ကြက်ချဉ်စပ်(မွန်စတိုင်လ်)၊ ခ၀ဲသီးကြော်ချက်၊ ပဲကြီးဆူးပုတ်နှပ်












ရာသီစာမရမ်းသီးစိမ်းလေးတွေပေါ်နေတုန်း ကြက်ချဉ်စပ်ကို အရည်သောက်လေးချက်လိုက်မယ်။ မွန်စတိုင်လ်လေးတွေလည်း မချက်ရမစားရတာကြာနေပြီဆိုတော့လေ မယ်တော်မားသားရော ကိုယ်ပါ ကြိုက်မိတဲ့ တိုင်းရင်းသားရိုးရာဟင်းလေးတစ်ပွဲပေါ့နော်။ အရံဟင်းတစ်မျိုးကိုတော့ မယ်တော်မားသားအကြိုက် ခ၀ဲသီးကို ပုဇွန်လေးနဲ့ကြော်ချက်လေးချက်မယ်။ နောက်နှစ်မျိုးကိုတော့ ကိုယ့်အကြိုက် ပဲကြီးနဲ့ဆူးပုတ်လေး နှပ်လိုက်မယ်။ နှစ်မျိုးစလုံးကတော့ ကြက်ချဉ်စပ်လေးနဲ့လိုက်မှလိုက်ပဲပေါ့ဆွေမျိုးတို့ရာ။ ခ၀ဲသီးနဲ့ပုဇွန်က ချိုချိုလေး ပဲကြီးနဲ့ဆူးပုတ်နှပ်က ဆိမ့်ဆိမ့်မွှေးမွှေးလေးဆိုတော့ တွဲစားလိုက်ရရင် ကောင်းမှကောင်းပဲပေါ့နော်။

ကြက်ချဉ်စပ်(မွန်စတိုင်လ်)
ကြက်ကိုတော့ ဗမာကြက်မနုမရင့်လေးပဲသုံးပါ့မယ်။ ကြက်သားကို အနေတော်လေးတွေတုံးပြီး ငါးငံပြာရည်လေးနဲ့နယ်ပြီး ခဏနှပ်ထား။ မရမ်းသီးစိမ်းနဲ့ငရုတ်သီးစိမ်းကို မညက်တညက်ထောင်းထား။ စိမ်းစားငါးပိလေး စားပွဲတင်ဇွန်းတစ်ဇွန်းလောက်ကို မီးပြထား။ ရှမ်းနံနံကို ရေဆေးပြီးအနေတော်လေးတွေ လှီးထား ကြက်သွန်ဖြူနီရောထောင်းထားတာကို နနွင်းမှုန့်နည်းနည်းထည့်ပြီး ဆီသတ်။ မွှေးလာပြီဆိုရင် မီးပြထားတဲ့ စိမ်းစားငါးပိလေပါထည့်။ ဆီသတ်ပြီးမှ နှပ်ထားတဲ့ကြက်သားထည့်ပြီး ခပ်နာနာလေးလုံးပေး။ ရေထည့်ပြီးနူးအောင်တည်။ အရသာအပေါ့အငန်လိုရင် ကြက်သားမှုန့်လေးထည့်။ ကြက်သားနူးခါနီးကျမှ ရောထောင်းထားတဲ့ ငရုတ်သီးစိမ်းနဲ့ မရမ်းသီးစိမ်းထည့်၊ ရေကိုခပ်များများလေးထည့်ထား။ ဒါမှ အရည်သောက် သောက်ဆမ်းပုံစံမျိုးလေးရမှာပေါ့။ အရည်နဲ့အရသာစိတ်ကြိုက် ချဉ်ချဉ်ငံငံစပ်စပ်လေးလည်းရ ကြက်သားလည်း နူးပြီဆိုရင် အပေါ်ကနေ ရှမ်းနံနံလေးအုပ်လိုက်ရင် မွန်စတိုင်လ်ကြက်ချဉ်စပ်မွှေးမွှေးလေးရပြီပေါ့ ဆွေမျိုးတို့ရာ။

ခ၀ဲသီးကြော်ချက်
ခ၀ဲသီးကို ပုဇွန်လေးနဲ့အချိုလေးကြော်ချက်ပုံစံ ချက်မှာဆိုတော့ ခ၀ဲသီးကို အခွံခွာရေသေချာဆေးပြီး အနေတော်တုံးထား။ ပုဇွန်ကို အခွံခွာထား၊ ကြက်သွန်နီဥလတ် တစ်ဥလောက်ကို မထူမပါးလေးလှီးပြီး ဆီအရင် သတ်ပြီးရင် ပုဇွန်ပါထည့်ပြီးလုံးပေး။ ကြက်သွန်နီရော ပုဇွန်ပါစိမ်းနံ့ပျောက်လို့ မွှေးလာပြီဆိုမှ ခ၀ဲသီးထည့် ခပ်နာနာလေးလုံးပေး။ အရသာအတွက်က ဆားလေးသင့်ရုံထည့်ရင်ရပါပြီ။ ရေလေးနည်းနည်းထည့်ပြီး ခ၀ဲသီး နူးတဲ့အထိတည်ထား။ ခ၀ဲသီးနူးလို့အရည်လေးလည်း ဆီကျန်ရေကျန်အနေအထားလေးရပြီဆိုရင် ချက်လို့ လည်းလွယ် စားလို့လည်းကောင်းတဲ့ ခ၀ဲသီးကြော်ချက်ဟင်းတစ်ပွဲရပါပြီ။

ပဲကြီးဆူးပုတ်နှပ်
ပဲဘကီးကိုရေစိမ်ထားပြီးသားဝယ်တာဆိုတော့ မကောင်းတာလေးတွေပဲရွေးပစ်ပြီး ရေစင်စင်ဆေး ရေပြန်စစ်ထားပေါ့နော်။ ကြက်သွန်နီကို ခပ်ပါးပါးလှီးပြီး ရွှေညိုရောင်လေးရတဲ့အထိကြော်ပြီး ပြန်ဆယ်ဆီစစ် ထား။ အရင့်တွေဖယ်ပြီး အနေတော်ခြွေထားတဲ့ ဆူးပုတ်ရွက်ကို ခုနကကြက်သွန်နီကြော်ထားတဲ့ ဆီထဲထည့်ပြီး ခဏဆီသတ် ပြန်ဆယ်ထား။ ပြီးမှ ကြက်သွန်နီနဲ့ဆူးပုတ်ကြော်ထားတဲ့ဆီထဲကို ပဲကြီးထည့်ပြီး ခပ်နာနာလေး လုံးပေး။ နနွင်းမှုန့်နဲ့ဆားလေးပါ တစ်ခါတည်းသင့်ရုံထည့် ရေထည့်ပြီးနူးအောင်တည်။ ပဲကြီးကိုအရည်သောက် မဟုတ်ဘဲ နှပ်တာဆိုတော့ အစေ့လေးတွေပုံစံမပျက်အောင် မွှေပေးတဲ့အခါ ခပ်ဖြည်းဖြည်းလေးမွှေပေးပေါ့နော်။ ဒါမှဟင်းပွဲလေးကပိုလှအောင်ပေါ့။ ပဲကြီးလည်းနူး ရေလည်းခန်း၊ ဆီလည်း ပြန်လာပြီဆိုမှ ကြော်ထားတဲ့ ဆူးပုတ်ရွက်လေးထည့်မွှေပေးပြီး အပေါ်ကနေကြက်သွန်နီကြော်ကြွပ်ကြွပ်လေးတွေဖြူးပေးလိုက်ရင် ပဲကြီးဆူးပုတ်နှပ်ဟင်းလေး တစ်ပွဲရပြီပေါ့။

ဒီတစ်ပတ်တော့ ဒီလောက်ပဲချက်ကြတာပေါ့ဆွေမျိုးတို့ရာ။ နောက်တစ်ပတ်တော့ နောက်တစ်မျိုးချက်ဖို့ ပြန်ဆုံကြတာပေါ့။ အားလုံးအဆင်ပြေပျော်ရွှင်ကြပါစေ။

 Royal

--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 

Share on Google Plus

0 comments:

Post a Comment