လိပ်ပြာသန့်သန့်သိက္ခာရှိရှိ အလုပ်ထွက်နိုင်ဖို့ဆိုရင်…

လုပ်ငန်းခွင်တစ်ခုထဲကိုဝင်ရောက်ဖို့ ကိုယ့်ဘက်ကအင်တာဗျူး၊ ကိုယ့်အရည်အချင်းအတွက် ကြိုတင်ပြင်ဆင်မှုတွေလုပ်ကြရသလို အဲဒီလုပ်ငန်းကနေထွက်ခွာတော့မယ်ဆိုရင်လည်း ကြိုတင်ပြင်ဆင်မှုလေးတွေလုပ်ဖို့မကောင်းဘူးလား။ ဒီအချက်က လူအများစုစိတ်ထဲသတိထားမိနေပါလျက်နဲ့ လျစ်လျူရှုမိနေကြတဲ့အရာတစ်ခုပါ။ ဒီလုပ်ငန်းကခုချက်ချင်းထွက် ခုချက်ချင်းအဆတ်ပြတ်ပြီဆိုပြီး ခပ်လွယ်လွယ်တွေးမိတတ်ကြပါတယ်။ တကယ်ရော ပြီးပြန်သွားတာသေချာပါရဲ့လား။ လုပ်ငန်းခွင်ဝင်ဖို့အင်တာဗျူးအဆင့်ဆင့်ဖြတ်သန်းပြီးမှဝင်ကြသလို လုပ်ငန်းခွင်ကနေထွက်မယ်ဆိုရင်လည်း တစ်ယောက်နဲ့တစ်ယောက်နားလည်မှုအပြည့်နဲ့ မေးခွန်းလေးတွေအမေးအဖြေက ယဉ်ကျေးမှုမဟုတ်ပါလား။ ဒီအလုပ်ကထွက်ပြီး နောက်အလုပ်ပြောင်းမယ်…။ ကောင်းပြီ။ နောက်လုပ်ငန်းခွင်ဝင်တဲ့အခါ “လုပ်ငန်းအတွေ့အကြုံ” ဆိုတာနဲ့အတူ ''ဘာကြောင့်အလုပ်ထွက်လာတယ်'' ဆိုတဲ့မေးခွန်းပါလာမယ်မဟုတ်ပါလား။ အဲဒီလိုအချိန်မျိုးမှာ ကိုယ်အလုပ်ထွက်လာခဲ့တဲ့အကြောင်းကို လိပ်ပြာသန့်သန့် သိက္ခာရှိရှိနဲ့ပြန်ပြောပြနိုင်ဖို့ မလိုအပ်ဖူးလား။ အဲဒီတော့ လုပ်ငန်းတစ်ခုကနေထွက်လာတဲ့အခါ ဘာတွေလိုအပ်သလဲ၊ ဘာတွေလုပ်ကြမလဲ။

အထက်လူကြီးကိုအကြောင်းကြား

လုပ်ငန်းခွင်တစ်ခုတည်းမှာ ကိုယ်လုပ်တဲ့နေရာ၊ ကိုယ်တာဝန်ယူထားတဲ့ရာထူးက ကိုယ့်ရဲ့ဂုဏ်သတင်းပါ။ လုပ်ငန်းတစ်ခုကနေထွက်တော့မယ်ဆို ကိုယ့်အထက်လူကြီးကို လူချင်းတွေ့ပြီးပြောတာမကောင်းဘူးလား။ ဘာကြောင့်လဲ ကိုယ့်အတွက်ထင်မြင်ချက်ကောင်းဖြစ်စေပါတယ်။ လူကိုယ်တိုင်တွေ့ပြီးပြောတဲ့အတွက် ကိုယ်ကိုယ်ကိုယ်ယုံကြည်မှု၊ ကိုယ့်ပေါင်းသင်းဆက်ဆံရေးအရည်အချင်းကို ပြသပေးရာရောက်ပါတယ်။

ကြိုတင်အသိပေး

“အလုပ်ထွက်မယ်ဆိုရင် သုံးလ၊ (၂)ပတ် ကြိုတင်အသိပေးပါ” ဆိုတဲ့ ကုမ္ပဏီစည်းကမ်းချက်တွေက တာဝန်မယူတဲ့သူတွေအဖို့တော့ စာရွက်ထဲကစကားလုံးမျှသာ၊ ဘာကြောင့်ကြိုတင်အသိပေးသင့်သလဲ။ လစ်လပ်သွားမယ့်ကိုယ့်နေရာအတွက် အစားထိုးမယ့်သူ၊ ကိုယ့်တာဝန်တွေကိုလွဲပြောင်းပေးရမယ့်လူရှာဖို့ လိုအပ်တယ်မဟုတ်ပါလား။ အလျင်စလိုအလုပ်ထွက်ချင်နေတဲ့ ကိုယ့်အတွက်ကတော့ စိတ်ရှုပ်စရာကောင်းပေမယ့် ကိုယ်လက်လွတ်စပယ်ပစ်ထားခဲ့တဲ့တာဝန်တွေက တခြားလုပ်ဖော်ကိုင်ဖက်တွေနဲ့ ကုမ္ပဏီအတွက်ထိခိုက်နစ်နာစရာတွေဖြစ်လာမယ်မဟုတ်ပါလား။

အလုပ်ထွက်ရတဲ့အကြောင်းပြောဖို့

အိမ်တွင်းရေးအဆင်မပြေလို့၊ လုပ်ငန်းခွင်ဆက်ဆံရေးအဆင်မပြေလို့ဖြစ်စေ၊ ဘာအကြောင်းကြောင့်ဖြစ်စေ၊ ခရေစေ့တွင်းကျရှင်းပြပြောဆိုနေစရာတော့မလိုလှပါဘူး။ ကိုယ့်ဘက်ကတတ်နိုင်သလောက်သာပြောပြနိုင်ပါတယ်။

ခံစားချက်တွေထိန်းချုပ်

အထက်လူကြီးနဲ့အဆင်မပြေလို့ အလုပ်ထွက်တဲ့အခါ အဲဒီအကြောင်းကိုလိုက်ဖွနေမှာလား။ ဒါကကိုယ့်ပင်ကိုယ်စရိုက်ကိုဖော်ပြနေပါလိမ့်မယ်။ နောက်ထပ်လုပ်ငန်းခွင်အသစ်အတွက် သူ့ရဲ့ထောက်ခံချက်မလိုအပ်ပါဘူးလို့ အာမခံနိုင်ပါ့မလား။

ကိုယ်လွတ်မရုန်းနဲ့

ကိုယ့်အတွက်ကလည်းလုပ်ငန်းအသစ်စဖို့ အစပျိုးနေပြီ။ ဒီဘက်မှာကလည်း လုပ်ငန်းက အဆက်မပြတ်သေးဘဲ ကျန်နေသေးတယ်။ ကုမ္ပဏီကလည်း ကိုယ့်ကိုလိုအပ်နေသေးတယ်။ ကိုယ်လွတ်ရုန်းထွက်မှာလား။ လုပ်ငန်း Project ပြီးတဲ့အထိ ဆက်နေပေးမှာလား။ ဆုံးဖြတ်ချက်က ကိုယ့်ရဲ့ကိုယ်ချင်းစာတရားနဲ့ တာဝန်ယူ စိတ်၊ တာဝန်သိစိတ်ပေါ်မှာ မူတည်နေပါတယ်။

လုပ်ဆောင်ချက်ကောင်းကောင်းနဲ့အဆုံးသတ်

First Impression ဆိုတာ လူတစ်ယောက်အတွက် အရေးကြီးသလို လုပ်ငန်းခွင်ကထွက်ခါနီး Last Impression ဆိုတာလည်းအရေးကြီးပါတယ်။ ဘယ်လိုချန်ရစ်ခဲ့မလဲ။ ကိုယ်လုပ်ခဲ့တဲ့လုပ်ငန်းစဉ်တွေ၊ ကိုယ်ရယူခဲ့တဲ့အရင်းအမြစ်တွေအားလုံး တတ်နိုင်သလောက် ကိုယ့်ဘက်ကပေးနိုင်သလောက် အစွမ်းကုန်ဝေမျှပေးခဲ့ပါ။

ကျေးဇူးတင်ကြောင်းပြသ

နောက်ဆုံးအနေနဲ့ ကိုယ့်လုပ်ဖော်ကိုင်ဖက်တွေ၊ ကိုယ့်အထက်လူကြီးတွေနဲ့ ကောင်းကောင်းမွန်မွန် အဆင်ပြေပြေနဲ့ လုပ်ကောင်းလုပ်ခဲ့ပါလိမ့်မယ်။ ကိုယ့်ကိုယ်တိုက်ခိုက်သူတွေနဲ့လည်း ကြုံကောင်းကြုံခဲ့နိုင်တယ်။ ကိုယ့်ဘက်ကတုံ့ပြန်ချက်ကတော့ အားလုံးကိုကျေးဇူးတင်တတ်ဖို့ကြိုးစားပါ။ ဝေဖန်တိုက်ခိုက်နေတဲ့လူတွေကြောင့် သည်းခံနိုင်စွမ်းတိုးလာတာမဟုတ်ပါလား။ ကူညီစောင့်ရှောက်ပေးတဲ့လူတွေကြောင့် ဒီထက်ပိုကောင်းတဲ့နေရာကို လျှောက်လှမ်းသွားနိုင်မှာမဟုတ်ပါလား။

ရန်နိုင်

--------------------------------------------------------

ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment Journal မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

#အပတ်စဉ်စနေနေ့တိုင်းထွက်ပြီ #စိတ်ရွှင်လန်းဖို့စာဖတ်စို့
#Weekly #Saturday #ရှိတ်ပ်