ကလေးငယ်နဲ့အတူဈေးဝယ်ထွက်ရတော့မယ်ဆိုရင်…











လူမမယ် သားသည်မိခင်တွေအတွက် ကလေးငယ်နဲ့အတူ ဈေးဝယ်ထွက်မယ်ဆိုရင် ခက်ခဲမှာတော့ သေချာပါတယ်။ ဒါပေမဲ့ ကလေးကိုအိမ်မှာထားခဲ့ပြီး အမြဲတမ်း တစ်ယောက်တည်း ဈေးဝယ်ထွက်ဖို့ဆိုတာ ကလည်း မဖြစ်နိုင်ပြန်ပါဘူး။ ဒီတော့ ကလေးငယ်နဲ့အတူ ဈေးဝယ်ထွက်တော့မယ်ဆိုရင် ဘယ်လိုတွေပြင် ဆင်သင့်လဲဆိုတာကတော့…

ကြိုတင်ပြင်ဆင်ပါ
ဘေးနားမှာ ကလေးပါလာပြီဆိုရင် ကိုယ့်အနေနဲ့ အိမ်ကမထွက်ခင်ကတည်းက ဘာဝယ်ရမယ်ဆိုတာ စာရင်းနဲ့ အသေးစိတ်ပြုစုထားဖို့လိုအပ်ပါတယ်။ ရေခဲသေတ္တာထဲမှာ ဘာတွေကုန်သွာပြီလဲဆိုတာ ပြန် စစ်ဆေးရမှာဖြစ်ပြီး ကိုယ့်မိသားစုဝင်တွေကို ဘာလိုအပ်သေးလဲလို့ မေးမြန်းရမှာဖြစ်ပါတယ်။ အဲဒီလိုဆိုရင် ဈေးဝယ်ထွက်ရာမှာ စဉ်းစားနေစရာမလိုတော့ဘဲ လိုအပ်တဲ့ပစ္စည်းတွေကို တစ်ခါတည်း ၀ယ်ယူနိုင် မှာဖြစ်ပါတယ်။

မှန်ကန်တဲ့အချိန်ရွေးပါ
ဈေးဝယ်စင်တာတွေမှာ လူကျတဲ့အချိန်တွေရှိတတ်ပါတယ်။ ပုံမှန်အားဖြင့်ဆိုရင်တော့ ဈေးဝယ်စင်တာတွေ မှာ မနက် (၁၀)နာရီလောက်နဲ့ ညနေ (၅)နာရီအချိန်တွေမှာ ဈေးဝယ်သူတွေများနေတတ်ပါတယ်။ ဒါကြောင့် ဖြစ်နိုင်ရင် အဲဒီအချိန်တွေကိုရှောင်ပြီး ဈေးဝယ်ထွက်သင့်သလို တကယ်လို့ကိုယ့်အိမ်နားမှာ (၂၄)နာရီဖွင့်တဲ့ ဈေးဆိုင်မျိုးရှိမယ်ဆိုရင်တော့ ကလေးကလည်းမနက်စောစောနိုးတတ်လို့ လူသူရှင်းချိန်မှာ ဈေးဝယ်ထွက်သင့်ပါတယ်။

ကလေးတွေကို အပျင်းပြေအောင်ထားပါ
ဈေးဝယ်စင်တာတွေဟာ ကလေးငယ်တွေအတွက်တော့ နေရာကောင်းမဟုတ်တာသေချာပါတယ်။ ကိုယ်ဈေးဝယ်ထွက်ချိန်မှာ ကလေးငယ်စိတ်ပျော်ရွှင်နေဖို့အတွက် အရုပ်လေးတွေပေးထားတာမျိုးနဲ့ ချော့သင့်ပါတယ်။

ဈေးဝယ်မထွက်ခင် ကလေးကိုထမင်းကျွေးပါ
ဘယ်ကလေးမဆို ဗိုက်ဆာနေရင် ကိုယ်ဈေးဝယ်ထွက်ရာမှာ ဂျီကျလေ့ရှိပါတယ်။ ဒီတော့ ကိုယ့်အနေနဲ့ ဈေးဝယ်မထွက်ခင် အိမ်မှာကလေးကိုထမင်းဖြစ်ဖြစ် တစ်ခုခုကျွေးရမှာဖြစ်ပြီး ဈေးဝယ်ထွက်ချိန်မှာ ကလေးဗိုက်ဆာလာရင် အရေးပေါ်ကျွေးဖို့အတွက် မုန့်တွေလည်းယူလာဖို့လိုပါတယ်။ တကယ်လို့ ကိုယ်ဈေးဝယ်ထွက်တာကြာမယ်ဆိုရင်တော့ ကလေးကိုပလုတ်တုတ်လို စုပ်လုံးလေးတွေကျွေးပြီး အာရုံပြောင်းထားသင့်ပါတယ်။ အဲဒီစုပ်လုံးတွေက အချိန်အကြာကြီးခံပြီး ကလေးလည်းစုပ်လုံးတွေနဲ့ အလုပ်ရှုပ်နေနိုင်လို့ ဂျီကျဖို့လည်းအချိန်မရတော့ပါဘူး။

ဈေးဝယ်ထွက်ခြင်းအတွေ့အကြုံကနေလေ့လာပါ
တကယ်လို့ ဈေးဝယ်စင်တာမှာ ဈေးဝယ်သူတွေရှင်းနေမယ်၊ ကိုယ့်ကလေးကလည်း စိတ်ကြည်နေမယ်ဆိုရင် ကိုယ့်အနေနဲ့ အတွေ့အကြုံတွေရအောင် လည့်ပတကြည့်ရှုနိုင်ပါတယ်။ စားသောက်ကုန်ပစ္စည်းတွေနဲ့ အ၀တ်အထည်ထုတ်ကုန်ပစ္စည်းတွေရဲ့ ကွဲပြားခြားနားမှုတွေကို လေ့လာရမှာဖြစ်ပြီး သားကြီး၊ သမီးကြီးတွေကို သင်ကြားပေးဖို့လည်း လိုအပ်ပါတယ်။ ကုန်ပစ္စည်းတွေပေါ်က အညွှန်းတွေကို ဘယ်လိုဖတ်ရမလဲဆိုတာနဲ့ ဈေးနှုန်းချင်းဘယ်လိုနှိုင်းယှဉ်ရမလဲဆိုတာတွေပါ ကိုယ့်ကလေးတွေကို ပြန်သင်ပေးနိုင်ပါတယ်။

ကလေးတွေကို ချီးကျူးပေးပါ
ကလေးတိုင်းဟာ လူကြီးမိဘတွေရဲ့ ချီးကျူးမှုတွေကို ခံယူချင်ကြတာ အားလုံးအသိပဲဖြစ်ပါတယ်။ ဈေးဝယ်မထွက်ခင်မှာ ကလေးကိုဘယ်လိုပြုမူနေထိုင်ရမလဲဆိုတာ သေချာရှင်းပြရမှာဖြစ်ပြီး ဈေးဝယ်ထွက်နေချိန်မှာ ကလေးငယ်ဂျီမကျဘူးဆိုရင် ကိုယ့်ဘက်ကလည်း သူ့ရဲ့စိတ်ရှည်သည်းခံနိုင်မှုကို အသိအမှတ်ပြုချီးကျူးပေးရမှာဖြစ်ပါတယ်။ ဒါ့အပြင် အိမ်ပြန်ရောက်ရင်လည်း မိသားစုဝင်တွေရှေ့မှာ ကလေးငယ်ရဲ့အပြုအမူကောင်းတွေကို ပြန်လည်ချီးကျူးသင့်ပါတယ်။
ဖြိုးတေဇာ

--------------------------------------------------------
ရသစုံလင် အနုပညာဖျော်ဖြေမှု ကောက်ကြောင်းများကို Shape Entertainment မှာ ဖတ်ရှုလိုက်ပါ ...

www.facebook.com/shapejournal
www.facebook.com/groups/weloveshape

 


Share on Google Plus

0 comments:

Post a Comment