ခင်ဝင့်ဝါနဲ့ သူ့ရဲ့ ခံယူချက်

ဘယ်လောက်ပဲ အနုပညာအလုပ်ကို ၀ါသနာပါတယ်ပြောပြော ငြီးငွေ့တဲ့အခါမျိုးလည်း ကြုံရတတ်တယ်… ခင်ဝင့်ဝါ

MTV ၊ ကြော်ငြာ ၊ ဗီဒီယိုကားတွေထဲက ခင်ဝင့်ဝါအတွက် ဘယ်ဟာကပိုပြီး ပရိသတ်ကို ထိထိရောက်ရောက် Message တွေပေးနိုင်တယ်လို့ ထင်သလဲ။

          ကြော်ငြာဆိုရင်လည်း ကြော်ငြာအလျောက် ပရိသတ်နဲ့ ထိတွေ့ခွင့်ရတယ်။ ဒီလိုမျိုး MRTV-4 တို့၊ Channel 7 တို့ အစရှိတဲ့ Free-to-Air တွေကနေ ပရိသတ်တွေက သူဆိုရင် ဘယ်သူလို့ သိကြတယ်။ ဗီဒီယိုကားဆိုတာကလည်း နယ်ရော၊ တစ်နိုင်ငံလုံးကိုပါ ဖြန့်တယ်။ ဒီမင်းသမီး ဒီမင်းသား ဆိုရင် သိကြတယ်။ တစ်ခုချင်းစီကလည်း သူ့အကျိုးသက်ရောက်မှုနဲ့ သူရှိပါတယ်။

အရုပ်ကလေးအခန်းကလည်း သရုပ်ဆောင်တယ်။ နောက်ပြီး အိန်ဂျယ်လ်၊ အခုလည်း လျှို့ဝှက်တဲ့ ဇာတ်ရုပ် နေရာကပေါ့။ ဒီလို အားလုံးနဲ့ ကွဲပြားတဲ့ ဇာတ်ရုပ်တွေနဲ့ သရုပ်ဆောင်တဲ့အခါမှာ ဘယ်လိုအားစိုက်ထုတ်ဖြစ်လဲ။

          ဘယ်လိုလေး အားစိုက်ဖြစ်လဲဆိုတော့ အဓိကက Scene ပေါ်မှာ သရုပ်ဆောင်ပုံ သရုပ်ဆောင်နည်း ပေါ့နော်။ အခုလည်း ညီမတို့က လေ့လာတုန်းပဲ ရှိပါသေးတယ်။ ဥပမာ အရုပ်ကလေးဆိုလို့ရှိရင် ဘာမှမသိဘူး။ အရုပ်ဆိုတော့ သူ့မှာ ဦးနှောက်လည်းမရှိဘူး။ အဲဒီလိုပုံစံမျိုးပေါ့နော်။ လူဆိုရင် လူမှာဒေါသရှိတယ်။ မောဟ ရှိတယ်။ ပျော်တယ်ဆိုလည်း လွှတ်ပျော်တယ်။ အဲဒီလိုမျိုးလေးတော့ ကွဲပြားအောင်လို့ သရုပ်ဆောင်ရပါတယ်။

ညီမလေး သရုပ်မဆောင်ဖူးသေးတဲ့ ကာရိုက်တာမျိုးလေး လုပ်ချင်လိုက်တာဆိုပြီး စဉ်းစားခဲ့ဖူးတာများ ရှိပါသ လား။

          အဲလိုမျိုးတော့ မရှိဘူး။ ဘယ်ကာရိုက်တာပဲလာလာ ကိုယ်နဲ့အဆင်ပြေအောင် သရုပ်ဆောင်တယ်။ ဒီဇာတ်ရုပ်ကို ကိုယ့်စိတ်ထဲမှာသွင်းပြီး ကိုယ်သာ သူ့နေရာမှာဆို ဘယ်လိုနေမလဲဆိုတဲ့ ခံစားချက်မျိုးတော့ အတတ်နိုင်ဆုံးသွင်းတယ်။ ပြီးတော့ အနီးစပ်ဆုံးတူအောင် သရုပ်ဆောင်တယ်။ သရုပ်ဆောင်ချင်တဲ့ပုံစံမျိုး တော့ မရှိသေးဘူး။ ဒါပေမဲ့ ဘယ်လိုဇာတ်ရုပ်ပဲဖြစ်ဖြစ် ကိုယ်နဲ့လိုက်မယ်၊ ပရိသတ်လည်း လက်ခံနိုင်လောက် တဲ့ ဇာတ်ရုပ်မျိုးကို ရွေးချယ်ပြီး သရုပ်ဆောင်သွားမှာပါ။

သရုပ်ဆောင်တစ်ယောက်အဖြစ် ရပ်တည်တဲ့အခါ စိတ်ကို ဘယ်လိုထားတတ်အောင်ကျင့်ပါသလဲ။

          အရင်တုန်းက သရုပ်ဆောင်လောကကို စစ၀င်ချင်းတုန်းကတော့ စိတ်ကို ဘယ်လိုထားရမလဲမသိဘူး။ ဒါပေမယ့် ကားရိုက်များလာလေလေ၊ ဒါရိုက်တာများများနဲ့ ကြုံလေလေ ပညာတွေအများကြီးရလာလေပါပဲ။ မကြည်ဖြူက တစ်မျိုးသင်ပေးတယ်။ ဒါရိုက်တာ ကိုညိုကြီးဆို ကိုညိုကြီးအလျောက် သူတတ်သလောက် ပညာတွေ ကိုယ့်ကိုသင်ပေးတယ်။ အဲဒီတော့ နည်းလမ်းတွေက အကုန်ရလာတယ်။ အစပိုင်းဆို စိတ်က ဒီဟာ ကို ဘယ်လိုသရုပ်ဆောင်ရမလဲဆိုပြီးတော့ ရင်ကလည်းတုန်နေတယ်။ ကိုယ်သရုပ်ဆောင်တာကို ဒါရိုက်တာ ကြိုက်ပါ့မလား။ ပြီးတော့ ပရိသတ်ကြိုက်ပါ့မလား။ ဘယ်လိုလုပ်ရပါ့မလဲဆိုပြီးတော့။ အဲဒီလိုမျိုး နည်းနည်း တော့ Worry တွေ များနေခဲ့တာ။ အဲဒီအခါကျတော့ ဒါရိုက်တာကိုဇော်ကပြောတယ်။ ''စိတ်ထဲမှာရှိတဲ့ဟာတွေ အကုန်ထုတ်ပစ်လိုက်တဲ့'' ထုတ်ပြီးတော့ အေးအေးဆေးဆေးနဲ့ ဒီကာရိုက်တာကို ခေါင်းထဲမှာထည့်၊ ဒီဟာကို ဘယ်လိုထူးခြားအောင် သရုပ်ဆောင်မလဲ၊ သူများတွေနဲ့မတူအောင် ဘယ်လိုသရုပ်ဆောင်မလဲဆိုတာ ထည့်ဆို ပြီး၊ အဲဒီနောက်ပိုင်းမှာ ကိုယ့်ကိုယ်ကိုယ် ပြုပြင်တာ။ ဒီလိုမျိုး သရုပ်ဆောင်မယ်ဆိုရင် စိတ်ကို အကြည်လင်ဆုံး ထားထားပါတယ်။

ရုပ်ရှင်တစ်ကားရိုက်တဲ့အခါ ဇာတ်ကောင်သဘောအရ အ၀တ်အစားပုံစံတွေကို ဘယ်လိုပြင်ဆင်ဖြစ်သလဲ။

          သေချာစဉ်းစားရတာပေါ့နော်၊ ဥပမာ ကိုယ်ဘယ်လို သရုပ်ဆောင်မလဲ။ မျက်မမြင်တစ်ယောက်အဖြစ် သရုပ်ဆောင်မယ်ဆိုရင် မျက်မမြင်တစ်ယောက်ဝတ်ရမယ့် အ၀တ်အစားပုံစံတွေကို ကိုယ်လက်လှမ်းမီ သလောက် ရှေ့မှာသရုပ်ဆောင်သွားတဲ့သူတွေကို ပြန်ကြည့်တယ်။ သူတို့ ဘယ်လိုဝတ်သွားသလဲပေါ့နော်၊ ခပ်ဆင်ဆင်ပုံစံမျိုးပေါ့။ ပြီးတော့ မျက်လုံးမမြင်တဲ့သူဆို အလှမပြင်ဘူး။ မိတ်ကပ်မလူးဘူး။ အ၀တ်အစား ကလည်း ခပ်ရိုးရိုးပေါ့နော်။ Angel ဆိုရင်လည်း နတ်သမီးလေးလို လှနေရမယ်၊ ချောနေရမယ်ဆိုပြီး ကာရိုက်တာနဲ့ လိုက်အောင်တော့ သေချာပြင်ဆင်ဖြစ်ပါတယ်။

ညီမရဲ့လူငယ်ဘ၀ကို အနုပညာရှင်တစ်ယောက်အနေနဲ့ ဖြတ်သန်းရတဲ့အတွက် စိတ်ထဲမှာ ဘယ်လိုခံစားမှုမျိုး တွေ ဖြစ်ပေါ်လဲ။

          ညီမအရင်တုန်းက ငါဒီလိုမျိုး အနုပညာသမားတစ်ယောက်ဖြစ်ရမယ်လို့ အိပ်မက်တောင်မမက်ဖူးပါ ဘူး။ အခု အနုပညာရှင်တစ်ယောက် တကယ်လည်းဖြစ်လာရော ကိုယ်က ဒီအနုပညာကို ၀ါသနာပါမှန်းသိလာ တယ်။ ကိုယ်က အရင်တုန်းက ကိုယ့်ရဲ့ဝါသနာကို သေချာမသိလို့သာ အနုပညာရှင်တစ်ယောက်ဖြစ်လိမ့်မယ် လို့ စိတ်ကူးမယဉ်မိ၊ မစဉ်းစားမိတာ ဖြစ်ကောင်းဖြစ်နိုင်တယ်။ တကယ်တမ်းဖြစ်လာတဲ့အခါမှာ ကိုယ်ဝါသနာပါ တဲ့ အလုပ်ကိုလုပ်ရတဲ့အတွက် ဒီအလုပ်ရဲ့ Effect တွေ ဘာတွေကိုလည်း ခံနိုင်ရည်ရှိလာတယ်။ ဒီအတွက်   ကြောင့်မို့လို့ ဒီအနုပညာအလုပ်ကိုလုပ်ရတာ ပင်ပန်းတယ်ဆိုပေမယ့် ပျော်တယ်။

ငယ်ငယ်တုန်းက မက်ခဲ့တဲ့ ညီမလေးရဲ့ တကယ့်စိတ်ကူးအိပ်မက်က ဘာလဲ။

 ငယ်ငယ်တုန်းက အိမ်မက်ကတော့ တကယ့်ပေါ့ပေါ့ပါးပါး လူငယ်ဘ၀ Free Style ပုံစံမျိုးလေးပေါ့။ ကျောင်းပြီးသွားရင် ဘွဲ့ယူမယ်၊ ဘွဲ့ယူပြီးသွားလို့ရှိရင် ကိုယ်တက်ချင်တဲ့ဘာသာ၊ ကိုယ်တက်ချင်တဲ့ သြေမ တစ်ခုခု ထပ်တက်မယ်။ ထပ်တက်ပြီးလို့ရှိရင် ကုမ္ပဏီတစ်ခုမှာ ၀န်ထမ်းလုပ်မယ်။ ပြီးရင် ကိုယ်ကိုယ်တိုင် ၀န်ထမ်းတွေကို Management လုပ်ပြီး သူဌေးတစ်ယောက်လုပ်မယ်လို့ စိတ်ကူးထားတာ။ တကယ်တမ်း ကျတော့ တခြားစီတွေ ဖြစ်နေတာပေါ့။

ညီမလေးရဲ့တစ်နေ့တာ ဖြတ်သန်းမှုမှာ အပျော်ဆုံးအချိန်တို့၊ အငြီးငွေ့ဆုံးအချိန်တို့ရှိရင် ပြောပြပေးပါလား။

          အပျော်ဆုံးအချိန်၊ အငြီးငွေ့ဆုံးအချိန်ဆိုတာထက် တစ်ခါတလေကျလို့ရှိရင် ဘယ်လောက်ပဲ ဒီအနုပညာအလုပ်ကို ၀ါသနာပါတယ်ပြောပြော ငြီးငွေ့တဲ့အခါမျိုးလည်း ကြုံရတတ်တယ်။ အဲဒီအခါကျရင် အရမ်းပျင်းပြီးတော့ ဘာလုပ်ရမှန်းမသိဘူးပေါ့။ အဲဒီလိုအချိန်မျိုးလည်း တစ်ခါတစ်လေတော့ ဖြစ်တတ်တယ်။ အပျော်ဆုံးအချိန်ဆိုရင်တော့ ကိုယ်နဲ့စိတ်တူကိုယ်တူ မောင်နှမတွေ၊ ဆရာကောင်း သမားကောင်းတွေနဲ့ တွေ့ ပြီးတော့ ဒီအလုပ်ကို ရယ်ရယ်မောမော၊ ပျော်ပျော်ရွှင်ရွှင်လုပ်ရတဲ့အခါမျိုးကတော့ အပျော်ဆုံးအချိန်ပေါ့နော်။ အဲဒီအခါမျိုးမှာ ကိုယ်နေမကောင်းဖြစ်နေရင်တောင်မှ ဒီအလုပ်ကိုလုပ်ရတာ ပျော်နေတဲ့အတွက် နေမကောင်း တာကိုတောင် မေ့သွားတယ်။

ညီမ အခုလိုလျှောက်လှမ်းနေတဲ့ လမ်းတစ်လျှောက်မှာ ဘယ်လိုထိန်းချုပ်မှုမျိုးနဲ့နေရတာ သဘောကျလဲ။

          ညီမက သူများ Control အောက်မှာ နေရတာ စိတ်ရှုပ်တယ်။ ကိုယ့်အသိစိတ်ဓာတ်နဲ့ ကိုယ် လုပ်ရတာကို ပိုသဘောကျတယ်။ ဥပမာ ကိုယ် ဒါလုပ်မယ်လို့ စိတ်ထဲက ရည်မှန်းထားပေမယ့်လည်း တစ် ယောက်ယောက်က ဒါလုပ်လိုက်ပါဦးလို့ပြောလိုက်လို့ရှိရင် စိတ်ထဲမှာလုပ်မယ့်ဟာတောင် တွန့်သွားတယ်။ ကိုယ်လုပ်တာကို သူများတွေက သဘောကျတယ်ဆိုရင် အရမ်းဝမ်းသာတယ်။ ဒါပေမဲ့ ကိုယ်လုပ်မယ့် အရာ တစ်ခုကို တစ်စုံတစ်ယောက်ရဲ့ ညွှန်ကြားချက်နဲ့လိုက်လုပ်ရပြီဆိုရင် စိတ်ကခုပြီး မလုပ်ချင်တော့ဘူး။ အဲလို မျိုးလေးတွေတော့ ဖြစ်တတ်တယ်။

ညီမလေးရဲ့ဒီအနုပညာ လမ်းတစ်လျှောက်မှာ ဘယ်လိုပြယုဂ်မျိုးတွေ ကျန်ခဲ့စေချင်လဲ။

          ညီမအနေနဲ့ကတော့ ဒါကို အသက်အပိုင်းအခြားတစ်ခုပေါ့။ ညီမတို့က ဒီအသက်အရွယ်မှာ နေရာတစ် နေရာရပြီးသွားပြီ။ အချိန်ကြာလာရင် အခုလက်ရှိရောက်နေတဲ့နေရာကို နောက်ကလူတွေအတွက် ဖယ်ပေးရ မယ်လေ။ ဘုရားဟောလည်းရှိတယ် ''ဘယ်အရာမှမမြဲဘူး''ဆိုတာ ဘယ်အရာမှ မမြဲတဲ့အတွက်ကြောင့် ပရိသတ်တွေရဲ့စိတ်ထဲမှာ ခင်ဝင့်ဝါဆိုတာကျန်ခဲ့ရင် ညီမအတွက်ကတော့ မှတ်တိုင်တစ်ခုပါပဲ။ ဘယ်လိုပဲ ပြောပြော ကိုယ့်ကိုပရိသတ်တွေ အသိအမှတ်ပြုတယ်။ ကိုယ်ကလည်း ဒီလောကထဲမှာ နာမည်ကောင်းနဲ့ပဲ ကျန်ခဲ့ချင်တယ်။ နာမည်ဆိုးနဲ့ မကျန်ခဲ့ချင်ဘူး။ ကိုယ့်ရဲ့နာမည်တစ်ခုပဲ ပရိသတ်ရင်ထဲမှာ ကျန်ခဲ့မယ်ဆိုရင် တော့ ဘယ်အချိန်ပဲဖြစ်ဖြစ်၊ ဒီအနုပညာအလုပ် မလုပ်တော့သည့်တိုင် ကိုယ့်နာမည်လေးက ကျန်ခဲ့တယ် ဆိုတော့ ပီတိဖြစ်ရတာပေါ့။

ပရဟိတတွေလည်းလုပ်တာ များတယ်လေ၊ ပရဟိတလုပ်တဲ့နေရာမှာ ဘယ်အပိုင်းကို ပိုပြီးတော့ လုပ်ဖြစ်သလဲ။

          ညီမငယ်ငယ် (၈)တန်းလောက်ကတည်းက ပရဟိတကို ဘာမှန်းမသိပေမယ့် စိတ်ဝင်စားတယ်။ အဲဒီတုန်းကလည်း နားမလည်ဘူး။ ဒီပရဟိတဆိုတဲ့ ဝေါဟာရကိုတောင်မှ မသိသေးဘူး။ ဒါပေမယ့် သူများကို ကူညီရတယ်၊ လှူဒါန်းရတယ်၊ ပြီးတော့ နာရေးဆိုလို့ရှိရင်လည်း ဦးကျော်သူတို့ နာရေးကူညီမှုအသင်းကိုလည်း ငယ်ငယ်တုန်းကတည်းက စသိခဲ့တယ်။ ကူညီချင်တယ်။ ဒါပေမယ့် အဖွဲ့ဝင်ခွင့်မရခဲ့ဘူး။ အသိမရှိတဲ့အတွက် ကြောင့်မို့လို့ မကူညီဖြစ်ဘူး။ ကိုယ်တစ်ပိုင်တစ်နိုင် ကူညီလို့ရတဲ့သူတွေကို ကူညီတယ်။ တကယ်တမ်း ကိုယ် အနုပညာရှင်တစ်ယောက်ဖြစ်လာခဲ့တယ်ဆိုတော့ ကူညီခွင့်ရလာတယ်။ ရရှိတဲ့အနုပညာကြေးထဲကနေ သုံးပုံပုံ တစ်ပုံလောက်ကို ပရဟိတလုပ်ဖြစ်ပါတယ်။ ဒီလိုမျိုးပရဟိတလုပ်ရတဲ့အပေါ်ကိုလည်း ပီတိဖြစ်မိပါတယ်။

ပရိသတ်ကိုပြောချင်တဲ့ စကားလေးတွေရှိရင်လည်း ပြောပြပေးပါဦး။

          အရင်တုန်းကတည်းကရော အခုအချိန်ထိရော အားပေးလာကြတဲ့ ပရိသတ်တွေ၊ ပြီးတော့ ဒီလိုမျိုး ပြဿနာတွေ ခဏခဏဖြစ်တိုင်း ကိုယ့်ကိုအမြင်မပြောင်းဘဲ အားပေးတဲ့ အမာခံပရိသတ်တွေ ရှိတယ်ဆိုတာ သိလာရတယ်။ အဲဒီအတွက် ရင်ထဲကနေပြီးတော့ လှိုက်လှိုက်လှဲလှဲ ကျေးဇူးတင်ပါတယ်လို့။ ဘယ်လို ပြဿနာပဲဖြစ်ဖြစ်၊ ဘယ်လိုအခက်အခဲပဲရှိရှိ စေတနာမေတ္တာတွေနဲ့ အားပေးတဲ့ ပရိသတ်ရှိတဲ့အတွက် ညီမ ဒီလိုနေရာမှာ ရပ်တည်နိုင်လာတာပါလို့။ အဲဒီအတွက် ပရိသတ်ကြီးအားလုံး စိတ်ချမ်းသာ၊ ကိုယ်ကျန်းမာခြင်းနဲ့ ပြည့်စုံကြပါစေလို့။ ပြီးတော့ ဆန္ဒနဲ့ဘ၀ တစ်ထပ်တည်းကျပါစေလို့ ဆုမွန်ကောင်းတောင်းပေးနေပါတယ်။

--------------------------------------------------------

ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 

Share on Google Plus