လူအများအလွယ်ခေါ်နေကြတဲ့ ကားအစိတ်အပိုင်း ဒူးဆစ်

ဒူးဆစ်ဆိုတာ နာမည်တစ်လုံးနဲ့ခင်ဗျ။ မြန်မာဘောလုံးအသင်းကိုတော်တော်ဒုက္ခပေးခဲ့တဲ့ မြန်မာနဲ့ ပြိုင်ဘက်နိုင်ငံက ဘောလုံးသမားလေ။ ကိုင်တီဆတ်ဆိုတာလည်း ဘောသမားပါပဲ။

သူတို့ ၂ယောက်တွဲလိုက်လို့ကတော့ မြန်မာဘောအသင်း အီစလံဝေသွားတော့တာပဲဆိုတာ ဘောဝါသနာရှင်တော်တော်များများ မှတ်မိကြမယ်ခင်ဗျ။ ခုလည်းကားဝါသနာရှင်ကားပိုင်ရှင်တော်တော်များများကို ဒုက္ခပေးနေတဲ့ဒူးဆစ်ဆိုတာလည်းဘောသမားလေးတစ်ဦးပါပဲ။

သူကတော့ခုခေတ်ကားတော်တော်များများအတွက် ဘီးများကိုအထူးလည်ပတ်ပေးဖို့အခရာတော်တော်ကျတဲ့ ကိုင်တီဆတ်တစ်ဖြစ် Drive Shaft ဆိုတဲ့အရာနဲ့ အမြဲမပြတ်တွဲဖက်ကစားနေရတဲ့ ဘောသမားဆိုတဲ့ ဘောဘယ်ရင်တစ်မျိုးပါပဲ။ 

သူ့ကိုဘာလို့ဒူးဆစ်လို့အလွယ်ခေါ်လိုက်ရသလဲဆိုရင် လူမှာရှိတဲ့ဒူးဆစ်အတိုင်း ကွေးနိုင်ဆန့်နိုင်လို့ပါပဲ။ လူမှာရှိတဲ့ဒူးဆစ်ကတော့ အလွယ်ညွှတ်ပြောင်းကွေးနိုင်ဆန့်နိုင်ဖို့ပဲလိုအပ်ပါတယ်။ လူမှာတော့လှည့်လည်ပေးဖို့ Drive Shaft ကြီးမပါတော့ သိပ်အရေးမကြီးဘူးပေါ့။

ကားမှာပါတဲ့ဒူးဆစ်ကတော့ ထောင့်ဒီဂရီအမျိုးမျိုးပေါ်မှာ ချိုးကွေ့ဖို့အပြင် Drive Shaft ရဲ့အမိန့်တော်အတိုင်းနာရီလက်တံအတိုင်းပဲလည်လည် နာရီလက်တံနဲ့ဆန့်ကျင်ဘက်အတွက်ပဲလည်လည် လည်ပတ်နိုင်အောင်လုပ်ပေးထားရပြန်တယ်။

ကားရှေ့ဘီးယက်အတွက်လည်းပါရတယ်။ တန်းမပါတဲ့နောက်ဘီးယက်ကားများအတွက်လည်း ပါလာပါတယ်။

AWD / 4WD တွေအတွက်လည်းမပါမဖြစ်ပါပဲ။ ဒါကြောင့်မို့ အထဲကလီစာအသွင်အပြင်အရ ဇောင်းခါးသီးလိုဘောအထိုင်လေးထဲမှာလည်နိုင်ပတ်နိုင်ဖို့အပြင်ဝန်တစ်ခုပါ ထိန်းစေဖို့သံမဏိဘောစေ့များလေးနဲ့ စနစ်တကျအထိုင်ချပေးထားပါတယ်။

လှုပ်ရှားရုန်းကန်ရသမျှ ပွတ်အားများစွာကြောင့်ထွက်လာသမျှ အပူတို့အပွန်းအပဲ့တွေကိုချေဖျက်ဖို့အရေး ဂရပ်ဖိုက်ချောဆီအပျစ်တစ်ခုနဲ့ဖုံးလွှမ်းထားပေးရတယ်။ သူ့ကိုလည်းလုံလုံခြုံခြုံဖြစ်စေဖို့ ဒဏ်ခံရော်ဘာအကောင်းစားတစ်ခုနဲ့လုပ်ထားတဲ့ အကော်ဒီယံဘာဂျာလိုအစွပ်မျိုးနဲ့သေချာစွာ ကလစ်ဖမ်းထားပေးရပြန်တယ်။

ရော်ဘာဆိုတာ အသက်ရှိပါတယ်။ မသုံးလည်းကြာလာရင် တိုက်ဆွေးဖြစ်လာတယ်။ ရာသီဥတုဒဏ်မျိုးစုံလည်းခံရရှာပြန်တယ်။ အကော်ဒီယံလို ကျုံ့လိုက်ဆန့်လိုက်အကြိမ်များစွာလုပ်ပေးနေရလို့ 

ကွဲလာမယ်ပေါက်လာမယ်ပြဲလာမယ်ဆိုတဲ့သင်္ခါရကိုပြလာမယ်။

ဒါကိုအချိန်မီမသိရင် အထဲကိုသဲဝင်ခဲဝင်အမှုန်များဝင်ပြီးအထဲက ဒူးဆစ်ကိုပံ့ပိုးပေးထားတဲ့ ဘောအထိုင်များစားသွားပါလိမ့်မယ်။ ဒူးဆစ်စားတယ်ဆိုတာ ဘောအထိုင်သာစားသွားတာပါ။ သံမဏိဘောလုံးလေးတွေကစားခဲပါတယ်။ ဒါကိုမရှိသုံးပြင်သုံးတာသိပ်တော့မနိပ်လှပါဘူး။ ဒါကြောင့်မို့ အချိန်မီချုပ်အစုတ်သက်သာအောင် ကားအောက်ပိုင်းစစ်တိုင်း ဒူးဆစ်တို့ကိုင်တီဆတ်တို့ကျန်းမာရေးကို မကြာခဏစစ်ပေးပါ။ ခုလိုမိုးများလို့ရေကြီးနေတဲ့ ရန်ကုန်မှာသုံးတဲ့ကားများ ရေထဲဖြတ်မောင်းပြီးရင် ဒူးဆစ်ထဲရေ၀င်မ၀င်သိအောင်ပြန်လည်စစ်ဆေးသင့်ပါတယ်။ ပေါက်ပြဲရာအနည်းအများကိုသိတာနဲ့ချက်ချင်း မဆိုင်းမတွရော်ဘာစွပ်ကိုလဲပေးရပါမယ်။

ခရီးဝေးထွက်ခါနီးတိုင်းလည်း ဒူးဆစ်တို့ကိုင်တီဆတ်တို့ကိုအမြဲဂရုတစိုက်စစ်ဆေးပေးပါ။ အောက်ပိုင်းစစ်တယ်ဆိုပြီး တိုင်းရော့ဘောဂျွိုင်းလောက်ပဲမစစ်ပါနဲ့ ဘာဂျာအစွပ်လေးများမသိမသာကွဲအက်နေတတ်ပါတယ်။ ခရီးဝေးထွက်မှလမ်းမှာပေါက်သွားရင် မပျက်သင့်တာပျက်ရပါမယ်။

အဲအရေးကြီးတာပြောဖို့မေ့နေတယ်။ ဒူးဆစ်ကိုကားဝေါဟာရအနေနဲ့ဘယ်လိုခေါ်သလဲဆိုတာ လူတိုင်းသိသလိုလိုနဲ့မသိတာများပါတယ်။

ဒူးဆစ် = CV-Joint =  Constant Velocity Joint ပါတဲ့ဗျာတို့ရေ…ဒါလေးကိုမှတ်ထားကြပါဦး။ ခုကစလို့တတ်နိုင်သလောက် CV-Jointအလို့ခေါ်ရင် ကျွန်တော့်မိတ်ဆွေများခေတ်မီလာကြမှာမလွဲပါ။ နောက်တန်းကဂျွိုင်းရှပ်မှာ အထက်အောက်ပဲလှုပ်ရှားလည်ပတ်ပေးရတဲ့အရာကိုတော့ ယူနီဗါဆယ်ဂျွိုင့် Universal Joint လို့ မွေးစားခေါ်ပြီးနေလို့ သိပ်မဆန်းတော့လို့ အကျယ်ချဲ့မပြောလိုတော့ပါဘူး။ ခုကစလို့ ဒူးဆစ်ကိုသာ CV-Joint လို့ပြောင်းခေါ်ကြရင်သိပ်ကောင်းမှာ…

ကားမိတ်ဆွေများကို ခင်မင်လျက် ကိုသက်

--------------------------------------------------------

ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment Journal မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

#အပတ်စဉ်စနေနေ့တိုင်းထွက်ပြီ #စိတ်ရွှင်လန်းဖို့စာဖတ်စို့
#Weekly #Saturday #ရှိတ်ပ်

 

Share on Google Plus