ငါးနီတူခြောက်အစပ်ကြော်၊ သီးစုံချဉ်ဟင်း၊ ပဲထောပတ်နှပ်













ဒီတစ်ပတ်ကတော့ ငါးနီတူခြောက်လေးကို ခပ်စပ်စပ်လေးကြော်မယ်။ ပြီးရင် လိုက်လည်းလိုက်ဖက် မယ်တော်မားသားလည်း ကြိုက်တဲ့သီးစုံချဉ်ဟင်းလေးချက်၊ ပဲထောပတ်လေးနှပ်လိုက်မယ်ဆိုရင် မိသားစု ထမင်းဝိုင်းလေးမှာ အရသာစုံစုံလင်လင်လေးနဲ့ စားလို့ကောင်းမှာသေချာတဲ့ ဟင်းပွဲအတွဲအစပ်လေးရပြီပေါ့ ဆွေမျိုးတို့ရာ။ ကျွန်တော်တို့မြန်မာတွေအရမ်းကြိုက်ကြတဲ့ ဟင်းလေးတွေပေါ့နော်။
ငါးနီတူခြောက်လေးတွေကို ခေါင်းနဲ့ဗိုက်တွေစင်အောင်ဖဲ့ပြစ်၊ သူက ခေါင်းကြီးပဲဖဲ့ပြစ်လို့မရဘူးလေ၊ ဗိုက်ကျန်နေခဲ့ရင်ခါးတတ်လို့ပါ။ ပြီးမှ ရေစင်စင်ဆေးပြီးရေပြန်စစ်ထား၊ ရေစစ်သွားပြီဆိုမှ ဆားလေးနည်း နည်းနဲ့ နယ်ပြီးမှဆီပူပူမှာကြွပ်တဲ့အထိ ကြော်လိုက်ပေါ့နော်။ ကြွပ်ကြွပ်လေးရပြီဆိုမှ ဆယ်ပြီး ဆီပြန်စစ်ထား၊ ငရုတ်သီးခွဲခြမ်းနဲ့ကြက်သွန်ဖြူကိုရောထောင်း၊ ပြီးရင် နနွင်းမှုန့်နည်းနည်းထည့်ဆီသတ်၊ ငါးငံပြာရည်လေး ပါနည်းနည်းထည့်၊ မွှေးပြီးကြွပ်လာပြီဆိုမှ ခုနကြော်ထားတဲ့ ငါးနီတူခြောက်လေးတွေထည့်မွှေပေးလိုက်ရင် ငါးနီတူခြောက်အစပ်ကြော် ကြွပ်ကြွပ်လေးတစ်ပွဲရပြီပေါ့။

သီးစုံချဉ်ဟင်း
သီးစုံချဉ်ဟင်းအတွက် ဘူးသီး ခရမ်းသီး၊ ရုံးပတီသီး၊ ပဲသီး၊ ဒန့်ဒလွန်သီးတွေကို အခွံခွာသင့်တာခွာ၊ ခြစ်ထုတ်ပြစ်သင့်တာခြစ်ထုတ်ပြစ်ပြီး ရေစင်စင်ဆေးပြီး အနေတော်တုံးထားပြီးရင် ငရုတ်သီးအရောင်တင်မှုန့်နဲ့ ကြက်သွန်ရောထောင်းထားတာကို နနွင်းမှုန့်သင့်ရုံဆီသတ် ပုဇွန်ခြောက်မှုန့်လေးပါထည့်၊ စိမ်းနံ့ပျောက်လို့ မွှေးလာပြီဆိုမှ ငါးငံပြာရည်လေးပါ သင့်ရုံထည့်ပြီးမှ ဒန့်ဒလွန်သီးအရင်ထည့်၊ သူက ချက်ရတာကျန်တဲ့ဟာ တွေထက်ကြာလို့ပါ။ ကျန်တဲ့အသီးတွေကိုလည်း ချက်ရတာကြာတဲ့အချိန်ပေါ်မူတည်ပြီး ထည့်ပေါ့နော်။ အားလုံးထည့်လုံးပြီးပြီဆိုမှ ရေထည့်၊ အရသာလိုအပ်ရင်တော့ ဆားနဲ့ကြက်သားမှုန့်လေးထည့်ပေးလိုက် ပေါ့နော်။ အားလုံးအဆင်ပြေပြီဆိုမှ မန်ကျည်းမှည့်ရည်လေး သင့်တော်ရုံထည့်ပေးလိုက်မယ်ဆိုရင်တော့ သီးစုံချဉ်ဟင်းချိုချိုချဉ်ချဉ်လေး ရပြီပေါ့ဆွေမျိုးတို့ရာ

ပဲထောပတ်နှပ်
သူကတော့လွယ်ပါတယ်။ ပဲထောပတ်ကိုအခွံခွာရေစင်စင်ဆေး။ ရေစစ်ထား၊ ကြက်သွန်ဖြူ တစ် တစ်လောက်ကို အခွံခွာဓါးပြားရိုက်ပြီးစဉ်းစား၊ ကြက်သွန်နီကိုခပ်ပါးပါးလှီးပြီး ရွှေညိုရောင်ရတဲ့အထိ ကြော်  ဆယ်ပြီး ဆီစစ်ထားပြီးမှ ကြက်သွန်ဖြူဓါးပြားရိုက်စဉ်းထားတာကို ဆီသတ်၊ စိမ်းနံ့ပျောက်လို့မွှေးလာပြီဆိုမှ ပဲထောပတ်ထည့်၊ နနွင်းမှုန့်ပါသင့်ရုံထည့်ပြီး ခပ်နာနာလေးလုံးပေး၊ ရေထည့်ပြီးနူးအောင်တည်၊ အရသာ အတွက်ကတော့ ပဲထောပတ်ကချိုချိုဆိမ့်ဆိမ့်မို့ ဆားလေးပဲသင့်တော်ရုံထည့်ရင်ရပါပြီ။ ပဲထောပတ်လည်း နူးအိ၊ ဆီလေးလည်းပြန်၊ အရသာအပေါ့အငန်လည်း စိတ်ကြိုက်ရပြီဆိုရင်တော့  အပေါ်ကနေ ကြက်သွန်နီ ကြော်လေး ဖြူးပေးလိုက်ရုံပေါ့။
ဒါဆိုရင်တော့ ငါးနီတူခြောက် အစပ်ကြော်စပ်စပ်ကြွပ်ကြွပ်လေးရယ် သီးစုံချဉ်ဟင်းချိုချိုချဉ်ချဉ် လေးရယ်နဲ့ ပဲထောပတ်ချိုချိုဆိမ့်ဆိမ့်လေးရယ်ဆိုတော့ စားလို့ကတော့ကောင်းမှကောင်းပဲဗျာ။ ဒီတစ်ပတ် တော့ ဒီလောက်ပဲချက်ကြတာပေါ့နော်။ ဒီတစ်ပတ်ကတော့ဒီလောက်ပဲချက်ကြတာပေါ့။ နောက်တစ်ပတ်မှ နောက်တစ်မျိုးချက်ဖို့ ပြန်ဆုံ ကြတာပေါ့နော်။ အားလုံးအဆင်ပြေပျော်ရွှင်ကြပါစေ။
Royal
--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 
Share on Google Plus

0 comments:

Post a Comment