စတိုင်ကျကျ ဒေါက်ဖိနပ်စီးချင်တယ်ဆိုရင်…









ဒေါက်မြင့်ဖိနပ်စီးတာ ပညာသားပါတယ်ဆိုတာမိန်းကလေးတိုင်း လက်ခံကြမှာပါ။ ဘာလို့လဲဆိုတော့ ဒေါက်မြင့်ဖိနပ်လေးတစ်ရံစီးပြီး နာကျင်မှုကိုအံကြိတ်ခံဖူးခဲ့သွားပြီကိုး။ ဒါပေမဲ့လည်း ဘယ်လောက်ပဲနာကျင်ရပါစေ၊ ဘယ်လောက်ပဲလမ်းလျှောက်ရတာခက်ခဲနေပါစေ ကိုယ်အနှစ်သက်ဆုံး ဒေါက်မြင့်ဖိနပ်လေးကိုလွှင့်ပစ်လိုက်ဖို့၊ သိမ်းထားလိုက်ဖို့စိတ်ကူးမိကြမှာမဟုတ်ပါဘူး။ ဘာကြောင့်လဲ…။ ကိုယ်နှစ်သက်တဲ့ဖိနပ်လေးတစ်ရံစီးလိုက်မှတော့ နာကျင်ရတဲ့ခံစားချက်ဆိုတာသာမန်မျှသာပါပေါ့။ ဒါပေမဲ့စိတ်မပူပါနဲ့။ နာကျင်မှုကိုသက်သာစေတဲ့နည်းလမ်းကောင်းလေးတွေရှိပါတယ်။

လမ်းလျှောက်တဲ့အခါသက်သောင့်သက်သာရှိပါစေ
တချို့တွေက ဒေါက်ဖိနပ်စီးပြီးချော်လဲမှာ၊ ခြေခေါက်လဲမှာကိုစိုးရိမ်မိတတ်ကြပါတယ်။ အဲဒါကြောင့်လည်းလမ်းလျှောက်တဲ့အခါ သတိအနေအထားကြီးနဲ့ တောင့်တောင့်ဖြောင့်ဖြောင့်ကြီးဖြစ်နေကြတာပေါ့။ တကယ်တော့ ကျောကိုတောင့်တောင့်ကြီးထား၊ ခြေထောက်ကိုဖြောင့်ဖြောင့်ကြီးထားပြီးလမ်းလျှောက်တာက ပိုပြီးတောင်ကိုးရိုးကားရားနိုင်နေပါသေးတယ်။ တစ်ကိုယ်လုံးတောင့်တင်းနေတဲ့အတွက် သိပ်မကြာခင်ကျောရိုးဟာကိုက်ခဲနာကျင်လာရပါတယ်။ အဲဒါကြောင့် ဒေါက်ဖိနပ်စီးပြီးလမ်းလျှောက်တဲ့အခါ ခန္ဓာကိုယ်နဲ့စိတ်ကို အလိုက်သင့်လေးသာထားပါ။ ဒါမှပိုပြီးသဘာဝကျသွားပါလိမ့်မယ်။

မ၀တ်ခင်စမ်းသပ်ဝတ်
နောက်ထပ်နည်းလမ်းတစ်ခုက ဒေါက်မြင့်ဖိနပ်ကိုသိမ်းထားပြီး ပွဲလမ်းသဘင်ရှိမှထုတ်မ၀တ်ပါနဲ့။ တစ်နေရာမသွားခင်တစ်ရက်လောက်လိုကတည်းက၀တ်ဆင်ပါ။ ဖိနပ်တွေကမာကျောပြီးပွတ်တိုက်ပါများတဲ့အခါ ခြေထောက်ကိုပါဒဏ်ဖြစ်စေပြီး လမ်းလျှောက်တဲ့အခါအနှောင့်အယှက်ဖြစ်စေပါတယ်။ 

ဖိနပ်ပေါက်ဒဏ်ရာကာကွယ်ဖို့
တကယ်လို့ဒေါက်မြင့်ဖိနပ်စီးတိုင်း ဖိနပ်ပေါက်တဲ့ဒဏ်ကြောင့် နာကျင်မှုခံစားနေရတယ်ဆိုရင်တော့ နောက်တစ်ကြိမ်ဖိနပ်မစီးခင်မှာဖိနပ်အစွန်အဖျားတွေကို ချိုင်းချွေးနံ့ပျောက်ဆေးအကြည်လေးဖြစ်ဖြစ်၊ Lotion ဖြစ်ဖြစ်ပွတ်ထားပေးလိုက်ပါ။ ဒါမှလည်းလမ်းလျှောက်တဲ့အခါ Lotion ရဲ့ချောမွေ့မှုကြောင့် ခြေထောက်မှာပွတ်တိုက်ပြီး ဒဏ်ရာဖြစ်ခြင်းကိုသက်သာစေပါလိမ့်မယ်။

ဖိနပ်ဝယ်ရင်
ဖိနပ်ဝယ်ဖို့အတွက်ဈေးထွက်တဲ့အခါ ညနေဘက်ဝယ်တာအကောင်းဆုံးပါ။ နံနက်၊ နေ့ဘက်အချိန်တွေမှာခြေထောက်ကသိပ်အသုံးမပြုရသေးတဲ့အတွက်မပြန့်ကားနေပါဘူး။ ညနေဘက်အချိန်မှာတော့ ခြေထောက်ကပြန့်ကားနေပြီး ဖိနပ်စမ်းသပ်ဝတ်ဆင်ကြည့်ဖို့အကောင်းဆုံးဖြစ်နေပါလိမ့်မယ်။

ချော်မလဲရအောင်
ဒေါက်ဖိနပ်စီးတဲ့အခါသတိထားရမှာက ဖိနပ်ချော်ပြီးမလဲသွားဖို့ပါဘဲ။ တကယ်လို့မြေပြင်ပေါ်အပုံလိုက်လဲကျသွားရင်တောင်မှ ခြေထောက်၊ ခြေကျင်းဝတ်ခေါက်သွားစရာအကြောင်းရှိပါတယ်။ အဲဒါကြောင့် ဒေါက်ဖိနပ်အသစ်အောက်ခံကို မစီးခင်မှာကော်ပတ်ကြမ်းနဲ့ ပွတ်တိုက်လိုက်ပါ။ ဖိနပ်အသစ်လေးကိုပွတ်တိုက်လိုက်ရတဲ့အတွက် ကြေကွဲစရာကောင်းလှပါတယ်။ ဒါပေမဲ့ ခြေထောက်ခေါက်ပြီးချော်လဲမကျဖို့ကပိုပြီးအရေးကြီးတယ် မဟုတ်ပါလား။

ခြေချောင်းကိုတိပ်ပတ်ထားပါ
ခြေထိပ်အပိတ်ဒေါက်မြင့်ဖိနပ်ဝတ်ဆင်သူတွေကြုံရတတ်တာတော့ ခြေသန်းနဲ့ခြေသူကြွယ်ကပွတ်တိုက်ပြီး ဒဏ်ရာရတတ်ခြင်းပါ။ အကောင်းဆုံးက အဲဒီခြေချောင်းနှစ်ချောင်းကိုတိပ်လေးနဲ့သာပတ်ထားလိုက်ပါ။

အခုအခံသုံးပါ
အခုအချိန်မှာဆိုရင်ဒေါက်ဖိနပ်စီးတဲ့အခါ ခံစားရတဲ့နာကျင်မှုကိုသက်သာစေဖို့ အကူပစ္စည်းတွေ ဈေးကွက်ထဲမှာရနေနိုင်ပါပြီ။ ဒေါက်မြင့်ဖိနပ်စီးသူတွေက ခြေအောက်ကအသားလုံးကိုအားပြုပြီး လမ်းလျှောက်ကြရပါတယ်။ အချိန်ကြာလာတာနဲ့အမျှ ဒီအသားဆိုင်ဟာနာကျင်လာရပြီး လမ်းကောင်းကောင်းမလျှောက်နိုင်တော့ပါဘူး။ အဲဒါကြောင့်နာကျင်မှုကိုသက်သာစေဖို့ အခုအခံပစ္စည်းသုံးပေးပါ။

ခြေလှမ်းသေးသေးလမ်းလျှောက်
ဒေါက်ဖိနပ်စီးပြီးကျက်သရေရှိရှိလေးလမ်းလျှောက်ဖို့နည်းလမ်းတစ်ခုကတော့ ခြေလှမ်းကျဉ်းကျဉ်းနဲ့လမ်းလျှောက်ဖို့ပါပဲ။ ဒေါက်ဖိနပ်စီးပြီးလမ်းလျှောက်တာဟာ တခြားဖိနပ်စီးပြီးလမ်းလျှောက်ရတာနဲ့မတူဘူးဆိုတာ အထူးသတိပြုပါ။

အံဝင်ခွင်ကျဖြစ်ပါစေ
ဖိနပ်ဝယ်တဲ့အခါ အဓိကကတော့ကိုယ့်ခြေထောက်နဲ့အံဝင်ခွင်ကျဖြစ်နေဖို့ အရေးကြီးပါတယ်။ အထူးသဖြင့်အန္တရာယ်ရှိတဲ့ဒေါက်မြင့်ဖိနပ်တွေစီးတဲ့အခါမှာပေါ့။

အနားပေးပါ 
ဒေါက်မြင့်ဖိနပ်ဝတ်ဆင်ခြင်းက ခြေထောက်နဲ့ကျောရိုးကိုဖိအားပေးပါတယ်။ အဲဒါကြောင့် နေ့တိုင်းဝတ်ဆင်ဖို့မကြိုးစားပါနဲ့။ ဖိနပ်အပါး၊ ဖိနပ်အနိမ့်တို့လို ခြေထောက်ကိုသက်သောင့်သက်သာဖြစ်စေတာမျိုး၊ မကြာခဏပြောင်းလဲဝတ်ဆင်ပေးပါ။

Crystal
--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment Journal မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 

Share on Google Plus

0 comments:

Post a Comment