နေတတ်ရင် ကျေနပ်စရာပါ

အဆိုးရွားဆုံးအခြေအနေဆိုတာ လူသားတိုင်းကြုံတွေ့ရတဲ့ လောကဓမ္မတာတစ်ခုပါ။ ကိုယ့်အနေနဲ့ ကိုယ့်ဘ၀တိုးတက်ရေးအတွက် အဆင်သင့်ရှိနေဖို့လိုအပ်ပြီး နေ့ရက်တိုင်းမှာ စိတ်ဖိစီးမှုကင်းကင်းနဲ့ ဖြတ်သန်းနိုင်ဖို့လည်း အရေးကြီးပါတယ်။ အထူးသဖြင့် ကိုယ့်ရဲ့ဘ၀လမ်းကြောင်းမှာ အောင်မြင်မှု ရချင် သူတွေအတွက် အကောင်းဆုံးနည်းလမ်းတွေကို ဖော်ပြပေးလိုက်ပါတယ်။

စောစောထပါ

မနက်စောစောနိုးလေ့ရှိသူဟာ အိပ်ရာထနောက်ကျသူတွေနဲ့ယှဉ်ရင် အဲဒီနေ့မှာ ပိုမိုပျော်ရွှင်လေ့ရှိသလို ကြိုးစားအားထုတ်မှုအပိုင်းမှာလည်း ပိုမိုအားကောင်းတတ်ပြီး လောကကြီးအပေါ် အကောင်းမြင်မှုမှာ သာမန်ထက်ပိုများလေ့ရှိပါတယ်။ မနက်စောစော အိပ်ရာကထခြင်းအားဖြင့် အရင်တုန်းက အဲဒီလို အချိန်မျိုးမှာ မလုပ်ဖြစ်ခဲ့တာတွေကို လုပ်ဖြစ်လေ့ရှိပါတယ်။ ဒါတွေကတော့ စာအုပ်ဖတ်တာတို့၊ သီချင်းနားထောင်တာတို့၊ နောက်ဆုံးတရားထိုင်တာတို့ ဖြစ်ပါတယ်။

လေ့ကျင့်ခန်းလုပ်ပါ

လေ့ကျင့်ခန်းလုပ်ခြင်းအားဖြင့် များပြားတဲ့အကျိုးကျေးဇူးတွေ ရရှိနိုင်ပါတယ်။ ကိုယ်လက်ကျန်းမာရေး ကောင်းမွန်လာနိုင်သလို စိတ်ခံစားမှုအပိုင်းမှာလည်း လန်းဆန်းနေနိုင်ပါတယ်။ ဒါ့အပြင် လေ့ကျင့်ခန်း လုပ်ပေးခြင်းအားဖြင့် ပူပင်သောကတွေနဲ့ စိတ်ကျရောဂါဝေဒနာတွေကို ဖြေလျှော့ပေးနိုင် စွမ်းလည်း ရှိပါတယ်။

စနစ်တကျရှိပါ

ကိုယ့်ရဲ့တစ်နေ့တာအတွက် နေ့တိုင်းစီမံကိန်းတွေ ရေးဆွဲထားသင့်ပါတယ်။ အခုလို ကိုယ်လုပ်ရမယ့် အလုပ်တွေကို စနစ်တကျရေးဆွဲထားခြင်းဖြင့် အရင်ကထက် လွယ်ကူလျှင်မြန်စွာ လုပ်ဆောင်လာနိုင်သလို ကိုယ်လုပ်ချင်တာတွေလုပ်ဖို့အတွက် အချိန်ပိုတွေလည်း ပိုရလာနိုင်ပါတယ်။ တစ်နေ့တာအတွက် ကိုယ့်ရဲ့ အရေးကြီးဆုံးလုပ်ငန်းတွေကို အာရုံစိုက်ထားရမှာဖြစ်ပြီး အလုပ်တွေကိုရွှေ့ဆိုင်းတာထက် ပြီးစီးအောင်လုပ်ဆောင်ရပါမယ်။

ကိုယ့်စိတ်ကြိုက်ဆိုရိုးစကားပုံတွေကို အမှတ်ရပါ

ယုံယုံ၊ မယုံယုံ တစ်ခါတလေမှာ အဲဒီလိုခွန်အားဖြစ်စေတဲ့ ဆိုရိုးစကားပုံတွေက ကိုယ့်ရဲ့တစ်နေ့တာ ပြဿနာတွေကိုဖြေရှင်းဖို့အတွက် အဓိကကျလာတတ်ပါတယ်။ ပြဿနာတွေတတ်နေချိန်၊ စိတ်ဖိစီးမှု များနေချိန်တွေမှာ ကိုယ့်အကြိုက်စကားပုံတွေကို ပြန်လည်အမှတ်ရပြီးကျော်ဖြတ်ရမယ့် နေ့ရက်တွေကို ခွန်အားရှိရှိနဲ့ ဖြတ်သန်းနိုင်မှာပါ။

အဆိုးရွားဆုံးအခြေအနေအတွက် ကြိုတင်ပြင်ဆင်ထားပါ

ကိုယ်က ဘယ်လောက်ပဲကြိုးစားကြိုးစား အဆိုးရွားဆုံးအခြေအနေတွေကိုတော့ ရင်ဆိုင်ရလေ့ရှိပါတယ်။ အဲဒီအတွက်လည်း ကိုယ့်ဘက်က အဆိုးရွားဆုံးအခြေအနေမရောက်လာခင် ခံနိုင်ရည်ရှိအောင် လေ့ကျင့်ခန်းသဘောမျိုးအဖြစ် ကြိုတင်ပြင်ဆင်ထားရမှာဖြစ်ပါတယ်။ အမှားလုပ်မိမှာကို မကြောက်ပါနဲ့။ အိုင်ယာလန် ပြဇာတ်ရေးဆရာကြီး ဂျော့ခ်ျဘာနက်ရှောကတော့ ဘ၀မှာ အမှားတွေနဲ့ ရင်ဆိုင်ရတာဟာ ဘာမှမလုပ်တာထက်စာရင်တော့ ကောင်းတယ်လို့ ဖွင့်ဟခဲ့ပါတယ်။

ရယ်မောပါ

အဆိုးရွားဆုံးအခြေအနေမှာ ပျော်ပျော်ရွှင်ရွှင်ဖြစ်ချင်တယ်ဆိုရင်တော့ ရယ်မောပေးတာကလည်း နည်းလမ်းကောင်းတစ်ခုဖြစ်ပါတယ်။ ကိုယ့်ကိုယ်ကိုယ် စိတ်လွတ်လက်လွတ်သဘောထားပြီး စိုးရိမ်မှုနဲ့ ပြဿနာတွေက ကြောက်စရာကောင်းလောက်အောင် မခက်ခဲဘူးဆိုတာကို သက်သေပြရပါမယ်။ အဆိုးရွားဆုံးအခြေအနေမှာ ဟာသစာအုပ်တွေဖတ်၊ ဟာသကားတွေကြည့်ပေးခြင်းအားဖြင့် ခံစားနေရတဲ့ စိတ်ဖိစီးမှုတွေလည်း အတန်အသင့်လျော့ပါးသွားနိုင်ပါတယ်။

ကိုယ့်ရဲ့အတွေးတွေကို မျှဝေပေးပါ

ကိုယ်ခံစားရသမျှတွေကို တခြားသူတွေဆီ ရင်ဖွင့်တာကလည်း အဆိုးရွားဆုံးအခြေအနေကနေ လွတ်မြောက်နိုင်ဖို့အတွက် အကောင်းဆုံးနည်းလမ်းတစ်ခုဖြစ်ပါတယ်။ နောက်ပြီး ကိုယ့်ကိုယ်ကိုယ်လည်း အားပေးနှစ်သိမ့်ရမှာဖြစ်ပြီး စိတ်ဓာတ်တက်ကြွစေနိုင်တဲ့ စကားလုံးတွေပဲ အသုံးပြုသင့်ပါတယ်။ ''ငါမလုပ်နိုင်ဘူး''၊ ''ငါအသုံးမကျဘူး''၊ ''ငါညံ့လိုက်တာ''စတဲ့ ကိုယ့်ကိုယ်ကိုယ် စိတ်ဓာတ်ကျစေတဲ့ စကားလုံးမျိုးတွေ အသုံးမပြုမိဖို့လည်း အရေးကြီးပါတယ်။

ဖြိုးတေဇာ

--------------------------------------------------------

ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape