ဝက်နံရိုးကြံမဆိုင်၊ ပဲပုပ်ကြော်၊ တို့ဟူးသုပ်












ဒီတစ်ပတ်တော့ မယ်တော်မားသားစားချင်တယ်ပြောတဲ့ ၀က်နံရိုးကို ကြံမဆိုင်နဲ့အရည်သောက် လေးချက်မယ်။ ပြီးတော့ ပဲပုပ်ကိုပုဇွန်ခြောက်လေးထည့်ပြီး စပ်စပ်လေးကြော်မယ်၊ တို့ဟူးသုပ်မယ်။ ဒါဆိုရင်တော့ မယ်တော်မားသား စားချင်တာလည်းပါ အရသာလည်း စုံစုံလင်လင်လေးနဲ့ဆိုတော့ ဒီတစ် ပတ်ပိတ်ရက်လေးမှာ ထမင်းစားလို့တော့ ကောင်းဦးမှာပဲပေါ့ဆွေမျိုးတို့ရာ။ အမှန်ကတော့ ပဲပုပ်ကို ဒီတိုင်း ကြော်ကြတာများပေမယ့် ကိုယ့်စတိုင်လ်လေးနဲ့ကိုယ် ပုစွန်ခြောက်လေးထည့်ပြီး ငန်ငန်စပ်စပ်လေး ကြော်စားချင်တဲ့စိတ်ကူးပေါ်လာလို့ တို့ဟူးကိုတော့ သုပ်နေကျချိုချဉ်စပ်လေးမဟုတ်ဘဲ စပ်ဆိမ့်လေး ပဲသုပ်လိုက်မယ်။ ၀က်နံရိုးကြံမဆိုင်မှာ အချဉ်ကပါထားပြီးသားဆိုတော့ လေပွားတာလေးရပ်ပြီး ချက်ရေး ပြုတ်ရေးစကြရအောင်လား။

ဝက်နံရိုးကြံမဆိုင်
ဝက်နံရိုးအသားများများနဲ့ အရိုးနုပါတာလေးကို အနေတော်တုံး၊ ဆား၊ သကြား၊ ပဲငံပြာရည်အကြည် နဲ့နယ်ပြီး ခဏနှပ်ထား၊ ကြက်သွန်ဖြူလေးငါးတက်လောက်ကို အခွံခွာ၊ ဓါးပြားရိုက်ထား၊ ကြံမဆိုင်ကို အရည်ညှစ်ပြီး အနေတော်လေးတွေလှီးထား၊ အရည်ကိုတော့ အချဉ်အငန်အတွက် ချိန်ထည့်ရမှာမို့ လွှင့်မပြစ်သေးပဲ ခဏသိမ်းထား၊ ချက်မယ့်အိုးထဲကို ဆီနည်းနည်းထည့်ပြီး ခုနကနှပ်ထားတဲ့ ၀က်နံရိုးထည့်၊ ရေခန်းတဲ့အထိလုံးပေး။ ပြီးရင် ၀က်နံရိုးနူးခါနီးတဲ့အထိ ရေနည်းနည်းချင်းထည့်တည်။ နူးခါနီးမှ လှီးထားတဲ့ ကြံမဆိုင်ထည့်၊ ကြက်သွန်ဖြူဓါးပြားရိုက်ထားတာထည့်၊ အရသာမြည်းကြည့် အချဉ်အငန်လိုနေသေးရင် ကြံမဆိုင်အရည်လေးသင့်ရုံထည့်ပေး။ အရည်ကိုတော့ ခပ်များများလေးထားပေါ့နော်။ ဒါမှ ဆမ်းစားလို့ လည်းအဆင်ပြေ၊ သောက်ချင်လည်းသောက်လို့ရတာပေါ့။

ပဲပုပ်ကြော်
ပဲပုပ်ချပ်ကို အပိုင်းသေးလေးတွေရအောင်ဖဲ့ထား၊ ပုဇွန်ခြောက်ကို မညက်တညက်ထောင်းထား၊ ကြက်သွန်ဖြူနဲ့ ငရုတ်သီးခွဲခြမ်းကိုရောပြီး မညက်တညက်ဖြစ်တဲ့အထိ ထောင်းထားတာကို နနွင်းမှုန့် နည်းနည်းထည့်ပြီး ကြွပ်လာတဲ့အထိ ဆီသတ်၊ ကြွပ်လာပြီဆိုမှ ပုဇွန်ခြောက်မှုန့်ထည့်၊ ဆား၊ သကြား သင့်ရုံထည့်ပြီးမှ ဖဲ့ထားတဲ့ပဲပုပ်လေးတွေထည့်ပြီး မီးနည်းနည်းနဲ့ ကြွပ်လာတဲ့အထိကြော်လိုက်ရင်ပဲ ပုပ်ကြော်စပ်စပ်လေးတစ်ပွဲ အဆင်ပြေပြီပေါ့ဆွေမျိုးတို့ရာ။

တို့ဟူးသုပ်
တို့ဟူးကိုတော့ အလွယ်ပဲသုပ်တော့မယ်။ စပ်စပ်ဆိမ့်ဆိမ့်လေးပေါ့နော်။ ဈေးက၀ယ်လာတဲ့ တို့ဟူးလေ တွေကို အနေတော်လေးတွေ လှီးထား၊ ကြက်သွန်မြိတ်ကိုလည်းရေစင်စင်ဆေး ရေစစ်ပြီး ခပ်ပါးပါးလှီးထား၊ ကြက်သွန်ဖြူနဲ့ ငရုတ်သီးခွဲခြမ်းရောထောင်းထားတာကို နနွင်းမှုန့်ထည့်ပြီး ကြွပ်လာတဲ့အထိဆီသတ်၊ ပြီးမှ တို့ဟူးထဲထည့်နယ်၊ အရသာအတွက်ကတော့ ဆား၊ သကြားပဲသုံးတာပေါ့၊ အရသာက စပ်ဆိမ့်လေးနဲ့ အနေ တော်လေးရပြီဆိုမှ ခုနကလှီးထားတဲ့ ကြက်သွန်မြိတ်လေးထည့်နယ်လိုက်ရုံပေါ့။ ဒါဆိုရင်တော့ ၀က်နံရိုး ကြံမဆိုင်၊ ပဲပုပ်ကြော်နဲ့ တွဲစားလို့ အဆင်ပြေမယ့် တို့ဟူးသုပ်တစ်ပွဲရပြီပေါ့။ 

ဒီတစ်ပတ်တော့ ဒီတစ်ပတ်ကတော့ဒီလောက်ပဲချက်ကြတာပေါ့။ နောက်တစ်ပတ်မှ နောက်တစ်မျိုး ချက်ဖို့ ပြန်ဆုံကြတာပေါ့နော်။ အားလုံးအဆင်ပြေပျော်ရွှင်ကြပါစေ။

Royal

--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape


Share on Google Plus

0 comments:

Post a Comment