ဖိနပ်လေးတစ်ရံ










ဖိနပ်စီးတိုင်းအမြဲလိုလိုဖိနပ်ဆိုဒ်နံပါတ် ၃၈ ပဲစီးလေ့ရှိတဲ့ကျွန်မဟာ တစ်နေ့တော့ဈေးပတ်ရင်း ဆိုင်တစ်ခုမှာ ဖိနပ်တစ်ရံတွေ့လိုက်တော့ အရမ်းကြိုက်သွားပါတယ်။ ကျွန်မကြိုက်တဲ့ဒေါက်မနိမ့်မမြင့်လေးရယ်၊ အရောင်ဆန်းဆန်းလေးနဲ့ ဒီဇိုင်းထွင်ထားတဲ့ ကြိုးသိုင်းဒေါက်ဖိနပ်လေးကိုကိုင်ကြည့်ရင်း လက်ထဲကမချချင်လောက်အောင်ကိုဖြစ်သွားခဲ့ပါတယ်။ ဘယ်လိုပဲဖြစ်ဖြစ် ၀ယ်လိုက်မယ်လို့စိတ်ပိုင်းဖြတ်ပြီး ဆိုင်က၀န်ထမ်းလေးတစ်ယောက်ကို ကိုယ်ဝတ်နေကျဖြစ်တဲ့ ဆိုဒ်နံပါတ် ၃၈ ရှာခိုင်းလိုက်ပါတယ်။ ကံဆိုးချင်တော့ ကိုယ့်လက်ထဲကိုင်ထား တဲ့ဖိနပ်လေးက ဆိုင်မှာကျန်နေတဲ့ တစ်ရံတည်းသောနံပါတ် ၃၇ ဖြစ်နေပါတယ်။ အခြားဆိုဒ်တွေအကုန်လုံးကရောင်းလို့ကုန်ပါပြီတဲ့။ 

စိတ်ထဲမှာလည်းဒီဖိနပ်လေးကိုအရမ်းလိုချင်မိပေမယ့် ကိုယ်နဲ့သေးနေတဲ့ဆိုဒ်ဆိုတော့ အဆင်မပြေဘူးဆိုပြီး စင်ပေါ်ပြန်တင်လိုက်မိပါတယ်။ ဒါပေမဲ့ ဆိုင်က၀န်ထမ်းကောင်မလေးက အစ်မရယ် တဖြည်းဖြည်းစီးရင်းနဲ့ချောင်သွားတဲ့အခါတော်သွားမှာပေါ့ဆိုတဲ့စကားလေးကြောင့် နဂိုကတည်းကလည်း ဒီဖိနပ်လေးကိုအရမ်းကြိုက်ပြီး  အရမ်းလိုချင်နေတဲ့ကျွန်မ ဘာမှထပ်မစဉ်းစားတော့ဘဲဝယ်လာလိုက်ပါတယ်။ ဖိနပ်လေးစစီးခါစ ပထမအပတ်မှာဒီဖိနပ်လေးရဲ့ဒဏ်ကို တော်တော်ခံလိုက်ရပါတယ်။ ဖိနပ်ဆိုဒ်ကနည်းနည်းသေးတော့ စီးရင်းနဲ့ခြေသိုင်းကြိုးနားလေးတွေမှာပွန်းပဲ့ဒဏ်ရာလေးတွေနဲ့ ရေကြည်ဖုလေးတွေထလာပါတယ်။ 

လမ်းလျှောက်တိုင်းနာနေပေမယ့် ကိုယ်အရမ်းကြိုက်တဲ့ဖိနပ်လေးကလည်းဖြစ်ပြန် သူငယ်ချင်းတွေက အရမ်းလိုက်တာပဲ၊ လှလိုက်တာဆိုတဲ့ စကားလေးတွေက ကျွန်မရဲ့ခြေထောက်အနာတွေနာနေတဲ့အရှိန်လေးတောင်မေ့ပျောက်စေနိုင်ရလောက်အောင်ကို ဒီဖိနပ်လေးတွေကစွမ်းဆောင်နိုင်ခဲ့ပါတယ်။
ဒုတိယအပတ်လောက်မှာ ဖိနပ်စီးပြီးလမ်းလျှောက်တဲ့အခါ သိပ်မနာတော့ပေမယ့် လမ်းလျှောက်ရတာအဆင်အပြေကြီးမဟုတ်သေးပါဘူး။ နည်းနည်းကျပ်နေတဲ့အတွက် လိုရာခရီးရောက်ဖို့ ပိုပြီးကြန့်ကြာနေသလိုခံစားရပါတယ်။ ကြိုက်နေတော့လည်းစီးဖြစ်နေပေမယ့် နေ့တိုင်းနီးပါးတော့မစီးဖြစ်တော့ပါဘူး။ 

တစ်လလောက်အကြာမှာတော့ ပွန်းပဲ့တာလည်းမရှိတော့သလို ရေကြည်ဖုလည်းမထတော့ပါဘူး။ အရင်ကနာခဲ့တဲ့နေရာလေးတွေမှာ အသားမာလေးတွေဖြစ်ကုန်တော့ တော်တော် တော်ရုံနဲ့လည်းမနာတော့ပါဘူး။ တစ်ရက်အပြင်သွားဖို့အ၀တ်အစားတွေဝတ်ပြီးတဲ့အခါ ဖိနပ်ဘီဒိုလေးကိုဖွင့်ကြည့်ရင်း အရမ်းကြိုက်တဲ့ နံပါတ် ၃၇ ကိုထုတ်စီးဖို့ပြင်လိုက်တဲ့အခါ ဖိနပ်လေးကိုကြည့်လိုက်တော့ ၀ယ်ခါစလောက်အရောင်အသွေးမတောက်တော့တာကိုတွေ့လိုက်ရပါတယ်။ ကြိုးသိုင်းကြိုးတွေကလည်း ဘေးကိုအနည်းငယ်ကားထွက်နေပြီးပုံနည်းနည်းပျက်နေပါပြီ။ 

သဲကြိုးတွေမှာဆိုလည်း ဆိုဒ်မတော်ဘဲအတင်းသွပ်သွင်းစီးထားရလို့ အတင်းဆွဲဆန့်ထားသလိုဖြစ်ပြီး သားရေတွေကလည်း အက်ကွဲကြောင်းတွေလည်းနည်းနည်းပေါ်လာပါပြီ။ ဖိနပ်လေးကိုကိုင်ထားရင်း တစ်လကျော်ကျော်လောက် ဒီဖိနပ်စီးရင်းခံလိုက်ရတဲ့ ဒုက္ခတွေကိုပြန်တွေးမိလိုက်တဲ့အခါ ရင်ထဲမှာတောင်စို့သွားရပါတယ်။ အရမ်းကြိုက်လို့ မတော်ပေမယ့်ခြေထောက်အနာခံပြီးစီးခဲ့တာ အခုတော့ဒီဖိနပ်လေးက ပျက်စီးစပြုနေပါပြီ။ 

ကိုယ့်ရဲ့ဆိုဒ်အမှန်ကိုရခဲ့ရင်တော့ ဖိနပ်ကဒီလောက်အထိပျက်စီးမြန်မှာမဟုတ်သလို ဒီဖိနပ်လေးနဲ့အံဝင်ခွင်ကျဖြစ်တဲ့သူဝယ်သွားခဲ့ရင်လည်း ဒီဖိနပ်လေးဟာဒီလိုဖြစ်မှာမဟုတ်လောက်ဘူးလို့တွေးမိပြီး စိတ်မကောင်းလည်းဖြစ်ရပါတယ်။ တခြားနံပါတ် ၃၈ က အခုနံပါတ် ၃၇ လောက်မလှပေမယ့် ကိုယ့်ရဲ့ခြေ ထောက်တွေကို နာကျင်ထိခိုက်စေမှာမဟုတ်သလို ကိုယ်သွားမယ့်လမ်းခရီးကိုလည်း ပိုမြန်ဆန်စွာသွားရအောင်အထောက်အကူပြုမှာပါပဲ။ 

ဖိနပ်လေးကိုဘီဒိုထဲအသာပြန်ထည့်ရင်း နောက်ကိုဖိနပ်ဝယ်မယ်ဆိုရင် ဘယ်လောက်ပဲလှနေပါစေ ကိုယ့်ခြေထောက်နဲ့မတော်ဘူးဆိုရင် ဘယ်တော့မှမ၀ယ်တော့ဘူးလို့ဆုံး ဖြတ်ချက်ချလိုက်ပါတယ်။ ဒီနံပါတ် ၃၇ ဆိုဒ်ဖိနပ်လေးကနေရလိုက်တဲ့ သင်ခန်းစာလေးဟာ ကျွန်မကိုဖိနပ်ရွေးချယ်တဲ့နေရာတင်မက အခြားနေရာတွေအတွက်ပါ အများကြီးအတွေးတွေပေါက်လာစေခဲ့ပါတယ်။
တစ်ခါတလေမှာ ကျွန်မရဲ့လူမှုလောကမှာကြုံတွေ့နေရတဲ့ ကိစ္စတွေမှာလည်းဒီအတိုင်းပါပဲ။ 

ကြိုက်တာကကြိုက်တာပဲ ဒါပေမဲ့ ကိုယ်နဲ့ကိုက်ညီသင့်တော်မှုရှိမရှိကိုတော့ အပြင်ပန်းလေ့လာလောက်ရုံနဲ့မပြီးသေးပါဘူး။ ကြိုက်လွန်းလို့ရွေးချယ်ပြီးမှ နှစ်ဦးနှစ်ဖက်အထိနာကျတဲ့ အဖြစ်မျိုးလေးတွေလည်းရှိနိုင်တာကိုပါ ဒီဖိနပ်လေးကိုအကြောင်းပြုပြီး တစ်ခါတည်းသဘောပေါက်စေခဲ့ပါတယ်။ ကိုယ်သွားရာလမ်းမှာ ဖြောင့်ဖြောင့်ဖြူးဖြူး၊ မနာမကျင်သွားနိုင်ဖို့ ကိုက်ညီတဲ့ဖိနပ်လေးကိုရှာနိုင်သလို ကိုယ့်ဘ၀ကြီးတစ်လျှောက်အေးချမ်းသာယာစွာလျှောက်လှမ်းနိုင်ဖို့အတွက်လည်း ကိုယ်နဲ့ကိုက်ညီတဲ့လက်တွဲဖော်တစ်ယောက်ကိုမှန်ကန်စွာ ရွေးချယ်တတ်ဖို့လိုပါသေးတယ်။ ဖိနပ်လေးကတော့ဖိနပ်လေးပါပဲ။ ဒီကနေယူတတ်မယ်ဆိုရင် ထိုက်တန်တဲ့သင်ခန်းစာတစ်ခုတော့ရလိုက်မှာပါပဲ။
မာမာရင် (မနုဿရဲ့ စာမျက်နှာလေးများ)
--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment Journal မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

#အပတ်စဉ်စနေနေ့တိုင်းထွက်ပြီ #စိတ်ရွှင်လန်းဖို့စာဖတ်စို့
#Weekly #Saturday #ရှိတ်ပ်
 
Share on Google Plus

0 comments:

Post a Comment