ကြက်ခြောက်ကြော်၊ ကြက်သွန်ဖူးသုပ်၊ ဘူးရွက်ဟင်းချို








        ဒီတစ်ပတ်တော့ ကြက်သားကိုကြာကြာအထားခံအောင် အခြောက်ကြော်မယ်။ အဲ့လိုကြော်ထားလိုက် တော့ မနက်ပဲပေါင်းထမင်းလေးနဲ့စားလည်း အဆင်ပြေတာပေါ့နော်။ မယ်တော်မားသားရဲ့အကြိုက်တွေထဲက တစ်ခုပေါ့။ ပြီးတော့ မယ်တော်မားသားစားချင်တယ်ပြောတဲ့ ကြက်သွန်ဖူးလေးကို ချိုချဉ်စပ်လေးသုပ်မယ်၊ ဘူးရွက်ကို အရည်သောက်လေးချက်မယ်။ ဒီလောက်ဆိုရင်တော့ နားရက်လေးမှာ မိသားစုစုံစုံလေးနဲ့ စားလို့ အဆင်ပြေလောက်ပြီပေါ့နော်။ မယ်တော်မားသားအကြိုက်ဟင်းပွဲအတွဲအစပ်လေး ဆိုပါတော့။

ကြက်ခြောက်ကြော်
        ကြက်သားကို CP ကြက်ရင်ပုံသားကိုသုံးပါမယ်။ ရင်ပုံသားကို အရိုးနဲ့အရေခွံဖယ်၊ အသားကြီးသက် သက်ကို အတုံးခပ်သေးသေးတုံးထားပါ့မယ်။ ရေအရင်ဆူအောင်တည်၊ ရေဆူလာရင် ခုနကတုံးထားတဲ့ ကြက်သားတုံးလေးတွေထည့်၊ ရေကတော့ ကြက်သားတုံးလေးတွေ မြုပ်ရုံဆိုရပါပြီ။ အရသာအတွက် ဆားနဲ့ သကြားနည်းနည်းထည့်ပါ။ ရေခမ်းရင်မီးဖိုပေါ်ကချပြီး အအေးခံထားပါ။ ကြက်သွန်ဖြူကိုအခွံခွာပြီး မညက် တညက်ထောင်းထားပါ။ ပြီးရင် ဆီနဲ့ရွှေဝါရောင်လေးဖြစ်အောင်ကြော်ပြီး ပြန်ဆယ်ထားပါ။ ကြက်သားအေးပြီဆို မှ လက်နဲ့အသာမွှပေးပါ။ ပြီးလျှင် ငရုတ်ဆုံထဲထည့်ပြီး အသာထောင်းထားပါ။ ထောင်းထားသော ကြက်သားကို ပြန်မွပြီး အရသာအတွက် ဆား၊ သကြား၊ ကြက်သားမှုန့်ထည့်နယ်ပြီး မြည်းကြည့်ပါ။ အရသာစိတ်ကြိုက်ရပြီဆို မှ ခုနကကြော်ထားသော ကြက်သွန်ဖြူကြော်ထည့် မွှေပေးလိုက်ရင် အထားလည်းခံ၊ စားလို့လည်းကောင်းတဲ့ ကြက်သားခြောက်ကြော်မွမွလေး တစ်ပွဲရပါပြီ။

ကြက်သွန်ဖူးသုပ်
        ကြက်သွန်ဖူးလေးတွေကို ရေသေချာဆေးပြီး တစ်လမခန့်ပိုင်းပြီးလျှင် ရေနွေးဆူဆူထဲထည့်ပြီး  ကျက်ရုံမျှပြုတ်ပါ။ ပြီးလျှင် ပြန်ဆယ်ပြီးအအေးခံ၊ ခရမ်းချဉ်သီးကို အစေ့ဖယ်ပြီး အသားချည်းသက်သက် ခပ်ပါးပါးလှီး။ ကြက်သွန်နီဆီချက် ချက်ထားပါ။ မြေပဲကိုမညက်တညက်ထောင်းထား၊ ငရုတ်သီးစိမ်းကိုလည်း ခပ်ပါးပါးလှီးထားပါ။ ပြီးလျှင် ကြက်သွန်ဖူး၊ ခရမ်းချဉ်သီး၊ မြေပဲ၊ ငရုတ်သီးစိမ်း၊ ဆီချက်အရည်သင့်ရုံထည့်ပြီး သံပုရာရည် ဆား၊ သကြား သင့်ရုံထည့်နယ်ပါ။ အရသာချိုချဉ်စိတ်ကြိုက်ရပြီဆိုမှ အနံ့လေးပါမွှေးသွားအောင် နံနံပင်လေးအပေါ်ကနေ အုပ်ပေးလိုက်ရင် ကြက်သွန်ဖူးသုပ်ချိုချဉ်စပ်မွှေးလေးရပြီပေါ့နော်။

ဘူးရွက်ဟင်းချို
        ကြက်သားခြောက်ကြော်ဖို့ အသားတွေပဲယူတော့ ကျန်နေတဲ့ကြက်ရိုးတွေကို ပုဇွန်ငံပြာရည်နဲ့ ကြက်သွန်ဖြူဓားပြားရိုက်ထားတာထည့်ပြီး နူးတဲ့အထိပြုတ်ပါ။ အချိုပေါ့လျှင် သကြားနည်းနည်းထည့်ပါ။ ဘူးရွက်ခြွေပြီးရေသေချာဆေး၊ ရေစစ်ထားပါ။ ကြက်ရိုးနူးလျှင် ရေသင့်ရုံထည့်ပြီး ဆူလာအောင်ပြန်တည်ပါ။ ရေဆူလာမှ ဘူးရွက်ခြွေထားတာထည့်၊ အရသာမြည်းကြည့်လို့ စိတ်ကြိုက်ရပြီဆိုရင်တော့ ကြက်သားခြောက် ကြော်လေးရယ် ကြက်သွန်ဖူးသုပ်လေးရယ်နဲ့ တွဲစားဖို့အရမ်းလိုက်ဖက်တဲ့ ဘူးရွက်ဟင်းချို ချိုချိုလေးတစ်ခွက်ရ ပြီပေါ့နော်။
          ဒီတစ်ပတ်တော့ ဒီလောက်ပဲချက်ကြတာပေါ့ ဆွေမျိုးတို့ရာ။ နောက်တစ်ပတ်မှ နောက်တစ်မျိုးချက်ဖို့ ပြန်ဆုံကြတာပေါ့။ အားလုံးပဲ ပျော်ရွှင်ကြပါစေ။
Royal
--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 
Share on Google Plus

0 comments:

Post a Comment