ဝက်သားပုန်းရည်ကြီးနှပ်၊ ဒန့်ဒလွန်ရွက်ဟင်းချို၊ နှမ်းဖတ်ချဉ်သုပ်။









ဒီတစ်ပတ်တော့အညာဘက် ခရီးသွားရင်း အညာနွေပူပူမှာစားခဲ့ရတာလေးတွေသတိရလို့ စားချင် လာတာနဲ့ ၀က်သားပုန်းရည်ကြီးနှပ်လေး ချက်မယ်စိတ်ကူးတယ်။ မယ်တော်မားသားမေးကြည့်တော့လည်း မစားရတာကြာနေပြီ၊ ကောင်းသားပဲ လိုက်ဖက်အောင် နှမ်းဖတ်ချဉ်လေးလည်းဝယ်ခဲ့မယ်၊ နှမ်းဖတ်ချဉ် လေးပါသုပ်ကြတာပေါ့ဆိုတော့ ဆီပြန်နဲ့အသုပ်အတွက်ကတော့ အဆင်ပြေသွားပြီပေါ့နော် အရည်သောက်ကျ တော့ စဉ်းစားရပြန်ရော ဘာနဲ့များလိုက်ဖက်မလည်းပေါ့ နောက်ကျတော့လည်း မယ်တော်မားသား နေပူပူမှာ ၀က်သားစားပြီး သွေးတက်မှာစိုးတာနဲ့ ဒန့်သလွန်ရွက်လေးပဲဟင်းချိုချက်တော့မယ်လို့ ရွေးလိုက်တယ်။ မယ်တော်မားသားဈေးကနေပြန်လာတာနဲ့ ချက်ရေးပြုတ်ရေးစကြတယ်ပေါ့။ 

ဝက်သားပုန်းရည်ကြီးနှပ်
ဝက်သားကိုသုံးထပ်သား အသားများတာလေးဝယ်လာတယ်ဆိုတော့ အနေတော်လေးတွေတုံး၊ ဆား၊ သကြားထည့်နယ်ပြီး ခနနှပ်ထား၊ ကြက်သွန်ဖြူ၊ ဂျင်းနဲ့ကြက်သွန်နီကိုရောပြီးမညက်တညက်လေးထောင်း ထား၊ ပုန်းရည်ကြီးကို ရေနွေးလည်းနည်းနည်းထည့်ဖျော်ပြီး ခဲသလဲမပါအောင်စစ်ထား၊ ၀က်သားကို ဆီနည်းနည်းနဲ့ရေခန်းပြီး နီလာတဲ့အထိဆက်လုံးပေး ပြီးမှ ရေမြုပ်ရုံထည့်ပြီး နူးတဲ့အထိတည်၊ တစ်ဝက်လောက် နူးပြီဆိုမှ ခုနကခဲသလဲစစ်ထားတဲ့ပုန်းရည်ကြီး အနှစ်လေးထည့်မွှေပေးပြီးရင် ၀က်သားနူးတဲ့အထိ တည်ထား လိုက်ပေါ့။ ဒါဆိုရင် ၀က်သားနူးတဲ့အချိန်ကျမှ  ပုန်းရည်ကြီးရဲ့ အရသာကလည်းဝက်သားထဲဝင်၊ ပုန်းရည်ကြီး အနှစ်ကလည်း ၀က်သားကထွက်တဲ့ အရသာလေးနဲ့ဆိုတော့ ကောင်းမှကောင်းပေါ့နော်။

နှမ်းဖတ်ချဉ်သုပ်
နှမ်းဖတ်ချဉ်သုပ်ဖို့ကတော့ လွယ်ပါတယ်။ ကြက်သွန်နီခပ်ပါးပါးလှီးပြီး ရေစင်စင်ဆေး၊ ရေပြန်ညှစ် ထား၊ ပူစီနံလေးလည်း ရေစင်စင်ဆေးရေစစ်ပြီးလှီးထား ငရုပ်သီးစိမ်းလေးတွေလည်း မထူးမပါးလှီးထား၊ ပြီးရင် နှမ်းဖတ်ချဉ်လေးနဲ့ ခုနကအသင့်ပြင်ထားတာတွေကို မြေပဲဆီမွှေးမွှေးလေးထည့်နယ်ပေးလိုက်ရင် နှမ်းဖတ်ချဉ် သုပ်၊ ချဉ်စပ်ဆိမ့်လေးရပြီပေါ့နော်၊

ဒန့်သလွန်ရွက်ဟင်းချို
ဒန့်သလွန်ရွက်လေးကိုခြွေပြီး ရေစင်စင်ဆေးရေစစ်ထား၊ ကြက်သွန်နီတစ်ဥလောက်ကိုမထူမပါးလှီး ထား၊ ပုဇွန်ခြောက်ကို မညက်တညက်လေးထောင်းထားတာလေးတွေပါထည့်၊ ပုဇွန်ငံပြာရည်လေးပါထည့် ဆီသတ်ပေးပြီးမှ ဒန့်သလွန်ရွက်လေးတွေထည့်လုံးပြီး ရေအနေတော်ထည့်ပြီး ဆူအောင်တည်၊ ရေဆူလာရင် အပေါ့အငံမြည်းကြည့်၊ လိုအပ်ရင်တော့ ကြက်သားမှုန့်လေးထည့်ပေးပေါ့။ ဒါဆိုရင်တော့ ၀က်သားပုန်းရည်ကြီး နှပ်စားပြီးရင် သွေးတိုးမှာမပူရတော့ဘူးပေါ့။ နှမ်းဖတ်ချဉ်သုပ် ချဉ်စပ်ဆိမ့်မွှေးလေးပါ တွဲစားလိုက်ရင်တော့ စားလို့ကောင်းမှာသေချာတဲ့ မိသားစုထမင်းဝိုင်းလေးဖြစ်ဖို့ အသေအချာပါပဲ။
ဒီတစ်ပတ်ကတော့ ဒီလောက်ပဲချက်ရအောင်လား၊ ဆွေမျိုးတို့ရာ နောက်တစ်ပတ်မှ နောက်တစ် မျိုးချက်ဖို့ ပြန်ဆုံကြတာပေါ့နော်။ အားလုံးအဆင်ပြေပျော်ရွှင်ကြပါစေ။

Royal
--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 


Share on Google Plus

0 comments:

Post a Comment