အလွဲတွေနဲ့ အလှမပျက်စေဖို့












အမှားနဲ့မကင်းနိုင်တဲ့ လူတိုင်းအဖို့ အစည်းအဝေးပွဲက နောက်ကျတာဖြစ်စေ၊ အခမ်းအနား နောက် ကျနေတဲ့အခါမျိုး၊ ချိန်းဆိုထားတဲ့ Appointment တစ်ခုခုနောက်ကျလို့ အလျှင်အမြန်ပြင်ဆင်နေရတဲ့ အခါမျိုး မှာ ရုတ်တရက် မျက်တောင်ကော့ဆေးတွေ မျက်ဝန်းတစ်ဝိုက် စွန်းထင်းမိသွားတာတွေ၊ နှုတ်ခမ်းသား တစ် ဝိုက် နှုတ်ခမ်းဆိုးဆေးတွေ ပေကျံတာမျိုးဖြစ်စေ ပြန်ပြင်ရခက်ခဲလှတဲ့ ပြဿနာမျိုးတွေ ကြုံဖူးမှာသေချာ ပါ တယ်။ ချိန်းထားတဲ့အချိန်ကလည်း နီးကပ်နေပြီ အလှကလည်း ပြန်ပြင်ရဦးမယ်ဆိုတာက စဉ်းစားလိုက်ရုံနဲ့ ဇောချွေးပြန်စရာပါ။ အဲဒီတော့ ဒီလိုလွဲချော်သွားတဲ့ အလှအပပြဿနာလေးတွေကို ဘယ်လို ဖြေရှင်းမလဲ။

Blush တွေ အလွန်အကျွံ သုံးမိတဲ့အခါ
မျက်နှာပါးပြင် (၂) ဖက်ကို Blush တွေအသုံးလွန်ပြီး မျက်နှာပြန်သစ်ပြီး မိတ်ကပ်ပြန်လိမ်းရတဲ့ အဖြစ် တစ်ယောက်မဟုတ် တစ်ယောက်တော့ ကြုံဖူးမှာသေချာပါတယ်။ တကယ်လို့ မျက်နှာပြန်သစ်ဖို့ အချိန်မရတော့တဲ့အခါမျိုးမှာ ဘရပ်ရ်ှအတံ တစ်ချောင်းကို translucent ပေါင်ဒါကို မျက်နှာပါးရိုးအနှံ့ သေချာ စွာ လိမ်းပေးပါ။ မျက်နှာပြင်နဲ့ Blush အရောင် ကိုယ်လိုချင်တဲ့ အရောင်အဆင့်မရောက်မချင်း ဖွဖွပွတ်ပေး ပါ။ Blush အမှုန့်အမျိုးအစားမဟုတ်ဘဲ ခရင်မ်အမျိုးအစား အသုံးပြုသူတွေအနေနဲ့ကတော့ သုံးနေကျ ဖောင်ဒေးရှင်း အနည်းငယ်ကို အလှဆီနဲ့ ခပ်ကျဲကျဲ လက်ဖမိုးပေါ်မှာရောစပ်ပြီး အရောင်တောက်နေတဲ့ ပါးပြင်နှစ်ဖက်ကို လိမ်းခြယ်ပေးနိုင်ပါတယ်။

ဖောင်ဒေးရှင်းမညီညာတဲ့အခါ
တစ်ခါတရံ မျက်နှာမှာ မှန်ကြည့်လိုက်တိုင်း မိတ်ကပ်ကွက်နေသလိုလို မျက်နှာပြင်ထူထူပျစ်ပျစ်ကြီး ဖြစ်နေတာကို ခံစားဖူးမှာပါ။ အဲဒီအခါမျိုးမှာ မျက်နှာပြင်ကို ရေလေးအနည်းငယ် ဆွတ်ပြီး မိတ်ကပ် ရေမြုပ်ကလေးဖြင့် ပွတ်ပေးပါ။ ကိုယ် ထူထူပျစ်ပျစ်ကြီး ခံစားနေရတဲ့ နေရာမှန်သမျှကို သေချာဂရုစိုက်ပြီး ပွတ်ပေးပါ။

နှုတ်ခမ်းဆိုးဆေးတာရှည်ခံစေဖို့
နှုတ်ခမ်းသားကို နှုတ်ခမ်းဆိုးဆေးနဲ့ အရောင်တု Lip Pencil ဖြင့် ဦးစွာပုံဖော်ပါ။ ထို့နောက် နှုတ်ခမ်း ကို ဆိုးပါ။ ပထမတစ်ကြိမ်ဆိုးပြီးတဲ့အခါ တစ်ရှူးစလးဖြင့် ဖိလိုက်ပါ။ ပြီးမှ Translucent ပေါင်ဒါလေးသုံးပြီး နောက်တစ်ကြိမ်ပြန်ဆိုးလိုက်ပါ။ ဒီလိုပြုလုပ်ခြင်းက နှုတ်ခမ်းသားလေးကို သူများတကာနဲ့ မတူဘဲ ရွှန်းစို တောက်ပပေါ်လွင်မယ့်အပြင် နှုတ်ခမ်းဆိုးဆေးတာရှည်ခံစေမှာ သေချာပါတယ်။

မျက်တောင်ကော့ဆေးစွန်းထင်းတဲ့အခါ
ကိုယ်က အလျှင်အမြန်လိုနေတဲ့အချိန် မျက်တောင်ကော့ဆေးသုံးပြီး မျက်လုံးမှိတ်လိုက်တဲ့အခါ မျက်ဝန်းနားတစ်ဝိုက် စွန်းထင်းသွားတာမျိုးတွေ ကြုံဖူးကြမှာပါ။ အဲဒီလိုအခါမျိုးမှာ ကိုယ်သုံးနေကျ ဂွမ်း စလေးကို အလှဆီအနည်းငယ်မျှ ဆွတ်ပေးပြီး ၄င်းပေးကျံနေတဲ့ ဧရိယာတစ်ဝိုက်ကို အလွယ်တကူ သုတ်ပေးလိုက်နိုင်ပါတယ်။ မိတ်ကပ်ကွက်သွားတယ်လို့ ခံစားရတဲ့အခါ အပေါ်မှ ပေါင်ဒါလေးအနည်းငယ် သာ သုံးပေးလိုက်ပါ။

မျက်တောင်ကော့ဆေး ပျစ်နေတဲ့အခါ
မျက်တောင်ကော့ဆေးပျစ်ခဲနေတဲ့အခါ သုံးရတာ မသက်မသာ ဖြစ်စေပါတယ်။ အဲဒီအတွက်ကတော့ မျက်တောင်ကော့ဆေးကို ဘူးလုံအောင်ပိတ်ပြီး ရေနွေးနွေး တစ်ဖန်ခွက်ထဲကို ၂ မိနစ်ခန့် စိမ်ထားလိုက်ပါ။ ပြီးမှ ပြန်အသုံးပြုတဲ့အခါ ယခင်ကထက်ပိုပြီး နူးညံ့ချောမွေ့မှုကို ခံစားရပါလိမ့်မယ်။

နှုတ်ခမ်းသားလေး တောက်ပရွှန်းစိုနေစေဖို့
Lip Gloss က နှုတ်ခမ်းသားကို ရွှန်းစိုတောက်ပပြီး ဆွဲဆောင်မှုရှိစေတဲ့ ပစ္စည်းတစ်မျိုးဖြစ်ပါတယ်။ ဒါပေမဲ့ Lip Gloss အများစုက အချိန်အကြာကြီး မတောက်ပနိုင်ကြပါဘူး။ Lip Gloss ကို တာရှည်ခံနိုင်စေဖို့ အတွက်ကတော့ ပထမဦးစွာ နှုတ်ခမ်းသားနဲ့ အရောင်ဆင်တူ Lip Pencil ကိုသုံးပါ။ ပြီးမှ လက်ထိပ်ကလေးဖြင့် သေချာနှံစပ်သွားအောင် ပွတ်ပေးပါ။ ပြီးမှ Lip Gloss ကို အပေါ်ကနေ ခပ်ပါးပါးသုံးပေးပါ။

Eyeshadow တွေ မျက်ခွံပေါ်မှာခဲနေတဲ့အခါ
ကိုယ်ကဒီအရောင် ဒီပစ္စည်းကိုပဲ ကြိုက်တယ်၊ သုံးချင်တယ်။ ဒါပေမဲ့ မျက်ခွံပေါ်မှာ ပျစ်ခဲနေပြီး မျက်လုံးအလှကို ပျက်စီးရတာမျိုးတွေ ဖြစ်ဖူးကြမှာပါ။ အဲဒီလိုအခါမှာ မျက်ခွံပေါ်ကို Translucent ပေါင်ဒါလေးအနည်းငယ်ကို ဘရပ်ရ်ှကလေးနဲ့ ပွတ်ပေးလိုက်ပါ။ ၄င်းက Eyeshow ကို မျက်ခွံပေါ်မှာ ပျစ်ခဲမနေစေဘဲ နေရာတကျ လှပနေပါစေလိမ့်မယ်။

Eyeline တွေ ဖျက်တဲ့အခါ
အထူးသဖြင့် အဆီပြန်တဲ့ အသားအရေပိုင်ရှင် အမျိုးသမီးတွေအနေနဲ့ အဖြစ်များပါတယ်။ Eyeline သုံးပြီး မျက်ခွံအဖွင့်အပိတ်လုပ်တဲ့အတွက် မျက်ခွံမှာ ပေကျန်တတ်ပါတယ်။ အဲဒီအတွက်ကတော့ ရေစိုခံတဲ့ Eyeline လိုမျိုးသာ အသုံးပြုပါ။ ဂျယ်လ်အမျိုးအစား၊ ခရင်မ်အမျိုးအစား အသုံးပြုသူတွေအနေနဲ့ကတော့ ၄င်း Eyeline ပေါ်မှာ Eyeshadow အမှုန့်လေးကို လိုက်ဖက်အောင် လိမ်းခြယ်ပေးနိုင်ပါတယ်။

Lip Glass နှုတ်ခမ်းပေါ်မှာပျံ့သူတွေအတွက်
တစ်ခါတရံမှာ နှုတ်ခမ်းဆိုးဆေးတွေက အရည်အသွေးကြောင့်ဖြစ်စေ၊ အသားအရေကြောင့်ဖြစ်စေ နှုတ်ခမ်းမှာ ပျံနှံ့စွန်းထင်းသွားတတ်ပါတယ်။ ဒီပြဿနာကို ဖြေရှင်းဖို့ အလွယ်တကူ အရိုးရှင်းဆုံး နည်းလမ်းကတော့ Lip Glass နဲ့ နှုတ်ခမ်းဆိုးဆေးအခြောက်ကို လက်ဖမိုးပေါ်မှာ ရောစပ်ပေးပါ။ ပြီးမှ နှုတ်ခမ်းကို ဆိုးပေးနိုင်ပါတယ်။
 ၀ဿန်
--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 


Share on Google Plus

0 comments:

Post a Comment