ကင်းမွန်သုပ်၊ ရွှေဖရုံသီးဟင်းရည်၊ ကန်စွန်းပလိန်း










ဒီတစ်ပတ်နားရက်လေးမှာတော့ သူငယ်ချင်းတစ်ယောက် လက်ဆောင်လာပေးလို့ရထားတဲ့ ကင်းမွန်ကို ချဉ်ချဉ်စပ်စပ်ရခိုင်စတိုင်လ်လေးသုပ်မယ်၊ နောက်ပြီး မယ်တော်မားသားစားချင်နေတဲ့ ရွှေဖရုံသီးကို ဟင်းရည်ချက်လိုက်မယ်၊ ရွှေဖရုံသီးချက်တယ်ဆိုတော့ တတ်တာလေးပြေအောင် ကန်ဇွန်းပလိန်းလေးပဲ ကြော်လိုက်တော့မယ်။ ဒီလောက်ဆိုရင်တော့ မယ်တော်မားသားနဲ့ ကျွန်တော်သားမိနှစ်ယောက်ကတော့ စားလို့ကောင်းမှာ သေချာတယ်ဗျာ။

ကင်းမွန်သုပ်
လက်ဆောင်ရထားတဲ့ ကင်းမွန်က တစ်ကောင်တည်းနဲ့တင် တစ်ပိဿာလောက်ရှိတဲ့အကြီးစား မျိုးဆိုတော့ သုပ်စားလို့ကတော့ ကောင်းမှကောင်းပဲပေါ့ဆွေမျိုးတို့ရာ အဲ့လောက်ကြီးတဲ့အကောင်မရလည်း ရသလောက်ကိုပဲ သုပ်စားလည်း အဆင်ပြေပါတယ်။ ကင်းမွန်ကို ခေါင်းကနေ အသာလေးထိန်းပြီး မှင်အိပ်ပါ အောင်ဆွဲဖြုတ်လိုက်မယ်။ ပြီးရင် မှင်အိတ်မပေါက်အောင် အသာလေးဖယ်၊ ကင်းမွန်ပါးစပ်နဲ့ မျက်လုံးကိုလည်း ဖယ်လိုက်မယ်။ ကိုယ်လုံးကိုတော့ ဗိုက်ဘက်ကနေခွဲပြီး အပေါ်ယံအရေခွံကိုခွာ၊ ရေစင်စင်ဆေးထား၊ ရေအရင် ဆူအောင်တည်၊ ရေဆူလာမှသံပုရာသီးတစ်လုံးကို လေးစိပ်စိပ်ထည့်၊ ကြက်သွန်ဖြူနဲ့ရေစင်စင်ဆေးထား၊ နံနံပင် အမြစ်မြစ်ကို ဓါးပြားရိုက်ထည့်၊ ငရုတ်ကောင်းအစေ့နှစ်ဆယ်လောက်ထည့်ပြီးမှ ကင်းမွန်ထည့်ပြီး သုံးမိနစ်လောက်ပြုတ်၊ ဒါဆိုရင်တော့ ကင်းမွန်ကမွှေးပြီး စားလို့လည်းပိုကောင်းသွားတာပေါ့နော်။
နံနံပင်ကိုခပ်ပါးပါးလှီးထား၊ ငရုတ်ကောင်းစေ့၊ ကြက်သွန်ဖြူငရုတ်သီးစိမ်းနဲ့ မီးကင်ထားတဲ့ပုဇွန် ငါးပိနည်းနည်း ကို ညက်အောင်ထောင်းထား၊ သံပုရာသီးကိုလည်း လိုသလောက်မှန်းပြီးအရည်ညှစ်ထား၊ ကင်းမွန်ကို အဆင်ပြေသလို မထူမပါးလေးလှီးထားတဲ့အထဲကို ခုနက အဆာပလာတွေအကုန်ထည့်နယ်၊ အငန်လိုရင် ပုဇွန်ငံပြာရည်လေးထည့်၊ အချိုလိုရင်ပျားရည်လေးထည့်၊ ဒါဆိုရင်တော့ စားလို့အရမ်းကောင်းတဲ့ကင်းမွန်သုပ်၊ ချိုချဉ်စပ်မွှေးလေးရပြီပေါ့။

ရွှေဖရုံသီးဟင်းရည်
ရွှေဖရုံသီးအနေတော်တစ်လုံးကို ခဲပတ်နဲ့လုံအောင်ထုတ်ပြီး မီးဖုတ်ထား၊ ပြီးမှ အခွံ၊ အစေ့နဲ့ အလယ် အူတွေဖယ်ပြီး ဖျော်ရည်ဖျော်စက်ထဲ ရေနည်းနည်းပါထည့်ပြီး ညက်အောင်ကြိတ်ထား၊ ဂျင်းကို ဓါးပြားရိုက်ပြီး အရင်ဆီနည်းနည်းနဲ့ဆီသတ်၊ ပြီးမှ ကြိတ်ထားတဲ့ရွှေဖရုံသီးအရည်ထည့်ပြီး ဆူလာအောင်တည်၊ အပေါ့အငန် အတွက်က ဆားလေးနည်းနည်းထည့် ဒါဆိုရင်တော့ ရွှေဖရုံသီးဟင်းရည် ချိုချိုလေးရပြီပေါ့နော်။

ကန်ဇွန်းပလိန်း
တရုတ်ကန်ဇွန်းရွက်ပွပွကြီးတွေကို အနေတော်ခြွေ၊ ရေသေချာဆေးပြီး ရေပြန်စစ်ထား၊ ကြက်သွန်ဖြူနဲ့ ငရုတ်သီးစိမ်းကို ဓါးပြားရိုက်ထား၊ ကော်ရည်အရည်ခပ်ကျဲကျဲဖျော်ထား၊ အိုးထဲကဆီပူလာရင် ဆားနည်းနည်း အရင်ထည့်၊ ကန်ဇွန်းရွက်၊ ကြက်သွန်ဖြူ၊ ငရုတ်သီးစိမ်း၊ ပဲငံပြာရည်အကြည် ခရုဆီ၊ ဆား၊ သကြား၊ ကြက်သား မှုန့်၊ သင့်ရုံထည့်ပြီး မီးပြင်းပြင်းနဲ့ကြော် ကန်ဇွန်းရွက်ကို အရမ်းမနူးသွားစေဘဲ ခပ်စိမ်းစိမ်းနဲ့ ကြွပ်ကြွပ်လေးရပြီ၊ အရသာကလည်းချိုချိုငန်ငန်လေးနဲ့ စပ်တဲ့အရသာက ပါလေဟန်လေးရပြီဆိုမှ ခုနကဖျော်ထားတဲ့ ကော်ရည် ကျဲကျဲလေးထည့်ပြီးမွှေပေးလိုက်ရုံပါပဲ။

ဒါဆိုရင်တော့ ဆိုင်မှာကြော်စားသလိုမျိုး ကန်ဇွန်းပလိန်းလေးတစ်ပွဲရပြီပေါ့ ဆွေမျိုးတို့ရာ။
ဒီတစ်ပတ်ကတော့ဒီလောက်ပဲချက်ကြတာပေါ့။ နောက်တစ်ပတ်မှ နောက်တစ်မျိုးချက်ဖို့ ပြန်ဆုံ ကြတာပေါ့နော်။ အားလုံးအဆင်ပြေပျော်ရွှင်ကြပါစေ။

Royal
--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 

Share on Google Plus

0 comments:

Post a Comment