လုပ်ငန်းခွင်ပြဿနာလေးတွေ ဘယ်လိုဖြေရှင်မယ်…

ပြဿနာဆိုတာ ငယ်စဉ်ကတည်းက၊ မွေးကတည်းကမလိုချင်ဘဲပိုင်ဆိုင်လာကြတဲ့အရာတစ်ခုဖြစ်ပါတယ်။ မွေးကတည်းက နို့ဆာတာကိုမိခင်ကမတိုက်နိုင်သေးလို့ ဆာလောင်ကောင်းဆာလောင်နေနိုင်တဲ့ ဒုက္ခ၊ ကျောင်းနေအရွယ်ရောက်ပြန်တော့လည်း အိမ်စာမပြီး၊ ဆရာမအရိုက်ခံရမှာကြောက်တဲ့ပြဿနာ၊ အသက်အရွယ်ကြီးလာပြန်တော့လည်း လုပ်ငန်းခွင်ထဲကပြဿနာ။ ပြဿနာတွေက စုံလင်လို့ပါဘဲ။ ဘယ်သူမှပြဿနာကိုလိုချင်လှပါတယ်လို့ မရှိပါဘူး။ ဒီပြဿနာတွေထဲမှာ အကြီးမားဆုံးကတော့ လုပ်ငန်းခွင်ထဲကပြဿနာဖြစ်ပါတယ်။ လူဟာငယ်ရာကနေကြီးလာတာဖြစ်တဲ့အတွက် လုပ်ငန်းခွင်ထဲက ပြဿနာဟာ ရှောင်လွဲလို့မရပါဘူး။ လုပ်ငန်းခွင်ထဲကပြဿနာဆိုတော့ ဘာတွေများဖြစ်မလဲ… အဓိကကတော့

- လုပ်ငန်းခွင်မှာ ခွဲခြားဆက်ဆံရခြင်း၊

- လုပ်ငန်းခွင် အနိုင်ကျင့်ခံရမှု၊

- လုပ်ငန်းခွင်လုံခြုံစိတ်ချရမှု၊

- လုပ်ငန်းခွင်စိတ်ဖိစီးမှု စတာတွေပဲဖြစ်ပါတယ်။

လုပ်ငန်းခွင်စိတ်ဖိစီးမှု

စိတ်ဖိစီးမှုဟာ ကောင်းကျိုးရှိသလို ဆိုးကျိုးလည်းရှိပါတယ်။ စိတ်ဖိစီးမှုကောင်းကျိုးဆိုလို့ အံ့သြသွားမယ်ထင်ပါတယ်။ စိတ်ဖိစီးမှုကအလုပ်ကိုကြိုးစားပမ်းစားလုပ်စေပါတယ်။ အလုပ်ကိုပိုပြီး စိန်ခေါ်မှုတွေဖြစ်စေနိုင်သလို ပိုပြီးစိတ်ဝင်စားမှုတွေဖြစ်စေနိုင်ပါတယ်။ အဲဒါကတော့ အလုပ်နဲ့ပတ်သက်ပြီး စိတ်ဖိစီးမှုတွေရဲ့ ကောင်းကျိုးဖြစ်ပါတယ်။ ဆိုးကျိုးအနေနဲ့ပြောရရင်တော့ ကိုယ့်ကိုယ်ကိုယ်မလုပ်ဆောင်နိုင်ဘူးလို့ တွေးထင်လာလေလေ ပိုပြီးမောပန်းနွမ်းနယ်လာလေ၊ စိတ်ဓာတ်ပိုကျလာလေဖြစ်ပါတယ်။ ရုပ်ပိုင်းဆိုင်ရာ ပြဿနာတွေဖြစ်တဲ့ခေါင်းမူးခေါင်းကိုက်၊ နာတာရှည် အ၀လွန်ရောဂါ၊ ကြွက်သားတွေတင်းမာလာခြင်း စတာတွေဖြစ်ပွားလာစေနိုင်ပါတယ်။

ဘယ်လိုဖြေရှင်းမလဲ

အထက်ပါပြောပြသွားခဲ့တဲ့ ရုပ်ပိုင်းဆိုင်ရာ၊ စိတ်ပိုင်းဆိုင်ရာ ပြဿနာတွေဖြစ်ပေါ်လာပြီလို့ခံစားရရင်တော့ လုပ်ငန်းခွင်မှာအပြောင်းအလဲလေးတွေလုပ်ဖို့လိုအပ်လာပါပြီ။ ကိုယ့်ရဲ့လုပ်ဖော်ကိုင်ဖက် ဒါမှမဟုတ် HR မန်နေဂျာကို ဒီကိစ္စတွေနဲ့ပတ်သက်ပြီး ဆွေးနွေးတိုင်ပင်ပါ။ အကြံပြုချက်တွေကို သုံးသပ်လက်ခံပြီး စိတ်ဖိစီးမှုကို အတတ်နိုင်ဆုံးလျော့ချပါ။

ဘာတွေက စိတ်ဖိစီးမှုကိုဖြစ်စေပါသလဲ

အမြောက်အများပါပဲ။ လုပ်ငန်းခွင်တောင်းဆိုမှုများပြားလာခြင်း + ၄င်းတို့အပေါ် ထိန်းချုပ်နိုင်စွမ်းနည်းပါးခြင်း = စိတ်ဖိစီးမှု

ဥပမာအချို့ကိုပြောရမယ်ဆိုရင်

- အလုပ်နဲ့ပတ်သက်ပြီး လေ့ကျင့်မှုမလုံလောက်ခဲ့ခြင်း၊

- အချိန်အကြာကြီး မရပ်မနားအလုပ်လုပ်နေခြင်း၊

- အလုပ်ဆုံးရှုံးမှာ(အလုပ်ပြုတ်မှာ) စိုးထိနေရခြင်း၊

- လုပ်ဖော်ကိုင်ဖက်နှင့် ပေါင်းသင်းဆက်ဆံပြောဆိုမှုမှာ အခက်အခဲရှိနေခြင်း၊

- အနိုင်ကျင့်ခံရခြင်း၊

- လုပ်ငန်းခွင်မှာ လုပ်ငန်းမျှဝေဖို့ရန် လူအင်အားအလုံအလောက်မရှိခြင်း စတာတွေကြောင့်အဖြစ်များပါတယ်။

လုပ်ငန်းခွင်စိတ်ဖိစီးမှုကို ဘယ်လိုရှောင်ရှားမလဲ

- ကျန်းမာပြီး စိတ်ချလုံခြုံရတဲ့ လုပ်ငန်းခွင်ပတ်ဝန်းကျင်ကို ဖန်တီးမယ်၊

- လုပ်ငန်းခွင်အပြောင်းအလဲတွေအတွက်တိုင်ပင်မယ်၊ ညှိနှိင်းမယ်၊

- လုပ်ငန်းခွင်အချိန်အတောအတွင်းမှာ ပုံမှန်အနားယူချိန်လေးလုပ်မယ်၊

- များပြားနေတဲ့လုပ်ငန်းဆောင်တာတွေကို အညီအမျှခွဲဝေမယ် စတာလေးတွေလုပ်ဆောင်သွားရပါမယ်။

လုပ်ငန်းခွင်မှာ ခွဲခြားဆက်ဆံခံရခြင်း

လုပ်ငန်းခွင်တစ်ခုမှာ ဒါမှမဟုတ် အလုပ်လျှောက်ထားစဉ်မှာ ရှောင်ဖယ် ရှောင်ဖယ် လုပ်နေတယ်လို့ ခံစားရရင်တော့ ဒါဟာခွဲခြားဆက်ဆံခံရခြင်းလို့ဆိုလိုပါတယ်။

ခွဲခြားဆက်ဆံမှုဆိုတာ ဘာကိုဆိုလိုတာပါလဲ

ခွဲခြားဆက်ဆံမှုဆိုတာ ကိုယ်ဟာဘယ်လိုလူတစ်ယောက်ဖြစ်တယ်၊ ဘာအတွက်ရပ်တည်နေတယ်ဆိုတဲ့အပေါ် မမျှမတဆက်ဆံခံရတဲ့ အခြေအနေတစ်ခုကိုဆိုလိုပါတယ်။ 

ခွဲခြားဆက်ဆံခံရမှုမှာ အခြေခံအားဖြင့်

- လိင်

- အသက်အရွယ်

- ဘာသာရေးဆိုင်ရာ ယုံကြည်မှု

- နိုင်ငံရေးဆိုင်ရာ ယုံကြည်မှု

- လူမျိုး၊ အသားအရောင်

- ရုပ်ပိုင်းဆိုင်ရာ

- လူပုဂ္ဂိုလ်ရေးဆိုင်ရာ ပတ်သက်မှုစတာတွေက အဓိကအားဖြင့်ပါဝင်ပတ်သက်ဆက်နွယ်နေပါတယ်။

ခွဲခြားဆက်ဆံခံရတဲ့ပုံစံတွေအနေနဲ့ဆိုရင်

- အလုပ်မှအသိပေးအကြောင်းကြားခြင်းမရှိဘဲ ထုတ်ပယ်ခံရခြင်း၊

- ကိုယ့်ရဲ့အလုပ်လုပ်နိုင်စွမ်းကို ၀င်ရောက်စွက်ဖက်နှောင့်ယှက်ခံရခြင်း၊

- အခြားလုပ်ဖော်ကိုင်ဖက်များနဲ့ မတူကွဲခြားနားစွာဆက်ဆံခံရခြင်း၊

- တူညီတဲ့လုပ်ငန်းခွင်တစ်ခုအတွင်းမှာတင် ကွဲပြားတဲ့စည်းမျဉ်းစည်းကမ်းများနှင့် သတ်မှတ်ကန့်သတ်ထားခံရခြင်း စတာတွေဖြစ်ပါတယ်။

လုပ်ငန်းခွင် အကြမ်းဖက်မှု၊ အနိုင်ကျင့်ခံရမှု

ဘယ်သူမဆို သက်ဆိုင်ရာလုပ်ငန်းခွင်မှာ ထိခိုက်မှု၊ အနာတရမရှိဘဲ လုံခြုံစိတ်ချရစွာလုပ်ကိုင်နိုင်ဖို့ အခွင့်အရေးရှိပါတယ်။ တကယ်လို့ ကိုယ်ဟာလုပ်ငန်းခွင်တစ်ခုရဲ့ သားကောင်အဖြစ်ကျရောက်နေပြီဆိုရင်တော့ တောင်းခံရရှိနိုင်တဲ့ အကူအညီတွေရှိပါတယ်။

လုပ်ငန်းခွင်အနိုင်ကျင့်ခံရခြင်းမှာ ဘာတွေပါဝင်ပါသလဲ

- လှောင်ပြောင်စနောက်ခံရခြင်း

- အဝေဖန်ခံ၊ စော်ကားခံရခြင်း

- ကိုယ့်ရဲ့ဂုဏ်သိက္ခာကို အတင်းအဖျင်းပြောခံရခြင်း

- ခြိမ်းခြောက်ခံရခြင်း

- မတရားအလွန်အကျွံစေခိုင်းခံရခြင်း စတာတွေဟာ အဓိကပါဝင်တဲ့အချက်ဖြစ်ပါတယ်။

ဒါတွေနဲ့ပတ်သက်ပြီး ကိုယ့်ဘက်ကဘာတွေလုပ်ဆောင်နိုင်ပါသလဲ

လုပ်ငန်းခွင် အနိုင်ကျင့်ခံရတာနဲ့ပတ်သက်ပြီး အခွင့်အရေးအတည်တကျမရရှိသေးတဲ့ နေရာဒေသတွေမှာ ဖြေရှင်းရတာခက်ခဲလှပါတယ်။ ကိုယ်တစ်ယောက်တည်းရင်ဆိုင်ဖြေရှင်းဖို့က ခက်ခဲလွန်းလှပါတယ်။ အကောင်းဆုံးအကြံပြုချက်ကတော့ ကိုယ်ယုံကြည်ရတဲ့ လုပ်ဖော်ကိုင်ဖက်ကိုဖြစ်စေ၊ မိသားစုကိုဖြစ်စေ တိုင်ပင်ပါ။ ရင်ဖွင့်ပြောဆိုပါ။ သူတို့ရဲ့အကြံပြုချက်တွေကို အပြန်ပြန်အလှန်လှန်သုံးသပ်ပြီး အထက်လူကြီးကို ဖွင့်ပြောပြီး အကူအညီတောင်းခံတာ အကောင်းဆုံးဖြစ်ပါတယ်။

ဝိုင်း

--------------------------------------------------------

ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 

Share on Google Plus