ကြက်ပုံးကင်၊ ကျွဲကောသီးသုပ်၊ တို့ဖူးဟင်းချို၊ မုန်ညင်းချဉ်ထမင်းကြော်။








ဘာလိုလိုနဲ့ နှစ်တစ်နှစ်လည်း ကုန်တော့မယ်ဆိုတော့ New Year ပွဲလေးလုပ်ဖို့လည်းနီးလာပြီပေါ့ နော်။ ညဘက်လုပ်မယ့်ပွဲလေးဆိုတော့ မီးပုံလေးဖိုပြီးအားလုံး ပျော်ပျော်ပါးပါးသောက်ကြ၊ စားကြ၊ ပျော်ကြပါး ကြမယ့်ပွဲတစ်ပွဲဆိုပါတော့။ ကျွန်တော်တို့ကတော့ အဲလိုပွဲမျိုးဆို မြို့ထဲကတိုက်ခန်းမှာ လုပ်ရတာထက်စာရင် ခြံဝန်းလေးထဲမှာလုပ်ရတာ ပိုပျော်တယ်ဗျ။ လွတ်လွတ်လပ်လပ် ပျော်ပျော်ပါးပါးနေလို့ရတယ်လေ။ 

ဒီနှစ် New Year အတွက် အဓိကအနေနဲ့ ကြက်ကင်မယ်စိတ်ကူးထားတယ်။ ကြက်ကိုတော့ CP ကြက်မနုမရင့် တစ်ပိဿ ပတ်လည်လောက်အကောင်ကို ရွေးထားလိုက်မယ်။ ပြီးရင် ကြက်ကိုအထဲက အသည်းအမြစ်တွေဖယ် အသားများတဲ့ ရင်ပုံ ပေါင်လိုနေရာမျိုးတွေကို ဓားနဲ့မွှန်း ရေစင်စင်ဆေးပြီးရေခြောက်အောင် ခဏထား၊ ဇီယာကို ညက်အောင်ထောင်းထား သကြား၊ ဆား၊ ကြက်သားမှုန့်၊ ငရုတ်သီးအရောင်တင်မှုန့်နည်းနည်း ပဲငံပြာရည်အ ကြည်၊ ဒိန်ချဉ်တို့နဲ့ရောပြီး ကြက်သားထဲအထိ အရသာဝင်အောင်သေချာနယ်ပြီး မနက်တည်းက ရေခဲသေတ္တာ ထဲထည့်ပြီးနှပ်ထား။ 

ညဘက်ကင်ခါနီးကျမှ ကြက်ရဲ့ကျောပိုင်းကနေ တုတ်အချွန်နဲ့ထိုးပြီး မြေကြီးမှာစိုက်ပြီးမှ လေးထောင့်သံပုံးနဲ့ အပေါ်ကနေအုပ်၊ ကောက်ရိုးနည်းနည်းခြင်းကို သံပုံးပေါ်ကနေ အုပ်ပြီးမီးရှို့ပေး ဆယ်မိနစ် လောက် မီးနည်းနည်းချင်းရှို့ပေးပြီးရင် သူ့ပြာလေးနဲ့သူ နောက်ထပ် ၁၅မိနစ် လောက်ခဏအုပ်ထားပြီးမှ သံပုံး ပေါ်ကပြာတွေရှင်းလိုက်ပြီး သံပုံးကိုဖယ်လိုက်ရင် အရသာရှိတဲ့ကြက်ပုံးကင်မွှေးမွှေးလေးရပြီပေါ့နော်။ ချိုချိုလေး စားချင်တယ်ဆိုရင်တော့ ပူနေတုန်းမှာပျားရည်ကို စုပ်တံလေးနဲ့ ခပ်ပါးပါးလေးသုပ်ပေးလိုက်ရုံပါပဲ။ ဒါဆိုရင် တော့ အဓိကဟင်းအနေနဲ့ ပျော်ပျာ်ပါးပါးနဲ့ အားလုံးစားလို့လည်းအဆင်ပြေ အေးမြတဲ့ဒီဇင်ဘာညမှာ မီးလေးလည်းလှုံရင်း အနွေးဓာတ်လည်းရ နှစ်မျိုးအဆင်ပြေမယ့် ကြက်သားကင်လေးလုပ်ရတာ ပျော်ဖို့ကောင်း မှာအသေအချာပဲပေါ့။ 

ကျွဲကောသီးသုပ်
အသုပ်အတွက်ရွေးထားတဲ့ ကျွဲကောသီးသုပ်အတွက်ကတော့ ကျွဲကောသီးကိုအခွံတွေဖယ်ပြီး အမွှာလေးတွေကိုမွှထား၊ ငါးနီတူခြောက်နဲ့ ပုဇွန်ကိုလှော်ထား။ ကြက်သွန်နီကိုခပ်ပါးပါးလေးလှီးပြီး ကြွပ်ကြွပ် ကြော်ထား။ ထန်းလျက်လေးကိုလည်းကြိုထား၊ မြေပဲဆန်ကြော်လေးနဲ့ ငရုတ်သီးလှော်မှုန့်လည်း ၀ယ်ထား လိုက်ပေါ့နော်။ ပြီးမှ မွှထားတဲ့ကျွဲကောသီးထဲကို ပုဇွန်ငံပြာရည် ငရုတ်သီးလှော်မှုန့် ထန်းလျက်ရည်၊ ငါးနီတူ ခြောက်နဲ့ ပုဇွန်လှော်ကိုထည့်ပြီး ခပ်ဖွဖွလေးနယ်ပေး အရသာကချိုချဉ် ငန်စပ်လေးရပြီဆိုမှ မြေပဲဆန်ကြော်နဲ့ ကြက်သွန်နီကြော်လေး အပေါ်ကနေဖြူးပေးလိုက်ရုံပါပဲ။ ဒါဆိုရင်တော့ ကြက်ပုံးကင်နဲ့လိုက်ဖက်မယ့် ကျွဲကော သီးသုပ် ချိုချဉ်ငန်စပ်လေးတစ်ပွဲရပြီပေါ့။ 

ဟင်းချိုကိုတော့ ကြက်ကင်လုပ်တုန်းကပိုတဲ့ ခေါင်းခြေထောက် လည်ချောင်းရိုးလေးတွေလုပ်ထား တဲ့ပြုတ်ရည်ထဲကို ကြက်သွန်ဖြူ ဓားပြားရိုက်ထည့် အရသာအတွက်ကတော့ ဆား၊ သကြား၊ ကြက်သားမှုန့် လေးထည့်လိုက်ရုံပေါ့နော်။ အရသာအဆင်ပြေပြီဆိုမှ အဆင်သင့်ပြင်ထားတဲ့ မုန်ညင်းနဲ့တို့ဖူးလေးထည့် လိုက်ရင်တို့ဖူးဟင်းချိုလေး တစ်ခွက်ကတော့ အဆင်ပြေလောက်မယ်ထင်ပါတယ်။ ဒီလိုညမျိုးမှာ ခုနကချက် ထားတဲ့ဟင်းရွက်တွေက သောက်ကြစားကြတဲ့အခါ မြည်းတာနဲ့တင်ကုန်လောက်မှာဆိုတော့ ဆာတဲ့အခါ စားဖို့ အတွက်လည်း လိုသေးတာပေါ့နော်။ အဲ့အတွက်ကိုတော့ လွယ်လည်းလွယ် တစ်မျိုးတည်း လည်းစား လို့ အဆင် ပြေမယ့် မုန်ညင်းချဉ်လေးနဲ့ ၀က်လိုင်းသားလေးထည့်ပြီး ထမင်းလေးပဲကြော် စားလိုက် တာပေါ့နော်။
 မုန်ညင်းချဉ် ကိုအရည်တွေစစ်ပစ်လိုက်ပြီး အနေတော်လေးတွေပြန်လှီးထား၊ ၀က်လိုင်းသားလေးတွေကိုလည်း အနေတော် လေးတွေတုံးထားပေ့ါနော်။ ကြက်သွန်ဖြူလေး ဓားပြားရိုက်စဉ်းထားတာလေးဆီသတ်  ပြီးရင်ဝက်လိုင်းသား လေးထည့် ခရုဆီလေးပါထည့်ပြီး သုံးမိနစ်လောက်မွှေပေးပြီးမှ ရေစစ်ပြီးလှီးထားတဲ့ မုန်ညင်းချဉ်လေးထည့်၊ ထမင်းလေးပါထည့်၊ ပဲငံပြာရည်အကြည်၊ ဆား၊ သကြား၊ ကြက်သားမှုန့်လေးထည့်ပြီးနှံ့အောင်မွှေပေးပြီး စားလိုက်ရုံပေါ့နော်။ ဒါဆိုရင်တော့ ဆာတဲ့အခါအ၀စားဖို့အတွက် မုန်ညင်းချဉ်ထမင်းကြော်လေးကလည်း အဆင်ပြေမှာအသေချာပဲပေါ့နော်။ ဒီနှစ် New Year  မှာ ဆွေမျိုးတို့လည်း နှစ်ဟောင်းကိုထားခဲ့ပြီး နှစ်သစ်ကို မိသားစုသူငယ်ချင်းဆွေမျိုးတွေစုပြီး ပျော်ပျော်ပါးပါးစားကျသောက်ကျပြီး နှစ်သစ်ကိုကြိုဆိုကြတာပေါ့နော်။ အားလုံးပဲနှစ်သစ်မှာ လူသစ် စိတ်သစ်နဲ့ အဆင်ပြေပျော်ရွှင်ကြပါစေ။

Royal
--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 


Share on Google Plus

0 comments:

Post a Comment