ပုဇွန်ဆီပြန်၊ မုန်လာဥကြက်ဥဟင်းချို၊ ပဲစောင်းဝါးသီးသုပ်










ဒီတစ်ပတ်တော့ မယ်တော်မားသားစားချင်တဲ့ ဟင်းလေးတွေကိုပဲ အတွဲအစပ်လေးရအောင်တွဲပေးပြီးချက် ဖြစ်တယ်။ ပုဇွန်ဥထုပ်ကြီးကြီးလေးတွေ ဆီပြန်ချက်မယ်။ ဆီပြန်ဆိုပေမယ့် အနှစ်လေးများများနဲ့ ဆီကျန်ရေ ကျန်လေးချက်လိုက်မယ် စိတ်ကူးတယ်။ ဟင်းချိုကိုတော့ အိမ်မှာရှိနေတဲ့ ကြက်ရိုးလေးကို မုန်လာဥလေးနဲ့ ချက်မယ်။ အသုပ်ကိုတော့ ပဲစောင်းဝါးသီးကို ရခိုင်သုပ်လေးပြန်သုပ်လိုက်မယ်။ ဒါဆိုရင်တော့ အရသာစုံစုံ လေးနဲ့ စားကောင်းမှာသေချာလောက်ပါတယ်။ 

ပုဇွန်ဆီပြန်
ပုဇွန်က ဥထုပ်လေးဆိုတော့ ဥလေးတွေမထွက်ကုန်အောင် အလယ်ခွံလေးတွေချန်ထားပြီး သေချာ လေးခွာ ပုဇွန်ငံပြာရည်လေးနဲ့နယ်ပြီး ပြန်နှပ်ထားလိုက်မယ်။ ပုဇွန်လေးနှပ်ထားတုန်း ကြက်သွန်နီနဲ့ ခရမ်းချဉ်သီးကို ခပ်ထူထူလေးလှီးထား။ ကြက်သွန်ဖြူတစ်တက်လောက်ကို ဓါးပြားရိုက်ပြီးစဉ်းထား။ နံနံပင်ကို မကောင်းတာလေးတွေဖယ်ပြီး ရေစင်စင်ဆေးရေစစ်ထား။ ငရုတ်သီးစိမ်းကိုတော့ ခပ်ကြီးကြီးလေးတွေ လှီးထား။ ဒါဆိုရင်တော့ ပြင်လို့ဆင်လို့ပြီးပြီပေါ့။ ချက်ဖို့ကတော့ အိုးထဲကိုဆီထည့် ကြက်သွန်ဖြူက အစိမ်းနံ့ ပျောက်လို့ မွှေးလာပြီဆိုမှ ကြက်သွန်နီနဲ့ နနွင်းမှုန့်လေးနည်းနည်းထည့်၊ ခရမ်းချဉ်သီးထည့် ခရမ်းချဉ်သီး လေးနွမ်းလာပြီဆိုမှ ခရုဆီလေးနဲ့နှပ်ထားတဲ့ ပုဇွန်လေးထည့်ပြီး လုံးရေခန်းတဲ့အထိ တည်ပြီးမှရေပြန်ထည့်ပြီး ဆီကျန် ရေကျန်လေးဖြစ်ပြီဆိုရင် အရသာမြည်းကြည့် အဆင်ပြေပြီဆိုရင်တော့ အနှစ်များများလေးနဲ့ နယ်စား လို့ရတဲ့ ပုဇွန်ဆီပြန် ချိုစပ်မွှေးလေးတစ်ခွက်ရပြီပေါ့။ 

မုန်လာဥကြက်ရိုးဟင်းချို
ကြက်ရိုးနဲ့ချက်မယ်ဆိုတော့ ထုံးစံအတိုင်း ကြက်ရိုးမြုပ်ရေကိုဆူအောင်အရင်တည်ပြီးမှ ကြက်ရိုးထည့် ပြီး မိနစ်ဝက်လောက်မွှေပေးပြီးရင် ရေတွေကိုပြန်သွန်လိုက်ပြီး ဆားကြက်သွန်ဖြူဓါးပြားရိုက်နဲ့ ရေပြန်ထည့်ပြီး ကြက်ရိုးနူးတဲ့အထိပြန်တည်ထားပေါ့။ ကြက်ရိုးနူးပြီဆိုမှ မုန်လာဥအခွံခွာ အနေတော်တုံးထားတာလေးတွေ ထည့် မုန်လာဥနူးပြီဆိုမှ အရသာမြည်းကြည့်ပြီး စိတ်ကြိုက်ရပြီဆိုရင် တရုတ်နံနံလေးအုပ်လိုက်ပေ့ါ။ 

ပဲစောင်းဝါးသီးသုပ်
ပဲစောင်းဝါးသီးကိုကျက်ရုံလေးပြုတ်ပြီး ရေအေးအေးလေးနဲ့ပြန်စိမ်ပြီးမှ ခပ်ပါးပါးလှီးထား၊ ကြက်သွန်နီ လေးကိုလည်းခပ်ပါးပါးလှီးရေဆေးပြီး စင်အောင်ပြန်ညှစ်ထား။ မြေပဲကို မညက်တညက်လေးထောင်းထား။ ငရုတ်ကောင်းလေးငါးစေ့လောက်ကို အရင်ညက်အောင်ထောင်းပြီးရင် ငရုတ်သီးစိမ်း၊ ကြက်သွန်ဖြူ၊ ပုဇွန် ငါးပိ လေးမီးပြထားတာကိုပါထည့်ထောင်း၊ ပြင်ထားတဲ့ဟာအားလုံးကို သံပုရာရည်နဲ့ပျားရည်လေး နည်းနည်းထည့်ပြီး ရောနယ်၊ အရသာက ချိုချဉ်ငံစပ်လေးနဲ့မွှေးမွှေးလေးရပြီဆိုရင် ပုဇွန်ဆီပြန်ဟင်းလေးရယ်၊ မုန်လာဥကြက်ရိုး ဟင်း ချိုလေးရယ်နဲ့ တွဲစားလို့လိုက်ဖတ်မယ့် ပဲစောင်းဝါးသီးသုပ်လေးရပြီပေါ့ ဆွေမျိုးတို့ရာ။ ဒီတစ်ပတ်တော့ ဒီလောက်ပဲချက်ကြတာပေါ့။ နောက်တစ်ပတ်မှနောက်တစ်မျိုး ချက်ကျတာပေါ့။ အားလုံးပျော်ရွှင်ကြပါစေ။ 

Royal (Laputta)


--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment Journal မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 


Share on Google Plus

0 comments:

Post a Comment