အချိန်မရလို့ / အလုပ်များလို့ မိတ်ကပ်ဘယ်လိုပြင်မလဲ











မကြာခင်မှာ ကျောင်းတွေပြန်ဖွင့်တော့မယ်။ တက္ကသိုလ်၊ ကောလိပ် ကျောင်းတက်ချိန်တွေဆိုတာ အင်မတန် အလုပ်များတဲ့ အလုပ်ရှုပ်ချိန်တွေထဲက တစ်ခုပါ။ ပြောရရင် မိန်းကလေးတွေအတွက်ပေါ့။ တစ်ခါတစ်ရံ သတ်မှတ်ထားတဲ့ ငွေကြေးပမာဏကိုသာ သုံးစွဲနေရတဲ့ မိန်းကလေးတွေအဖို့ ခက်ခဲတဲ့ အချိန်တစ်ခုပါ။ ဘယ်အတွက်လဲ…။ အလှပြင်ဖို့အတွက်ပေါ့။ တချို့ကျောင်းသူတွေအနေနဲ့ မှန်ရှေ့မှာ နာရီပေါင်းများစွာ အချိန်ဖြုန်းနိုင်ပေမယ့် တချို့ကတော့  အချိန်မရလောက်အောင် ဖိစီးနေသူတွေရှိပါတယ်။ အဲ့လိုပျိုမေတို့အတွက် မိတ်ကပ်ပြင်တဲ့အခါ ဟိုဟာသုံးရတော့မလိုလို ဒီဟာသုံးရတော့မလိုလို မဖြစ်စေဖို အချိန်ကုန်သက်သာစေမယ့် နည်းလမ်းလေးတွေ ဖော်ပြပေးလိုက်ပါတယ်။

စုစည်းပါ
မပြင်ဆင်ခင် ပထမဦးဆုံး လုပ်ရမယ့် အလုပ်ကတော့ ကိုယ့်မှာရှိတဲ့မိတ်ကပ်ပစ္စည်း အသုံး အဆောင် တွေကို စုစုစည်းစည်း ထားရှိဖို့ဖြစ်ပါတယ်။ ဘာမှမရှိတော့တဲ့ ဘူးခွံတွေ ဘရပ်အဟောင်းတွေ၊ မသုံးစွဲတော့တဲ့ မိတ်ကပ်ပစ္စည်းတွေအားလုံး လွှင့်ပစ်လိုက်ပါ။ ကိုယ်တကယ် လိုအပ်မယ့် အသုံးပြုမယ့် ပစ္စည်းလောက်ကိုသာ မှန်တင်ခုံပေါ်မှာ ထားရှိပါ။ ထားရှိတဲ့အခါမှာလည်း ရှာဖွေနေစရာမလိုအောင် သပ်သပ်ရပ်ရပ်စနစ်တကျ ထားရှိဖို့လိုအပ်ပါတယ်။
ပြင်ဆင်ပါ
နောက်တစ်နေ့နံနက် မိုးမလင်းခင် ညဘက်ကတည်းက ကိုယ်သုံးစွဲမယ့်မိတ်ကပ်ကို အဆင်သင့် ပြင်ဆင်ထားခြင်းကလည်း နံနက်ခင်းရဲ့ အလှအပအတွက် ပေးရတဲ့အချိန်ကို အနည်းငယ်သက်သာသွားစေနိုင် ပါလိမ့်မယ်။
ရေချိုးရင်တစ်ခါတည်း
ခေါင်းလျှော်ရင်း ခေါင်းဖီးခြင်းကလည်း အလှအပအတွက် အချိန်ပေးရမှုကို သက်သာစေတဲ့ နည်းလမ်းတစ်ခုပါ။ ခေါင်းလျှော်ပြီး ဆံသားပျော့ဆေးသုံးစွဲရင်းဖြင့် ဘီးကျဲကျဲဖြင့် ဖီးချပါ။ အဲ့ဒီအတွက် ရေချိုးပြီးတဲ့အခါ ဆံပင်ရှင်းနေရတဲ့အလုပ်တစ်ခု သက်သာသွားပါစေလိမ့်မယ်။
(၅)မိနစ်အတွင်းပြင်ဆင်မယ်
မိတ်ကပ်ပြင်ဆင်ချိန်အများကြီးယူခြင်းက ကောင်းတဲ့အလုပ်တစ်ခုတော့ မဟုတ်ပါဘူး။ အလျင်လိုနေတဲ့အချိန်မှာ မြန်ဆန်ကျွမ်းကျင်စွာ ပြင်ဆင်တတ်အောင် လေ့ကျင့်ထားဖို့ လိုအပ်ပါတယ်။ အဲ့ဒီအတွက် တကယ့် ကိုယ်ရဲ့မျက်နှာက ဘာလိုအပ်သလဲဆိုတာ သိရှိထားပါ။ (၅)မိနစ်အတွင်း ပြင်ဆင်နိုင်တဲ့ နည်းလမ်းကတော့ အပြစ်အနာအဆာဖုံးမိတ်ကပ်၊ ပေါင်ဒါ၊ မျက်တောင်ကော့ဆေး၊ Blush၊ နှုတ်ခမ်းဆိုးဆေး ဒါမှမဟုတ်  Lip Gloss ပဲဖြစ်ပါတယ်။
မျှဝေသုံးစွဲခြင်း လုံးဝရှောင်ပါ
ဘက်တီးရီးယားပိုးမွှားတွေက မိတ်ကပ်အသုံးဆောင်ပစ္စည်းတွေ မျှဝေသုံးစွဲခြင်းဖြင့်လည်း ကူးစက်  နိုင်ပါတယ်။ အဲ့ဒါကြောင့် ဘယ်မိတ်ကပ်၊ ဘယ်ပစ္စည်းမဆို မျှဝေသုံးစွဲတာက ကောင်းတဲ့အချက် မဟုတ်ဘူးဆိုတာ မှတ်သားထားပါ။ အထူးသဖြင့် မျက်ဝန်းနဲ့နှုတ်ခမ်းတွေအတွက် သုံးတဲ့ပစ္စည်းတွေပေါ့။ ဒီနှစ်ခုက မိန်းကလေးတိုင်း မျှဝေသုံးစွဲလေ့ရှိပါတယ်။
ကွန်ဆယ်လာ ကောင်းကောင်း သုံးစွဲပါ
အလုပ်များတဲ့ ကောလိပ်ကျောင်းသူတွေအတွက် အကောင်းဆုံးအဖော်မွန်ကို ပြောပါဆိုလျှင် အပြစ်အနာအဆာတွေကို ဖုံးဖိပေးတဲ့မိတ်ကပ် (Concealer) ပဲဖြစ်ပါတယ်။  Tutorial တွေ၊  Practical တွေနဲ့ အချိန်ပြည့် အလုပ်ရှုပ်နေသူတွေအဖို့ သခွားသီးပါးပါးလှီးပြီး ကပ်ဖို့ အချိန်ရမှာမဟုတ်ပါဘူး။ အဲ့ဒီအတွက် အိပ်ရေးပျက်ထားတဲ့ ညိုမဲနေတဲ့ မျက်ဝန်းလေးကို ဖုံးကွယ်ထားဖို့ကတော့ ကွန်ဆယ်လာက မရှိမဖြစ်ပစ္စည်း တစ်ခုဖြစ်ပါတယ်။
မျက်ခုံးမွေးနှုတ်စရာမလိုပါ
Celebrity တစ်ယောက် မဟုတ်တဲ့အတွက် အရမ်းကြီးကို အသေးစိတ်ကျနေစရာမလိုပါဘူး။ အထူးသဖြင့် မျက်ခုံးမွှေးနှုတ်ခြင်းပေါ့။ မျက်ခုံးမွှေးနှုတ်တာက မှားသွားရင် ချက်ခြင်းပြန်ပြင်လို့မရတဲ့ အမှားတစ်ခုဖြစ်ပါတယ်။ အဲ့ဒီအတွက် မျက်ခုံးမွှေးဆွဲတံနဲ့သာ လိုအပ်သလို ပုံဖော်ရေးဆွဲပါ။
အလှဆီသုံးတဲ့အခါ
အလှဆီ  (Moisturizer) ဆိုတာ မိန်းကလေးတိုင်း မပါမဖြစ်သုံးတဲ့ ပစ္စည်းတစ်ခုပါ။ အစိုဓာတ်ဖြည့်ပေးခြင်းက အရေပြားကို တစ်နေကုန် နူးညံ့နေစေပြီး ချောမွေ့နေပါစေလိမ့်မယ်။ အချိန်ကုန် သက်သာစေဖို့ကတော့ အလှဆီသုံးစွဲတဲ့အခါ နေလောင်ဒဏ်ကို ကာကွယ်နိုင်တဲ့ နေရောင်ခြည် ကာကွယ်နိုင်စွမ်းပါတာကိုပါ ရွေးချယ်သုံးစွဲတတ်ဖို့လိုအပ်ပါတယ်။

All in one (တစ်ခါသုံးရုံနဲ့ အားလုံးပြီးပြည့်စုံသွားစေမယ့်) ပစ္စည်းမျိုးပါ
အသားအရေအတွက် အချိန်ကုန်သက်သာပြီး စွယ်စုံရတဲ့ပစ္စည်းမျိုး ဥပမာ- မိတ်ကပ်ရော၊ Skin Care ပါ တစ်ပါတည်းပါဝင်တဲ့  B.B Cream လိုမျိုး စွယ်စုံရပစ္စည်းမျိုးကိုသုံးစွဲပါ။ နှုတ်ခမ်းဆိုးတာ အချို့ကိုလည်း  Blush အဖြစ် အသုံးပြုနိုင်ပါတယ်။
 ၀ဿန်

--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 


Share on Google Plus

0 comments:

Post a Comment