မင်္ဂလာဆောင်ရမှာ ကြောက်နေသူများအတွက်













“တစ်ယောက်ဆိုတစ်ယောက်၊ ပိတောက်ဆိုပိတောက်” တဲ့။ ဒါက ရှေးလူကြီးတွေ ပညတ်သွားတဲ့ ဆုံးမ စကားပါ။ ဆိုလိုချင်တာကတော့ တစ်ယောက်ဆိုတစ်ယောက်ပဲ ရိုးမြေကျပေါင်းသင်း ဆက်ဆံသင့် တယ် ဆိုတဲ့ အကြောင်းပါ။ အခုတော့ ဒီဘက်ခေတ်ကြီးထဲမှာ အိမ်ထောင်ကွဲပြဿနာတွေက တဖြည်းဖြည်း များပြားလာပြီး အမျိုးသမီးတွေအနေနဲ့ အဲဒီလို အိမ်ထောင်ကွဲပြဿနာရဲ့ဒဏ်ကို အမျိုးသားတွေထက် ပိုမိုခံစားနေရပါတယ်။ ဒါပေမဲ့ လောကရဲ့သဘာဝအတိုင်း တစ်ယောက်နဲ့ တစ်ယောက် ဘ၀ချင်းပေါင်းစပ် တာကလည်း တချို့ကလွဲပြီး အများစုအတွက် ကျရောက်လာနိုင်တဲ့ အခြေအနေတစ်ခုပဲဖြစ်ပါတယ်။ ဒီတော့ ပတ်ဝန်းကျင်၊ ကိုယ့်ဆွေမျိုးအသိုင်းဝိုင်းထဲမှာ အိမ်ထောင်ကွဲသွားလို့ ဒုက္ခပင်လယ်ဝေနေရသူတွေကြောင့် မင်္ဂလာဆောင်ရမှာကို သေမလောက်ကြောက်နေရတဲ့ အမျိုးသမီးလေးတွေအတွက် အကြံဉာဏ်ပေးချင်ပါတယ်။

ဘာကိုထိတ်လန့်သလဲဆိုတာ အတိအကျသိထားရမယ်
အမျိုးသမီးအများစုမှာ မင်္ဂလာဆောင်ရမှာကြောက်တဲ့ရောဂါဖြစ်နေတာက ပတ်ဝန်းကျင်ပြောစကားတွေက ကိုယ်တိုင်ကြုံတွေ့ရတာတွေထက် ပိုမိုများပြားနေတာတွေ့ရပါတယ်။ ပါးစပ်ပြောနဲ့တင် မင်္ဂလာဆောင်ရမှာ ကြောက်နေတဲ့သူတွေ အများအပြားရှိသလို ကိုယ့်အလှည့်ကျရင် သူများတွေလိုဖြစ်သွားမလားဆိုတဲ့ အတွေးကလည်း သူတို့ကိုနှိပ်စက်နေတာပါ။ ဒီတော့ မင်္ဂလာဆောင်ရင် ဖြစ်လာနိုင်တဲ့ အဆိုးရွားဆုံး အခြေအနေကို သေချာစဉ်းစားပြီး တကယ်ဖြစ်နိုင်လား၊ မဖြစ်နိုင်သလားဆိုတာကို သေချာဆုံးဖြတ်ရပါမယ်။

ကိုယ်တိုင်လေ့လာစုံစမ်းပါ
တကယ်လို့ ကိုယ့်မိဘတွေက ကံမကောင်းအကြောင်းမလှလို့ အိမ်ထောင်ရေးအဆင်မပြေဖြစ်ခဲ့ရင်တောင် အိမ်ထောင်ရေးတိုင်းက တစ်မျိုးတည်းမဖြစ်နိုင်ဘူးဆိုတာကို နားလည်ထားရပါမယ်။ တကယ်လို့ ကိုယ့်စိတ်ထဲမှာ အိမ်ထောင်ပြုဖို့ကြောက်နေရင် ကိုယ်သံသယ၀င်နေသမျှအရာအားလုံးကို တခြားသူတွေနဲ့ မျှဝေအဖြေရှာဖို့လိုအပ်ပါတယ်။ နောက်ပြီး အိမ်ထောင်ရေးကံမကောင်းတဲ့သူတွေဆီ သူတို့ဘာတွေမှားလို့ အခုလိုအဖြစ်ဆိုးနဲ့ ရင်ဆိုင်ရသလဲဆိုတာကို အကျိုးသင့်အကြောင်းသင့် မေးမြန်းရမှာဖြစ်ပါတယ်။ ဒီတော့မှ အိမ်ထောင်ရေပြိုပွဲရခြင်းရဲ့ အကြောင်းအရာအများစုကိုနားလည်လာမှာဖြစ်ပြီး ကိုယ့်ဘက်ကလည်း ကြိုတင်ပြင်ဆင်နိုင်ခွင့်ရှိမှာဖြစ်ပါတယ်။

စံပြအိမ်ထောင်ရှင်တွေဆီမှာလည်း လေ့လာရမယ်
အများလေးစားအားကျရတဲ့ အိမ်ထောင်ရှင်တွေရဲ့ လျှို့ဝှက်ချက်ကိုလည်း ကိုယ့်ဘက်ကသိအောင် လေ့လာ ရမှာဖြစ်ပါတယ်။ သာယာတဲ့အိမ်ထောင်ရေးမှာ အများအားဖြင့် တစ်ယောက်ရဲ့သေးငယ် တဲ့အကျင့် ဆိုးတွေကို ကျန်တစ်ယောက်ကနားလည်လက်ခံပေးတာများပြီး တစ်ယောက်နဲ့တစ်ယောက် အပြန်အလှန် ကိုယ်ချင်းစာစိတ်နဲ့ နားလည်ပေးတာကလည်း အရေးပါပါတယ်။

တစ်ဘ၀လုံးပုံအပ်မယ့်သူကို သေချာရွေးရမယ်
ဒါကတော့ အရေးကြီးဆုံးအပိုင်းပါပဲ။ ကိုယ့်ဘက်က အိမ်ထောင်ပြုဖို့ ဥပမာအားဖြင့် မိဘတွေရဲ့ အတင်းအကျပ်ဖိအားပေးတာမျိုး ခံရပြီဆိုရင် ကိုယ့်ဘ၀လက်တွဲဖော်ကို ကိုယ်တိုင်ရွေးချယ်ဖို့အတွက် အခက်တွေ့နိုင်ပါတယ်။ ဒါကြောင့် အဲဒီလိုအဖြစ်မျိုးနဲ့ မကြုံတွေ့စေရဖို့အတွက် ကိုယ့်ဘက်ကတစ်ဘ၀လုံး ပုံအပ်ပေးရမယ့်သူကို ကြိုတင်ရွေးချယ်ထားဖို့လိုအပ်ပါတယ်။

အမြဲတမ်း အကောင်းဆုံးတွေဖြစ်မလာနိုင်ဘူးဆိုတာကိုလည်း လက်ခံထားရမယ်
ကိုယ်က ပြစ်မျိုးမှဲ့မထင် မိန်းကလေးတစ်ယောက်မဟုတ်သလို ကိုယ့်လက်တွဲဖော်ကလည်း အပြစ်အနာ အစာ တစ်စက်ကလေးမှမရှိတဲ့ အမျိုးသားတစ်ယောက်မဟုတ်နိုင်တာကို ကိုယ့်ဘက်က လက်ခံထားဖို့ လည်း လိုအပ်ပါတယ်။ ဒီလိုပဲ မင်္ဂလာဆောင်ဆောင်၊ မဆောင်ဆောင် ကိုယ့်ဘ၀က အဆိုးတွေကြီး လာမှာမဟုတ်သလို အကောင်းတွေပဲလာမှာမဟုတ်ပါဘူး။ ကိုယ့်ရဲ့စိတ်ကူးယဉ်အိပ်မက်ထဲကလို နေ့တိုင်းသာယာတဲ့ရာသီဥတုအောက်မှာ ရောင်စုံသက်တန့်တွေကို ထိုင်ကြည့်လိုရင်တော့ ကိုယ့်မင်္ဂလာ ခရီးက ဘယ်တော့မှ အထိုင်ကျလာမှာမဟုတ်ပါဘူး။ မင်္ဂလာဆောင်တယ်ဆိုတာ သူစိမ်းနှစ်ဦး တစ်ဘ၀တည်ဆောက်ရတာဖြစ်လို့ လွယ်ကူမှာတော့မဟုတ်သလို တစ်ဘ၀လုံး အဆင်ပြေချောမွေ့ လို့လည်း မျှော်လင့်ထားလို့မရပါဘူး။

ကိုယ့်ဘ၀အတွက် စီမံကိန်းချထားပါ
မင်္ဂလာမဆောင်ခင် သူနဲ့မျက်နှာချင်းဆိုင်ဆွေးနွေးပါ။ ကလေးဘယ်တော့ယူမယ်၊ ဘယ်နှစ်ယောက်ယူမယ်၊ ငွေဘယ်လိုစုမယ်၊ နှစ်ယောက်စလုံး အလုပ်ထွက်လုပ်မလား၊ အလုပ်က ပင်စင်ယူရင် အိုစာမင်းစာအတွက် ငွေဘယ်လိုစုထားမလဲ စသည်ဖြင့် သူနဲ့သေချာဆွေးနွေးသင့်ပါတယ်။ ငွေကြေး၊ ဘာသာရေး၊ ကလေးကိစ္စတွေက များသောအားဖြင့် သာယာတဲ့အိမ်ထောင်ရေးတွေကို ဖျက်စီးတတ်ပါတယ်။ အဲဒီတော့ ကိုယ့်ဘက်ကလည်း ဒီလိုအဖြစ်မျိုးတွေနဲ့ ရင်မဆိုင်ရအောင် လက်မထပ်ခင်ကတည်းက သူနဲ့သေချာဆွေးနွေးထားရမှာပါ။

--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 


Share on Google Plus

0 comments:

Post a Comment