ကြက်ခြောက်ကြော်၊ ကျောက်ဖယုံသီးကြက်ရိုးဟင်းချို၊ ပဲပြားသုပ်










ဒီတစ်ပတ်တော့ ရာသီဥတုကလည်း အရမ်းပူနေတော့ ဝမ်းအေးတာလေးပဲချက်စားတော့ မယ်စိတ်ကူးတယ်။ အသားတွေကလည်း စားနေရာတာညီးလာပြီဆိုတော့ ကြက်သားကိုပဲ ခပ်ခြောက်ခြောက် လေးနဲ့အစပ်ကြော်လိုက်မယ်၊ ပြီးတော့ အစာလည်းဆေး၊ ဆေးလည်းအစာဖြစ် ဒီရာသီဥတုနဲ့လည်း ကိုက်ညီတဲ့ကျောက်ဖရုံသီးကိုပဲ ကြက်ရိုးလေးနဲ့ပြုတ်ပြီး အရည်သောက် ဟင်းချိုလေး ချက်မယ် နောက်ပြီးတော့ ခံတွင်းလိုက်အောင် ပဲပြားလေးကိုကြော်ပြီး ချဉ်စပ်လေးသုပ်လိုက်မယ်။ ဒါဆိုရင် တော့ မယ်တော်မားသား ခံတွင်းလိုက်မယ်မျှော်လင့်ရတာပဲ၊ မယ်တော်မားသား ဈေးကပြန်လာတာ နဲ့ချက်ရေး ပြုတ်ရေးစကြတာပေါ့နော်။
ကြက်ခြောက်ကြော်
ကြက်ခြောက်ကြော်ဖို့အတွက် ကြက်သားကိုတော့ CP ကြက်ရင်အုံပဲသုံးတာပေါ့နော်။ ကြက်ရင်အုံကို အတုံးခပ်ကြီးကြီးတုံးပြီး အရင်ပြုတ်လိုက်မယ်။ ပြီးမှ အသားလေးတွေကိုမွပြီး မညက်တညက် လေးထောင်းထားလိုက်မယ်။ ကြက်ရိုးကိုတော့ ကျောက်ဖရုံသီးနဲ့ အရည်သောက်ချက်ဖို့ထားလိုက်တာပေါ့။ ကြက်သွန်ဖြူကို မညက်တညက်ထောင်းပြီး ရွှေဝါရောင်လေးရအောင်ကြော်ပြီး ပြန်ဆယ်ထား၊ ပြီးရင် ငရုတ်သီးခွဲခြမ်းကို နည်းနည်းအစေ့ပေါက်အောင်ထောင်းပြီး နနွင်းမှုန့်နည်းနည်းထည့် ခုနကကြက် သွန်ဖြူကြော်ထားတဲ့ဆီထဲထည့်ပြီးဆီသတ်၊ စိမ်းနံ့ပျောက်လို့မွေးလာပြီဆိုမှ ခုနကထောင်းထားတဲ့ ကြက်သားကိုထည့်ပြီး မီးလျော့လျော့လေးနဲ့ ခြောက်ပြီးမွလာတဲ့အထိကြော်၊ အရသာအတွက်ကတော့ ဆား၊ သကြားနဲ့ ကြက်သားမှုန့်ထည့်ပြီးမှ ကြက်သွန်ဖြူကြော်လေးထည့်ပြီး မွှေပေးလိုက်ရင် ကြက်ခြောက်ကြော်မွမွကြွပ်ကြွပ်မွေးမွေးလေးနဲ့စပ်စပ်လေးရပြီပေါ့။ အထားလည်းခံ၊ စားလို့လည်း ကောင်းမှာအသေအချာပဲပေါ့နော်။
ကျောက်ဖရုံသီးကြက်ရိုးဟင်းရည်
ခုနကကြက်ရိုးလေးတွေကို ရေထည့်ပြီးဆူအောင်ပြုတ်၊ ကြက်သွန်ဖြူလေးဓါးပြားရိုက်ထည့် ကျောက်ဖရုံသီးအခွံခွာ၊ အနေတော်လေးတုံးထားတာထည့်၊ အရသာအတွက်ကတော့ ဆားနဲ့ကြက် သားမှုန့်လေးထည့်လိုက်ရင်ရပါပြီ။ ကျောက်ဖရုံသီးလည်းနူး အရသာလည်းအဆင်ပြေပြီဆိုရင်တော့ တရုတ်နံနံလေးအုပ်လိုက်ရင် နွေရာသီမှာအပူဒဏ်လည်းခံနိုင်၊ ကျန်းမာရေးအတွက်လည်းကောင်းတဲ့ ကျောက်ဖရုံသီးကြက်ရိုးဟင်းရည်တစ်ခွက်ရပြီပေါ့။


ပဲပြားသုပ်
ပဲပြားသုပ်လေးကိုအရင် ခပ်ထူထူလေးလှီးပြီးကြော်ထား၊ မန်ကျည်းမှည့်လေးကိုရေစင်စင်ဆေး၊ ရေနွေးထည့်ပြီးစိမ်ထား၊ ကြက်သွန်နီနဲ့ဂေါ်ဖီကို ခပ်ပါးပါးလေးလှီးထား၊ ပဲကျက်မှုန့်လေးလည်းအသင့်ပြင်ထား၊ နံနံပင်ကိုလည်းရေစင်စင်ဆေးပြီး အနေတော်လေးလှီးထား၊ ပြီးမှပဲပြားကြော်ကိုခပ်ထူထူလေးပြန်လှီးပြီး ကြက်သွန်နီ၊ ဂေါ်ဖီ၊ ပဲကျက်မှုန့်၊ ငရုတ်သီးလှော်မှုန့် မန်ကျည်းမှည့်ရည်၊ ပုဇွန်ငံပြာရည်၊ သကြားလေးနည်းနည်းထည့်ပြီး နယ်လိုက်ရင် ပဲပြားကြော်သုပ်ချဉ်စပ်စပ်လေးရပြီပေါ့နော်။ နံနံပင်လေး အုပ်လိုက်ရင်တော့ ပိုပြီးမွေးလည်းမွေး၊ စားလို့လည်းကောင်းသွားတာပေါ့။
ဒီတစ်ပတ်ကတော့ကြက်ခြောက် ကြော်မွေးမွေးကြွပ်ကြွပ်လေးရယ် ကျောက်ဖရုံသီးဟင်းရည်ချိုချိုလေး ရယ်၊ ပဲပြားကြော်သုပ်ချဉ်စပ်မွေးမွေးရယ်နဲ့ဆိုတော့ စားလို့ကောင်းမှာ အသေအချာပဲပေါ့ ဆွေမျိုးတို့ရာ။
ဒီတစ်ပတ်တော့ဒီလောက်ပဲပေါ့ ဆွေမျိုးတို့ ရာ။ နောက်တစ်ပတ်မှ နောက်တစ်မျိုးချက်ဖို့ပြန်ဆုံကြတာ ပေါ့။
အားလုံးအဆင်ပြေပျော်ရွှင်ကြပါစေ။


Royal
--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 


Share on Google Plus

0 comments:

Post a Comment