ကံတရားနဲ့အမှန်တရားကို ခွဲခြားသိမြင်လာပြီလို့ အကယ်ဒမီစိုးမြတ်သူဇာက ပြောပါတယ်။









ဘ၀နဲ့အတွေ့အကြုံတွေအရ အနည်ထိုင်စပြုလာတဲ့စိတ်တွေဟာ တည်ငြိမ်စွာရှိလာသလို ချင်ချိန်စဉ်း စားတတ်သောအတွေးအခေါ် သဘောတွေအပေါ်မှာလည်း ကံတရားနဲ့အမှန်တရားကို ခွဲခြားသိမြင်လာပြီလို့ အကယ်ဒမီစိုးမြတ်သူဇာက ပြောပါတယ်။

ဘ၀ကပေးတဲ့သင်ခန်းစာ
ငယ်ငယ်တုန်းကနဲ့ မတူတော့တာ ရင့်ကျက်လာတဲ့စိတ်ပဲ။ ဘ၀ကပေးတဲ့သင်ခန်းစာတွေက အရာ ရာကိုပြောင်းလဲလာခဲ့တယ်။ လောကကြီးမှာ အရာရာဟာ ကိုယ်ဖြစ်ချင်တိုင်းဖြစ်နေတာမဟုတ်ဘူး။ လွဲချော်မှု တိမ်းစောင်းမှုဆိုတာကတော့ ရှိကြတာပဲ။ ကိုယ်ဖြတ်သန်းခဲ့တဲ့ အတွေ့အကြုံမှန်သမျှ သင်ခန်းစာရခဲ့တာတွေ လည်းရှိတယ်။ ဘ၀ကပေးတဲ့သင်ခန်းစာထက် လေးနက်တဲ့အရာဆိုတာ ဘာမှမရှိဘူး။ ဘ၀ကိုကြုံသလို လှေစီးခဲ့တာမျိုးလည်း မဟုတ်ဘူး။ ကိုယ်တိုင်လှော်ခတ်ခဲ့တဲ့ဘ၀လမ်းမှာ ကြမ်းတမ်းတာတွေလည်း ဆုံခဲ့ကြုံ ခဲ့ရတယ်။ ဘ၀ကလိုက်လျောညီထွေတဲ့ ဘ၀တစ်ခုမှာနေထိုင်တတ်ဖို့ပဲ လိုတယ်။ အချိန်ဆိုတာကို ဘ၀လို့ ခံယူထားတယ်။ ရိုးသားမှုနဲ့ တည်ဆောက်ထားတဲ့ဘ၀ထက် ဘယ်ဘ၀ကမှ စိတ်ချမ်းသာမှုကို ရရှိစေမှာမဟုတ် ဘူး။ ပြောင်းလဲလာတဲ့အတိုင်း ကိုယ့်ဘက်ကအလိုက်သင့်မရွေ့တတ်ရင်တော့ ဘ၀ဟာအဆင်ပြေမှာမဟုတ် ဘူး။ ဘ၀ဟာကရင့်ကျက်လေ ပိုပြီးတည်ငြိမ်လေပဲ။

ပြောင်းလဲလာတဲ့နေရာနဲ့ ဇာတ်ကောင်ကာရိုက်တာ…
အရွယ်တွေရဲ့ ပြောင်းလဲလာတဲ့ ဇာတ်ကောင်တွေနဲ့ နေရာနဲ့ ကာရိုက်တာအပေါ်မှာ လိုက်လျောညီ ထွေစွာလုပ်နိုင်ဖို့ပဲလိုတယ်။ မကြီးစိုးတို့ အရွယ်နဲ့လိုက်ဖက်တဲ့ကာရိုက်တာကို ရွေးချယ်တတ်လာတယ်။ ၀ါသနာရှင်အသစ်တွေအတွက် ကိုယ်သင်ယူရရှိခဲ့တဲ့ အနုပညာဝမ်းစာတွေနဲ့ လက်တွဲခေါ်လာခဲ့ကြတယ်။ ကိုယ်လုပ်ခွင့်ရတဲ့အချိန် လုပ်နိုင်တဲ့အချိန်မှာ အကောင်းဆုံးလုပ်ခဲ့တဲ့ရလဒ်ဟာ အခုအချိန်မှာ နေရာဆိုတာ ရှိနေတယ်။ ဘ၀အတွက် အနုပညာနဲ့ အာမခံချက်ရအောင်ယူနိုင်ခဲ့တယ်။ အနုပညာလောကထဲမှာ ကိုယ်မွေး ထုတ်ထားတဲ့ တပည့်ဆိုတာတော့ မရှိပါဘူး။ သင်ယူလေ့လာမှုကို လက်ဆင့်ကမ်းပေးချင်ပေမယ့် ယူချင်တဲ့သူ ယူတတ်တဲ့ သူရှိမှလည်းဖြစ်တာ။ ဘ၀မှာ သေချာတာဘာမှမရှိဘူး။ သေချာတာကတော့ မတည်မြဲခြင်းပါပဲ။ ကိုယ်ခံယူထားတဲ့ အတိုင်းလည်းလုပ်ခဲ့ပြီးပြီ။ အောင်မြင်မှုကိုလည်းရယူပိုင်ဆိုင်ခဲ့ပြီးပြီ။ ဘ၀မှာ ကြုံလာသမျှကို မတုန်လှုပ်ဘဲရင်ဆိုင်ခဲ့တယ်။ အနိုင်အရှုံးဆိုတာရှိတဲ့လောကထဲမှာ အနိုင်မလိုချင်သလို အရှုံးလည်းမပေးတတ် ဘူး။ ချီးကျူးတာလည်းခံရမယ်။ ဝေဖန်တာလည်းရှိမယ်။ လူတွေပြောနေကြာတာတော့ ဘယ်တော့မှရပ်သွား မှာမဟုတ်ဘူး။ ကိုယ့်လမ်းကိုယ် တည့်တည့်လျှောက်ခဲ့တယ်။ ကိုယ့်ကိုယ်ကိုယ် ယုံကြည်ချက်ရှိတဲ့သူဟာ ဘ၀ရဲ့ခါးသီးမှုတွေအပေါ်မှာ ဘယ်တော့မှ တုန်လှုပ်နေမှာမဟုတ်ဘူး။ ဘ၀ကိုအဓိပ္ပါယ်မရှိတဲ့ အချိန်တွေနဲ့ တော့မဖြတ်သန်းချင်ပါဘူး။ ဘ၀၀မ်းစာသင်ခန်းစာတွေဟာ ရင့်ကျက်မှုတွေရဲ့နောက်မှာ ပိုလာနိုင်စရာပဲ ရှိပါတယ်။

ဇာတ်ပို့ဇာတ်ရံဆိုတာကတော့…
ဇာတ်ကားတစ်ကားမှာ ဇာတ်ကိုအဓိကဦးဆောင်နေတယ်ဆိုတဲ့ မင်းသားမင်းသမီးမဟုတ်ရင် ကျန်တဲ့ သူတွေကို ဇာတ်ပို့ဇာတ်ရန်လို့ပြောကြတယ်။ တကယ်တော့ ဇာတ်ကားတစ်ကားထဲမှာပါတဲ့သူ တွေအားလုံးဟာ သရုပ်ဆောင်တွေပါ။ စာတန်းထိုးရင်ဇာတ်ပို့ဇာတ်ရန်ဆိုပြီးမထိုးပါဘူး။ ကျွန်မတို့ကိုကားရိုက်ဖို့လာကမ်းလှမ်းရင် လည်း ဇာတ်ပို့ဇာတ်ရံဆိုပြီး လာငှားတာမဟုတ်ပါဘူး။ ဇာတ်ကိုအဓိကပံ့ပိုးနေတာနဲ့ ပါးပါးလေးပံ့ပိုး နေတာပဲ ရှိပါတယ်။ ဇာတ်ပို့ဇာတ်ရံဆိုတာ ဘာကိုကြည့်ပြီးခွဲခြား သတ်မှတ်တာလဲ။ နေရာတစ်ခုအနေနဲ့ခွဲခြားတယ် ဆိုတာ ဇာတ်လမ်းအရ ဇာတ်ကောင်အရဖြစ်နေတာကလွဲရင် အားလုံးကသရုပ်ဆောင်တွေပါ။ အခုရိုက်နေ တာလဲ သရုပ်ဆောင်နေရတာပဲ။ ခေါင်းဆောင်ဆိုတဲ့နေရာက ရိုက်နေတုန်းပါဘဲ။ ဇာတ်ကားတစ်ကားမှာ ဇာတ်ပို့ဇာတ်ရံဆိုတာမရှိဘူး။ ဇာတ်ကားတစ်ကားလုံးကို မင်းသားမင်းသမီးဆိုသူတွေနဲ့လဲ ရိုက်လို့မရဘူး။ ဇာတ် ကိုအဓိကပံ့ပိုးပေးတဲ့သူတွေပါတယ်။ အခုနောက်ပိုင်းမှာ ခေါင်းဆောင် မင်းသား၊ မင်းသမီးမပါဘဲရိုက်နေကြတဲ့ ဇာတ်ကားမျိုးတွေလဲရှိတယ်။ ဇာတ်ကိုပို့ပေး ရံပေးတဲ့သူတွေလည်းရှိတယ်။ မင်းသားမင်းသမီး တွေကောင်းပြီး ဇာတ်ပို့ဇာတ်ရံဆိုသူတွေ မလုပ်နိုင်ဘူးဆိုရင်လည်းမဖြစ်ဘူး။ ဇာတ်ကားတစ်ကားကို တစ်ဦးတစ်ယောက်တည်း နဲ့လည်းမပြီးဘူး။ အနုပညာရှင်တွေ၊ သရုပ်ဆောင်တွေပါမှဖြစ်မယ်။ အားလုံး မှာသူ့အရည်အချင်းနဲ့သူရှိပြီး သားပါ။ ကိုယ်တွေလည်း ခေါင်းဆောင်မင်းသမီးကနေ အသက်အရွယ်အရကာရိုက်တာတွေ ချိန်းလာတာပါ။ အားလုံးက ဇာတ်လမ်းအရ ကိုယ်နဲ့လိုက်ဖက်တဲ့ဇာတ်ကောင်ကို သရုပ်ဆောင်နေကြတာ။ အားလုံးက သရုပ်ဆောင်တွေချည်းပါဘဲ။

မျိုးဆက်သစ်အတွက်မှတ်ချက်
အနုပညာလောကထဲမှာ မျိုးဆက်သစ်ဆိုတာကတော့လိုပါတယ်။ အသစ်တွေနဲ့ ဆက်သွားနေရတာ လောကပဲလေ။ အသစ်တွေကအားကောင်းကောင်းနဲ့ တက်နေတဲ့အချိန်မှာ အဟောင်းတွေလဲ ကိုယ့်အနုပညာ အားမကျသွားအောင် သစ်နေအောင်လုပ်ဖို့ပဲလိုတယ်။ အသစ်တွေနဲ့တွဲပြီး ရိုက်ခဲ့တဲ့ဇာတ်ကားတွေမှာ ကိုယ်တွေတတ်နိုင်တဲ့ဘက်က တွဲခေါ်ပါတယ်။ ကျွန်မတို့ရုပ်ရှင်ဗီဒီယိုမှာ ပရိသတ်တွေအတွက် ထူးခြားမဲ့ ဇာတ်လမ်း အသစ်တွေလည်းလိုတယ်။ စိတ်ကူးကောင်း ပညာကောင်းတဲ့ဒါရိုက်တာ အသစ်တွေလည်းလိုသလို မင်းသားအသစ်လေးတွေ၊ မင်းသမီးအသစ်လေးတွေလည်း လိုပါတယ်။ အသစ်တွေထဲက ပရိသတ်လက်ခံတဲ့ သရုပ်ဆောင်အစစ်တွေ ဖြစ်ဖို့တော့လိုတာပေါ့။ အသစ်တွေများလာရင်အဟောင်းတွေ ပိုကြိုးစားရမယ်။ မကြီးစိုးကတော့ ကိုယ့်အသက်အရွယ်နဲ့ ကိုယ်လုပ်ရမယ့်နေရာ ကာရိုက်တာ အပေါ်မှာ လိုက်ဖက်အောင်သရုပ် ပြီး ကိုယ့်နေရာမှာ ကိုယ့်တာဝန်ကျေချင်တယ်။ ရေရှည်ရပ်တည်နိုင်ကြပြီး အနုပညာဝမ်းစာကောင်းကောင်းနဲ့ ပရိသတ်လက်ခံအားပေးတဲ့ သရုပ်ဆောင်ကောင်းတွေ ဖြစ်စေချင်ပါတယ်။

အလှအပနဲ့ပတ်သက်ပြီးတော့လဲ မကြီးစိုးတို့အသက်အရွယ်မှာ အမျိုးသမီးတွေက အိပ်တာစားတာ မှန်ဖို့လိုတယ်။ မကြီးက အလုပ်လဲ များတော့ သိပ်မလုပ်ဖြစ်ဘူး။ ဒီအသက်အရွယ်ရောက်လာတဲ့ မိန်းမတစ်ယောက်အတွက် ပိန်တာဝတာ ခဏခဏဖြစ်တတ်တယ်။ ပုံမှန် မကြီးစိုးလုပ်နေတဲ့ Exercise က အရမ်းလွယ်ပါတယ်။ တစ်နေ့ကို တစ်နာရီ လောက်လမ်းလျှောက်နိုင်ရင် မဆိုးဘူး။ ကိုယ်က အဲဒါကိုမလျှောက်နိုင်တာ။ အသက်ကကြီးလာလေ အပျင်းကြီးလာလေပဲ။ ကိုယ်ကလည်းပင်ပန်းနေတာဆိုတော့ မလုပ်ဖြစ်တာပါ။ မိတ်ကပ် လိမ်းတာကတော့ ပြောင်းမသုံးဖြစ်ဘူး။ မကြီးက အသားအရေ မကောင်းလို့ပါ။ မကြီးရဲ့မျက်နှာက ၀က်ခြံပေါက်တဲ့အသားအရေ။ ဒါကြောင့်မို့ Total Skin တော့သွားတယ်။ Skin Care ကိုတော့ သေချာသုံးတယ်။ Nu Skin ဆိုတာ ကိုသုံးတယ်။ ၀တ်စားဆင်ယင်မှု အပိုင်းမှာဆိုရင် မကြီးစိုးတို့က ဗမာအမျိုးသမီးဖြစ်တဲ့အတွက် ကိုယ့် ယဉ်ကျေးမှုနဲ့ လိုက်ဖက်မယ့်ဝတ်စားဆင်ယင်မှုမျိုး၊ ကိုယ့်အသက်အရွယ်နဲ့ လိုက်ဖက်တဲ့ဝတ်စားဆင်ယင်မှုမျိုး အဲဒါလေးတွေကိုတော့ခွဲခြားပြီး ရွေးချယ်ဝတ်ဆင်ပါတယ်။



--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

#အပတ်စဉ်စနေနေ့တိုင်းထွက်ပြီ #စိတ်ရွှင်လန်းဖို့စာဖတ်စို့
#Weekly #Saturday #ရှိတ်ပ်


Share on Google Plus

0 comments:

Post a Comment