက်တွေနဲ့အတူ ရွေ့လျားရိုက်ချက်တွေကလည်း အံ့မခန်းပါပဲ။

ဇွဲထူးမြတ်လွင်

--------------------------------------------------------

ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment Journal မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

#အပတ်စဉ်စနေနေ့တိုင်းထွက်ပြီ #စိတ်ရွှင်လန်းဖို့စာဖတ်စို့
#Weekly #Saturday #ရှိတ်ပ်

 

Share on Google Plus