နံနက်ခင်းတိုင်းမှာကြည်ကြည်လင်လင်နိုးထဖို့ဆိုရင်






ညတစ်ညမှာ ကောင်းမွန်စွာအိပ်စက်အနားယူဖို့က အရေးကြီးဆုံးဆိုတာလူတိုင်းသိပြီးသားပါ။ ဒါပေမဲ့ မအိပ်ခင်အချိန်လေးကရော ဘယ်လောက်အရေးကြီးတယ်ဆိုတာသိပါသလား။ မအိပ်ခင်အချိန်လေးမှာ ဘာတွေလုပ်နေခဲ့ပါသလဲ။ မအိပ်ခင်အချိန်ခဏတာလေးအတွင်း ကိုယ့်ရဲ့လုပ်ကိုင်မှုတွေက ကောင်းမွန်စွာအိပ်စက်သွားပေမယ့်ညတစ်ညနဲ့ ဟိုလှိမ့်သည်လှိမ့်လူးလွန့်ပြီးအိပ်မပျော်စေတဲ့ညတစ်ညအဖြစ် ကွဲပြားသွားစေပါလိမ့်မယ်။ အဲဒီတော့ကောင်းမွန်စွာအိပ်စက်အနားယူချင်ပါသလား။ နိုးထလာတဲ့နံနက်ခင်းတိုင်းမှာ ကြည်ကြည်လင်လင်နဲ့နိုးထချင်ပါသလား။ ဒါလေးတွေလုပ်ကြည့်ကြရအောင်။
အနားယူပါ
အိပ်စက်တာကလည်းအနားယူတာပါပဲ။ ဒါပေမယ့် အိပ်ရာမ၀င်ခင်အချိန်အခိုက်အတန့်လေးမှာအနားယူတာက ပိုပြီးနှစ်ခြိုက်စွာအိပ်ပျော်စေပါတယ်။ တစ်ချို့တွေက ရေခပ်နွေးနွေးနဲ့ရေချိုးပြီး အကြောလျော့ကြတယ်။ တစ်ချို့က သစ်သီးဖျော်ရည်လေးတစ်ခုခုသောက်ကြတယ်။ ဒီလိုကိုယ်နှစ်သက်တာလေးတွေလုပ်ပေးတာက စိတ်နဲ့ခန္ဓာကိုယ်ကို လုံးဝအနားယူဖို့အဆင်သင့်ဖြစ်နေစေပါတယ်။
ဖုန်း၊ အင်တာနက်တွေအနားပေးလိုက်ပါ
နံနက်ခင်းမှာပျော်ပျော်ရွှင်ရွှင်နဲ့နိုးထတတ်သူအားလုံး နေ့တစ်နေ့ကိုဘယ်လိုအဆုံးသတ်ရမယ်ဆိုတာသိကြပါတယ်။ အဲဒါကတော့ ကွန်ပျူတာ၊ အင်တာနက်၊ ဂိမ်း စတာတွေပိတ်လိုက်ဖို့ပါပဲ။ ညအိပ်ရာဝင်ခါနီးမှာမပိတ်ဘူးဆိုရင် တစ်ညလုံးအင်တာနက်သုံးပြီး အချိန်ကုန်သွားမှာပေါ့။ ညဘက်အိပ်ရေးပျက်တော့ နံနက်ခင်းမှာ စိတ်ကမရွှင်ပျဘူးဖြစ်သွားတာပေါ့။
လမ်းလျှောက်ပေးပါ
ထိုင်ပြီး Social Media တွေ၊ Email တွေပြန်တာနဲ့ ညအိပ်ရာမ၀င်ခင်ကိုအချိန်ကုန်ဆုံးနေမှာလား။ အဲဒီလိုအချိန်လေးမှာ လမ်းလေးလျှောက်ပေးပါ။ လမ်းလျှောက်တာက ကျန်းမာရေးအတွက်ကောင်းသလို စိတ်ကိုလည်းကြည်လင်စေပါတယ်။ စိတ်ကြည်လင်တဲ့အတွက် ညဘက်အိပ်ရတဲ့အခါ ပိုပြီးအထောက်အကူဖြစ်စေပါလိမ့်မယ်။
စာရေးပါ
ပျော်ရွှင်နေတဲ့လူတိုင်းက သူတို့ကိုကြောက်ရွံ့စေတဲ့အရာတွေ၊ စိတ်အနှောင့်အယှက်ဖြစ်စေတဲ့အရာတွေကိုသိကြပါတယ်။ အဲဒီတော့ညအိပ်ရာဝင်ကာနီးအချိန်မှာ ကိုယ့်စိတ်ကိုဒုက္ခပေးပြီးအိပ်မှာလား။ တစ်နေ့လုံးဖြစ်ပျက်ခဲ့သမျှထဲကမှ ကိုယ့်စိတ်ကိုအနှောင့်အယှက်ပေးမယ့်အရာလေးတွေကို လေ့လာဆန်းစစ်ကြည့်ပါ။ ပြီးမှ မှတ်စုစာအုပ်ထဲမှာရေးချထားလိုက်ပါ။ စိတ်ရှင်းသွားပါလိမ့်မယ်။
ခွင့်လွှင့်ပါ
ကိုယ့်ကိုထိခိုက်စေတဲ့သူတွေကို စာထဲကနေပြီးမှတ်ထားရုံနဲ့ပြီးမှာလား။ တကယ်တော့ စာထဲသာရောက်သွားပေမယ့် စိတ်ထဲမှာတစ်ပိုင်းတစ်စထင်ကျန်နေပါလိမ့်ဦးမယ်။ အဲဒါကြောင့် သူတို့ဘာကြောင့်ကိုယ့်ကိုစိတ်ထိခိုက်တော့လည်း မျှမျှတတတဖန်သုံးသပ်ပါ။ ကိုယ့်ကိုထိခိုက်နစ်နာလာသူတွေကိုလည်း ခွင့်လွှတ်တတ်ပါစေ။
တရားထိုင်ပါ
တစ်ချို့တွေက ညအိပ်ရာမ၀င်ခင်တရားထိုင်ကြပါတယ်။ ဒါလည်းပိုပြီးကောင်းတဲ့အလေ့အကျင့်တစ်ခုပါ။ တရားထိုင်ခြင်းက စိတ်ဖိစီးမှုတွေ၊ စိတ်ကျဝေဒနာ၊ နျှလုံးရောဂါစတာတွေကိုလည်း လျော့နည်းစေနိုင်ပါတယ်။ စိတ်ကိုရှင်းလင်းစေပြီး အတွေးတွေကိုလည်းတည်ငြိမ်စေတဲ့အတွက် ညဘက်အိပ်စက်ရတာကိုပိုပြီးအထောက်အကူဖြစ်စေပါလိမ့်မယ်။
ဆန်းစစ်ပါ
ညဘက်အိပ်ရာဝင်ကာနီးအချိန်က တစ်နေ့တာလုံးလုပ်ခဲ့သမျှတွေကို ရောင်ပြန်ဟပ်စေမယ့်အချိန်ဖြစ်ပါတယ်။ တစ်နေ့လုံးကိုယ်လုပ်ခဲ့တဲ့အမှားအမှန်တွေကိုပြန်ပြီးဆန်းစစ်ကြည့်ပါ။ ဒီလိုလုပ်ပေးတာက ကိုယ့်ကိုယ်ကိုယ်၊ ကိုယ့်လုပ်ရပ်တွေကိုပိုပြီးနားလည်လာစေသလို အိပ်ရာဝင်ကာနီးစိတ်ချမ်းချမ်းသာသာ စိတ်ရှင်းရှင်းနဲ့အနားယူနိုင်မှာပါ။
ကျေးဇူးတင်တတ်ပါစေ
ပျော်ရွှင်တတ်တဲ့လူတွေက သူတို့မှာရှိတာလေးနဲ့ကျေးဇူးတင်တတ်သူတွေဖြစ်ကြပါတယ်။ အဲဒီတော့ ညအိပ်ရာမ၀င်ခင်မှာ မျက်လုံးမှိတ်၊ လဲလျောင်းပြီး ဒီနေ့တစ်နေ့တာအတွက် အဖြစ်အပျက်လေးတွေကိုကျေးဇူးတင်ကြည့်ပါ။
အိပ်ခန်းဆိုတာ
အိပ်ခန်းဆိုတာတော့ အိပ်ဖို့ပဲပေါ့။ အိပ်ရာကနွေးထွေးမှုရှိရမယ်။ သက်သောင့်သက်သာဖြစ်ရမယ်။ ပြီးတော့ မီးရောင်ကလည်းမျက်လုံးကိုအနှောင့်အယှက်မပေးနိုင်မယ့်အရောင်တွေဖြစ်ဖို့လိုပါတယ်။ ဒါမှလည်းအိပ်ရတာအနှောင့်အယှက်ကင်းကင်းနဲ့အိပ်ပျော်စေနိုင်မှာမဟုတ်ပါလား။
ရန်နိုင်

--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment Journal မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

#အပတ်စဉ်စနေနေ့တိုင်းထွက်ပြီ #စိတ်ရွှင်လန်းဖို့စာဖတ်စို့
#Weekly #Saturday #ရှိတ်ပ်
 

Share on Google Plus

0 comments:

Post a Comment