ကြက်သားစပါးလင်ချက်၊ သရက်ချဉ်သုပ်၊ အာလူးပဲကြာဇံဟင်းခါး













ဒီတစ်ပတ်နားရက်တော့ ဘာချက်မယ်ကြိုမစဉ်းစားထားဘဲ မနက်စောစောထပြီး မယ်တော်မားသားနဲ့ ဈေးလိုက်ပတ်မယ်။ တွေ့တာတွေထဲကမှ လတ်တာလေးနဲ့ စားလို့အဆင်ပြေမှာလေးပဲ ၀ယ်ချက်လိုက်တော့ မယ်စိတ်ကူးတယ်။ မယ်တော်မားသားနဲ့ မနက်ဈေးလိုက်ပတ်တော့ ဗမာကြက်မနုမရင့်လေးတွေ လတ်လတ် ဆတ်ဆတ်လေးတွေ့တော့ စပါးလင်လေးနဲ့ခပ်စပ်စပ်လေးချက်စားမယ် စိတ်ကူးတယ်။ ပြီးတော့ ပေါ်ဦး ပေါ်ဖျား သရက်ချဉ်လတ်လတ်ဆတ်ဆတ်လေးတွေ့တော့ သုပ်လိုက်မယ်ပေါ့နော်။
အရည်သောက်ကတော့ မယ်တော်မားသားက ပဲပင်ပေါက်လေးပဲဟင်းခါးချက်ကြရအောင်ဆိုတာနဲ့ ပဲပင်ပေါက်ဟင်းခါးပေါ့ဆွေမျိုးတို့ရာ ချက်ဖို့ပြုတ်ဖို့ဝယ်ပြီးပြီဆိုတော့ အိမ်ပြန်ချက်ရေးပြုတ်ရေး စတယ်ပေါ့။

ကြက်သားစပါးလင်ချက်
ဝယ်လာတဲ့ဗမာကြက်ကို သေချာရေဆေး မလိုတာတွေဖယ်ပြီးမှ အနေတော်လေးတွေတုံး ငါးငံပြာ ရည်နဲ့နယ်ပြီး ခဏနှပ်ထား။ စပါးလင်ကိုအရင့်တွေဖယ်ပြီး ရေသေချာဆေး၊ ဓါးပြားရိုက်ပြီး ပြန်ချည်ထား၊ ငရုတ်သီးအခြောက်တောင့်ခပ်များများနဲ့ ကြက်သွန်နီကိုရောပြီး ညက်အောင်ထောင်းထားတာကို နနွင်းမှုန့် နည်းနည်းထည့်ပြီး ဆီသတ်၊ စိမ်းနံ့ပျောက်လို့မွှေးလာခါနီးပြီဆိုရင် စပါးလင်ပါထည့်ပြီး ဆီသတ်၊ အားလုံးစိမ်းနံ့ ပျောက်ပြီဆိုမှ ခုနကနှပ်ထားတဲ့ကြက်သားထည့်ပြီး ခပ်နာနာလေးလုံးပေးပြီးမှ ရေနည်းနည်းချင်းထည့်ပြီးနူး အောင်တည်၊ အရသာအပေါ့အငန်လိုအပ်ရင် ကြက်သားမှုန့်နဲ့ ဆားလေးထည့်လိုက်ရုံပေါ့နော်။ ကြက်သား လည်းနူး၊ ဆီကျန်ရေကျန်အနေအထား၊ အရည်ခပ်များများလေးနဲ့ စပါးလင်နံ့လေးကလည်းမွှေး ငရုတ်သီးလေး ကလည်းစပ် ကြက်သားလေးကလည်း လတ်လတ်ဆတ်ဆတ်လေးဆိုတော့ ဟင်းရည်လေးကလည်း ချိုဆိုတော့ အမှန်ပြောရရင် ကျန်တဲ့ဟင်းတောင် သိပ်မလိုတော့သလိုပဲ။

သရက်ချဉ်သုပ်
ဝယ်လာတဲ့သရက်ချဉ်လေးတွေကို ရေပြန်ဆေးပြီး ရေစင်အောင် ပြန်ညှစ်ထား၊ ကြက်သွန်နီခပ်နုနုကို မထူမပါးလှီးထား၊ ငရုတ်သီးစိမ်းကိုလည်း အညှာခြွေရေဆေးပြီး ခပ်ပါးပါးလှီးထား၊ မြေပဲနဲ့ပုဇွန်ခြောက်ကို မညက်တညက်ထောင်းထား၊ နှမ်းနက်လေးကို မွှေးမွှေးလေးဖြစ်အောင်လှော်ထား၊ သရက်ချဉ်၊ ကြက်သွန်နီ၊ ငရုတ်သီးစိမ်း၊ မြေပဲနဲ့ပုဇွန်ခြောက်မှုန့်ကို ပဲဆီမွှေးမွှေးလေးထည့်နယ်။ ပြီးမှ နှမ်းနက်လှော်လေးဖြူးပေးလိုက် မယ်ဆိုရင် အရမ်းလည်းစားလို့ကောင်း၊ ကြက်သားစပါးလင်ချက်နဲ့လည်းလိုက်မှလိုက်တဲ့ သရက်ချဉ်သုပ် လေးတစ်ပွဲရပြီပေါ့ဆွေမျိုးတို့ရာ။

အာလူးပဲကြာဇံဟင်းခါး
အာလူးကိုအခွံခွာ ရေစင်စင်ဆေးပြီး ခပ်သေးသေးတုံးထား၊ ပဲကြာဇံကို ရေစိမ်ထား၊ ကြက်သား စပါးလင်ချက်ဖို့ထဲက ဖယ်ထားတဲ့ကြက်ရိုးလေးတွေကို ဆားနည်းနည်းနဲ့ကြက်သွန်ဖြူဓါးပြားရိုက်ထည့်ပြီး ကြက်ရိုးကအချိုရည်ထွက်တဲ့အထိပြုတ်ထား၊ ကြက်ရိုးနူးခါနီးရင် အာလူးထည့်၊ အရသာအပေါ့အငန်အတွက် ကတော့ ဆားနဲ့ကြက်သားမှုန့်ပဲထည့် ကြက်သားရော အာလူးပါနူးပြီ အရသာလည်းစိတ်ကြိုက်ရပြီဆိုမှ ရေစိမ် ထားတဲ့ ပဲကြာဇံထည့်၊ ငရုတ်ကောင်းလှော်မှုန့်လေးခပ်လိုက်ရင် အာလူးပဲကြာဇံဟင်းခါး ချိုချိုပူပူလေးတစ်ခွက် ရပါပြီ။
ဒီတစ်ပတ်တော့ ဒီလောက်ပဲချက် ကြတာပေါ့ဆွေမျိုးတို့ရာ။ နောက်တစ်ပတ်တော့ နောက်တစ်မျိုး ချက်ဖို့ ပြန်ဆုံကြတာပေါ့။ အားလုံးအဆင်ပြေပျော်ရွှင်ကြပါစေ။
Royal
--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 
Share on Google Plus

0 comments:

Post a Comment