နောက်ထပ်ကလေးမယူတော့ဘူးလို့ ကတိပေးလိုက်တယ်…သန္တာလှိုင်











သမီးကိုလက်ထပ်တော့မယ့်အကြောင်းပြောတော့ သူကနောက်ထပ်ကလေးတစ်ယောက် ထပ်မယူရင်ခွင့်ပြုပေးမယ်ဆိုတော့ သူတို့ကိုနောက်ထပ်ကလေးမယူတော့ဘူးလို့ ကတိပေးလိုက်တယ်…သန္တာလှိုင်

မကြာခင်မှာလက်ထပ်တော့မယ့်မော်ဒယ်သန္တာလှိုင်နဲ့တွေ့ဆုံခိုက် သူရဲ့အိမ်ထောင်ရေးအကြောင်းနဲ့ သားသမီးတွေအကြောင်း ပျော်ရွှင်စရာအိမ်ထောင်ရေးအကြောင်းတွေကိုမေးမြန်ခဲ့သမျှတွေကတော့…

အစ်မလက်ထပ်ပွဲကို ဘယ်လိုလုပ်ဖို့စီစဉ်ထားလဲ…
ဒီဝါကျွတ်ရင်လက်ထပ်ဖို့ရည်ရွယ်ထားပါတယ်။ လက်ထပ်ပွဲကို အစ်မတို့အနေနဲ့ကြီးကျယ်ခမ်းနားတဲ့ မင်္ဂလာပွဲလုပ်သွားမှာတော့မဟုတ်ပါဘူး။ ဒီအသက်ရွယ်မှာခမ်းနားတဲ့မင်္ဂလာပွဲလုပ်ဖို့လည်းမလိုအပ်ပါဘူး။ အရင်ကလည်း အစ်မမင်္ဂလာပွဲကိုကြီးကျယ်ခမ်းနားတဲ့ပုံစံမျိုးမလုပ်ခဲ့ဘူး။ အခုကတော့ ရက်ကောင်းရွေးပြီး ရုံးတက်လက်မှတ်ထိုးမင်္ဂလာဆွမ်းကျွေးလောက်ပဲလုပ်မှာပါ။ မိဘတွေရဲ့ခွင့်ပြုချက်လည်းယူပြီပါပြီ။

အစ်မဘာကြောင့်ဒုတိယအိမ်ထောင်ပြုဖို့ဆုံးဖြတ်ခဲ့တာလဲ။
အစ်မတို့တစ်ယောက်ကိုတစ်ယောက်နားလည်းမှုနဲ့တွဲလာခဲ့တာ နှစ်နှစ်ကျော်ပါပြီ။ အဲဒီအချိန်မှာ တစ်ယောက်ကိုတစ်ယောက်လေ့လာခွင့်ရခဲ့တယ်။ ပြီးတော့အစ်မက မြန်မာအမျိုးသမီးတစ်ယောက်အနေနဲ့ အထူးသဖြင့်အနုပညာရှင်တစ်ယောက်အနေနဲ့နှစ်အကြာကြီး လက်မထပ်ဘဲယောက်ျားတစ်ယောက်နဲ့ အတူမတွဲသင့်ဘူးလေ။ ပြီးတော့သူကအစ်မတို့အတွက် တကယ့်လိုအပ်တဲ့သူ အစ်မထက်ငယ်ပေမယ့် မိန်းမတစ်ယောက်အားကိုးလောက်တဲ့သူ၊ ပြီးတော့ အစ်မရဲ့ကလေးတွေနဲ့လည်းအဆင်ပြေတော့ အခုလိုတရားဝင်လက်ထပ်ဖို့ဆုံးဖြတ်လိုက်တာပါ။

အစ်မနောက်အိမ်ထောင်ပြုဖို့ သားသမီးတွေဆီ ကလေးတစ်ယောက်လိုခွင့်တောင်းခဲ့ရတဲ့ အဲဒီအချိန်ကရင်ခုန်စိတ်လှုပ်ရှားမှုကိုပြောပြပေးနိုင်မလား…

အဲဒီအချိန်က အစ်မအတွက်တကယ့်ကို ရင်ဆိုင်ဖို့ခက်ခဲတဲ့အချိန်တစ်ခုပါ။ ဒီလိုပုံစံမျိုးက ၀တ္ထု၊ ရုပ်ရှင်ဗီဒီယိုတွေမှာ မရိုးနိုင်တဲ့ပြကွက်တစ်ခုဖြစ်ပေမယ့် အပြင်မှာတကယ့်လက်တွေ့ရင်ဆိုင်ရချိန်မှာတော့ တကယ့်ကိုမလွယ်တာ။ ဘာကြောင့်လဲဆို အဲဒီအချိန်မှာက ကိုယ်ကကလေးတစ်ယောက် လိုပြန်ဖြစ်ပြီး သားသမီးတွေက လူကြီးတစ်ယောက်လိုဖြစ်နေပြန်ရော။ 

ကိုယ့်မိဘလူကြီးတွေဆီအိမ်ထောင်ပြုဖို့ခွင့်တောင်းရတာမဟုတ်ဘူးလေ။ ကိုယ့်သားသမီးတွေဆီက ခွင့်တောင်းရတာအရမ်းစိတ်လှုပ်ရှားမိတယ်။ သမီးကိုလက်ထပ်တော့မယ့်အကြောင်းပြောတော့ သူကနောက်နေတာလားလို့မေးတယ်။ တကယ့်ဆိုတော့ သူနည်းနည်းငြိမ်ကျသွားတယ်။ ပြီးတော့ နောက်ထပ်ကလေးတစ်ယောက်ထပ်မယူရင်ခွင့်ပြုပေးမယ်ဆိုတော့ သူတို့ကိုနောက်ထပ် ကလေး မယူတော့ဘူးလို့ ကတိပေးလိုက်တယ်။ 

ဒါကိုအစ်မအမျိုးသားကလည်း လက်ခံပါတယ်။ သူတို့က အစ်မအမျိုးသားကို လူကိုတော့လက်ခံချစ်ပေး လို့ရပေမယ့် နောက်လာမယ့်ကလေးကိုတော့ လက်ခံချစ်ပေးလို့မရနိုင်ဘူးတဲ့။ ဒါ့ကို အစ်မလက်ခံပါတယ်။ သူတို့ရဲ့ခံစားချက်ကိုအစ်မနားလည်းပေးရမယ်။ ဖြစ်လည်းဖြစ်သင့်တယ်လေ။ အစ်မလက်ထပ်ဖို့ ဆုံးဖြတ် လိုက်တာလဲ သမီးရဲ့ဆုံးဖြတ်ချက်နဲ့လက်ထပ်ဖို့ဆုံးဖြတ်တာလို့ပြောရင်လည်း မမှားဘူးလို့ပြောရမယ်။

အစ်မလက်ထပ်မယ့်သူက အစ်မထက်အများကြီးငယ်တယ်လို့သိရတယ်။ အသက်ဘယ်လောက်ထိကွာလဲ။
သူက အစ်မထက်ဆယ်နှစ်လောက်ငယ်တယ်။ ကိုယ့်ထက်ငယ်တယ်ဆိုပေမယ့် တကယ့်အရေးကြီးတဲ့ အပိုင်းတွေမှာ သူကဦးဆောင်ဆုံးဖြတ်ချက်ချပေးနိုင်သူပါ။ သူတကယ့်အရည်ချင်းရှိတဲ့ ယောက်ျားကောင်း တစ်ယောက်ပါ။ အိမ်ထောင်ဖက်ကောင်းတစ်ယောက်ကိုတွေ့ချိန်မှာ မြန်မာမိန်းကလေးတစ်ယောက်အနေနဲ့ ရွေးချယ်ဖြစ်တယ်။ အခုအစ်မအသက်ကမကြာခင်လေးဆယ်ပြည့်တော့မယ်လေ။ အစ်မလိုချင်တဲ့ပျော် ရွှင်စရာကောင်းတဲ့မိသားစု အိမ်ထောင်အခြေအနေကို အခုမှခံစားခွင့်ရတာပါ။ အစ်မဒီလိုတစ်ခါမှ စိတ်မချမ်းသာခဲ့ရဘူး။ 

အိမ်ထောင်တစ်ခုမှာအချစ်ကအဓိကကျသလား…အစ်မအမြင်လေးသိချင်ပါတယ်။
အိမ်ထောင်တစ်ခုမှာ အချစ်က အရေးကြီးပါတယ်။ အချစ်မရှိတဲ့ အိမ်ထောင်ရေးက ရေရှည်မသာယာနိုင် ဘူးလို့ဆိုကြတယ်။ ဒါပေမဲ့ အစ်မမြင်ဖူးတဲ့ အိမ်ထောင်ရေးအများစုက အရမ်းချစ်လို့ လက်ထပ်ပြီးပြန်ကွဲ သွားကြတာများတယ်။ မိဘကကောင်းစေချင်လို့ စီစဉ်နေရာချပေးထားတဲ့အိမ်ထောင်ရေးအများစုက တဖြည်းဖြည်းနဲ့တစ်ယောက်နဲ့တစ်ယောက်ချစ်လာပြီး အိမ်ထောင်ရေးမြဲကျတာများတယ်။ 

အဲဒီတော့ ဒီဘက်ခေတ်လူငယ်တွေမှာ အရမ်းချစ်ပြီး ကိုယ့်ကွယ်ရာရောက်နေတာလဲ သ၀န်တိုနေရ တဲ့အဖြစ် စိတ်မချရတဲ့အဖြစ် တစ်ယောက်နဲ့တစ်ယောက်ချစ်ပေမယ့် ပျော်ရွှင်မှုကောင်းကောင်းမပေးနိုင်ပဲ ကိုယ့်ဘ၀တိုးတက်ဖို့အတွက်တစ်ယောက်နဲ့တစ်ယောက် ကူညီမှုမပေးနိုင်တဲ့ချစ်သူတွေမှာ ပျော်ရွှင်မှု စိတ်ချမ်းသာမှုတွေမရကြတာများတယ်။ တကယ့်တော့ အိမ်ထောင်တစ်ခုမှာ အချစ်ကအရေးကြီးပေမယ့် တစ်ယောက်ကိုတစ်ယောက်ကူညီရင်းနဲ့ပျော်ရွှင်မှုပေးနိုင်ဖို့အရေးကြီးတယ်လို့ အစ်မမြင်ပါတယ်။

ပုညဗိုလ်
--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment Journal မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

#အပတ်စဉ်စနေနေ့တိုင်းထွက်ပြီ #စိတ်ရွှင်လန်းဖို့စာဖတ်စို့
#Weekly #Saturday #ရှိတ်ပ်
 

Share on Google Plus

0 comments:

Post a Comment